މާލީ ބަޔާން ހުށަނާޅުއްވާން ރައީސުން އެބަ ތިއްބެވި، ފިޔަވަޅު އަޅާފައެއް ނުވޭ: ތަރުޖަމާން މުއާޒު
31 އޮކްޓޯބަރު 2018 | ބުދަ 10:31ރައީސް ޔާމީން މާލީ ބަޔާން ހުށަހަޅުއްވާފައި ނުވާތީ، އެ މައްސަލަ ބެލުމަށް އޭސީސީ އިން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ވަނީ ލަފާދީފައި
ރައީސް އަބްދުﷲ ޔާމީން އަބްދުލްގައްޔޫމް
މާލީ ބަޔާން ހުށަނާޅުއްވާން ރައީސުން އެބަ ތިއްބެވިކަމަށާއި އެ ބޭފުޅުންނަށް އެއްވެސް ފިޔަވަޅެއް އަޅާފައި ނުވާކަމަށް ރައީސް އޮފީހުގެ ތަރުޖަމާން އިބްރާހީމް މުއާޒު އަލީ ވިދާޅުވެއްޖެއެވެ.
ރައީސް އޮފީހުގެ ތަރުޖަމާން މުއާޒު ކުރައްވާފައިވާ ޓުވީޓެއްގައި ވިދާޅުވެފައި ވަނީ ބަޔާން ހުށަނާޅުއްވާ ރައީސުންނަށް ފިޔަވަޅެއް އަޅާފައި ނުވާކަން މި ފުރުސަތުގައި ފާހަގަކުރާ ކަމަށާއި، ރައީސްގެ މަލީ ބަޔާންގެ އެންމެހާ މަޝްވަރާތައް އޮޑިޓަރ ޖެނެރަލްގެ ލަފާފުޅާ އެއްކޮށް ކުރެވިފައިވާ ކަމަށެވެ.
ރައީސް ޔާމީން މާލީ ބަޔާން ހުށަނާޅުއްވައިގެން އެއްވެސް ފިޔަވަޅެއް އަޅާފައިނުވާ ކަމަށް ބުނެ ރައީސް އޮފީހުގެ ތަރުޖަމާން މުއާޒް ޓްވީޓް ކުރައްވާފައިވާއިރު، ރައީސް ޔާމީން މާލީ ބަޔާން ހުށަހަޅުއްވާފައި ނުވާތީ، އެ މައްސަލަ ބެލުމަށް އޭސީސީ އިން ރައްޔިތުންގެ މަޖިލީހުގެ މާލިއްޔަތު ކޮމިޓީ އަށް ވަނީ ލަފާދީފައެވެ.
އޭސީސީން މިގޮތަށް ރައްޔިތުންގެ މަޖިލީހުގެ މާލިއްޔަތު ކޮމެޓީއަށް ލަފާ ދީފައި ވަނީ ރައީސް އަބްދުﷲ ޔާމީންގެ މާލީ ބަޔާން އޮޑިޓާ ޖެނެރަލް އޮފީހަށް ހުށަނާޅުއް ވަނީ އެމަނިކުފާންގެ ނުފޫޒު ބޭނުންކުރައްވައިގެން ކަމަށް ބުނެ އަމިއްލަ ފަރާތަކުން އޭސީސީއަށް ހުށަހެޅި މައްސަލަ ބެލުމަސް ފަހުއެވެ.
އޭސީސީން ބުނީ ގާނޫނު އަސާސީގެ 120 ވަނަ މާއްދާގެ ދަށުން ރައީސް އަބްދުﷲ ޔާމީންގެ މާލީ ބަޔާން އޮޑިޓަރ ޖެނެރަލް އޮފީހަށް ހުށަހެޅުމުން އެމައްސަލަ ބަލައި ފިޔަވަޅު ނޭޅި ވަނީ ބަޔާން ހުށަނާޅައިގެން އެޅޭނެ ފިޔަވަޅެއް އެއްވެސް ގާނޫނެއްގައި ބަޔާންކޮށްފައި ނުވާތީ ކަމަށެވެ. އެހެންކަމުން އޮޑިޓް އޮފީހުން ފިޔަވަޅު އަޅާފައި ނުވުމަކީ އެ އޮފީހުގެ މައްޗަށް ކޮރަޕްޝަންގެ ތުހުމަތެއް ކުރެވޭނެ ކަމެއް ނޫން ކަމަށެވެ.
އޭސީސީން ބުނީ އެކަމުގައި ރައްޔިތުންގެ މަޖިލީހުގެ މާލިއްޔަތު ކޮމެޓީން ބަލައި ކުރިއަށް ގެންދެވިދާނެ ކަމަށެވެ.
މި ކަމުގައި އޮޑިޓަރ ޖެނެރަލް ހަސަން ޒިޔަތުގެ ބަހެއް ހޯދާލުމަށް ރާއްޖެ އެމްވީއިން ގުޅާލުމުން ވިދާޅުވީ އޮޑިޓަރ ޖެނެރަލް އޮފީހުގެ މީޑިޔާ އޮފިޝަލް ނަސީމްއަށް ގުޅައިގެން މައުލޫމާތު ހޯއްދެވުމަށެވެ. ނަމަވެސް ނަސީމް ފޯން ނުނަންގަވާތީ، ބަހެއް ލިބޭ ގޮތް ވަނީ ނުވެފައެވެ.
