މަލައިކާ އާއި އަރުޖުން އަންނަ އަހަރު ކައިވެނި ކުރަނީ؟

މަލައިކާ އަރޯރާ އާއި އަރުޖުން ކަޕޫރު ޑޭޓް ކުރަމުންދާ ކަމަށް އަޑުފެތުރިފައިވާތާ ވަނީ ގިނަ ދުވަސްތަކެއް ވެފައެވެ. ނަމަވެސް މި ދެތަރިންގެ ދެމެދުގައި ގުޅުމެއް އޮންނަ ކަމަށް އެއްބަސް ވެފައެއް ނުވެއެވެ.

ފަހަކަށް އައިސް މި ދެ މީހުން އެކުގައި އެކިއެކި ހަފްލާތަކުން ފެނިގެން ދާތީ މީޑިއާގައި ދެކެވޭ ވާހަކަ ތަކަށް ވަނީ އިތުރު ބާރަކަށް ވެފައެވެ.

ދާދި ފަހުން މިލާން އެއަރޕޯޓްގައި މި ޖޯޑު އަތުގައި ހިފައިގެން ހިނގާފައި ދަނިކޮށް ނަގާފައިވާ ފޮޓޯއެއް ވަނީ ވައިރަލް ވެފައެވެ. ރިޕޯޓްތައް ބުނާ ގޮތުން މިމަހުގެ 23 ވަނަ ދުވަހު މަލައިކާގެ 45 ވަނަ އުފަންދުވަސް އިޓަލީގައި ފާހަގަ ކޮށްފައި ވަނީ އަރުޖުން 33، އާ އެކުގައެވެ.

މަލައިކާ އާއި ސަލްމާން ޚާންގެ ކޮއްކޮ އަދި ބޮލީވުޑް އެކްޓަރ- ޑައިރެކްޓަރ އަރުބާޒް ޚާންގެ ކައިވެނި ރޫނުޅު ފަހުން މި ދެ ތަރިން ޑޭޓް ކުރާކަމުގެ އަޑުތައް ވަނީ ފެތުރިފައެވެ.

ފިލްމް ފެއަރގައި ރިޕޯޓްކޮށްފައިވާ ގޮތުން އެ ދެތަރިން ދަނީ އަންނަ އަހަރު ކައިވެނި ކުރުމަށް ތައްޔާރު ވަމުންނެވެ.

ދާދި ފަހުން ޓީވީ ޝޯ "އިންޑިއާސް ގޮޓް ޓެލެންޓް"ގައި ވެސް މަލައިކާގެ އަތުގައި ހިފައިގެން ސްޓޭޖަށް އެރި މަންޒަރު ވަނީ ފެނިގެން ގޮސްފައެވެ.

މަލައިކާ އާއި އަރުބާޒް ޚާން ކައިވެނި ކޮށްފައި ވަނީ 1998 ވަނަ އަހަރުއެވެ.

މި ދެމީހުން ސެޕަރޭޓް ވެފައި ވަނީ 2016 ވަނަ އަހަރުގެ މާރޗް މަހުގައެވެ. އަދި އެ ދެމީހުން ވަރިވެފައި ވަނީ މިއަހަރުގެ މެއި މަހުއެވެ. މަލައިކާ އާއި އަރްބާޒް ޚާން އަށް ވަނީ ފިރިހެން ދަރިފުޅަކު ލިބިފައެއެވެ. ފިލްމް ޕރޮޑިއުސަރ ބޮނޭ ކަޕޫރުގެ ހަމައެކަނި ފިރިހެންދަރިފުޅު އަރުޖުން ކަޕޫރު އަދި ކައިވެންޏެއް ކޮށްފައެއް ނުވެއެވެ.