ގާސިމްއާމެދު ބޭންކުން ދައްކާ ވާހަކަތަކުން ކޮރަޕްޝަނާ ދެކޮޅަށް އަޑު އުފުލުމުގެ ސަގާފަތެއް ގާއިމްކުރުމަށް ހުރަސްއެޅޭ: ޓީއެމް
1.08 ބިލިއަން ރުފިޔާ ވަގަށް ނެގި ނެގުމުގެ ތަފްސީލް އެނގިގެން ދިޔައީ ގާސިމް ހާމަކުރި މައުލޫމާތުތަކުގެ ސަބަބުން
ޤާސިމް އަބްދުލްކަރީމް
ދިވެހިރާއްޖޭގައި ހިންގާފައިވާ އެންމެ ބޮޑު ކޮރަޕްޝަންގެ މައްސަލަ ކަމުގައިވާ އެމް.އެމް.ޕީ.އާރް.ސީ ކޮރަޕްޝަން މައްސަލައިގެ ހަގީގަތް ހާމަކުރި ވިސްލްބްލޯވަރު ގާސިމް އަބްދުލްކަރީމާ ގުޅޭގޮތުން ބޭންކް އޮފް މޯލްޑިވްސްއިން ދައްކާވާހަކައަކީ ކޮރަޕްޝަނާ ދެކޮޅަށް ހިތްވަރާއެކު ތެދުވި މީހެއްގެ އަމަލުގެ މުހިންމުކަން ކަނޑުވާލައި ކޮރަޕްޝަނާ ދެކޮޅަށް އަޑު އުފުލުމުގެ ސަގާފަތެއް ގާއިމްކުރުމަށް ހުރަސް އެޅިގެން ދާނެ ވާހަކަތަކެއް ކަމަށް ދެކޭކަމަށް ޓްރާންސްޕޭރެންސީ މޯލްޑިވްސްއިން އަންގާރަ ދުވަހު ބުނެފިއެވެ.
ޓީއެމްއިން ނެރުނު ބަޔާނުގައި ބުނެފައިވަނީ ބޭންކުގެ މުވައްޒަފުންނަށް ހިއްސާ ކޮށްފައިވާކަމަށް ބުނާ މެމޯ އަދި އޭގެ މައްޗަށް މީޑިޔާތަކުން ޝާއިއުކޮށްފައިވާ ލިޔުންތަކަކީކޮރަޕްޝަނާ ދެކޮޅަށް ހިތްވަރާއެކު ތެދުވި މީހެއްގެ އެ އަމަލުގެ މުހިންމުކަން ކަނޑުވާލައި ދިވެހިރާއްޖޭގައި ކޮރަޕްޝަނާ ދެކޮޅަށް އަޑު އުފުލުމުގެ ސަގާފަތެއް ގާއިމްކުރުމަށް ވެސް ހުރަސް އެޅިގެން ދާނެ ވާހަކަތަކެއްގެ ގޮތުގައި އެޖަމިއްޔާއިން ސިފަކުރާ ކަމަށެވެ.
2016 ވަނަ އަހަރު އެސް.އޯ.އެފްގެ ބޭންކް.އޮފް. މޯލްޑިވްސް އެކައުންޓް މެދުވެރިކޮށް، ހިންގަމުން ގެންދިޔަ ޖަރީމާތަކުގެ ވާހަކަ ކުރީގެ އޮޑިޓް ރިޕޯރޓްތަކުގައި އޮތްނަމަވެސް، ރައްޔިތުންގެ ބައިތުލްމާލުން 1.08 ބިލިއަން ރުފިޔާ ވަގަށް ނެގި ނެގުމުގެ ތަފްސީލް އެނގިގެން ދިޔައީ ގާސިމް ހާމަކުރި މައުލޫމާތުތަކުގެ ސަބަބުންކަމަށް އެ ޖަމާއަތުން ބުނެފައިވެއެވެ.
އެ މައުލޫމާތުތައް ހާމަކުރުމުގެ ސަބަބުން ގާސިމަށް މާލީ އަދި އެހެނިހެން އެއްވެސް މަންފާއެއް ވެސް ލިބިފައިނުވާ ކަމަށާއި އޭގެ ބަދަލުގައި އޭނާގެ މި އަމަލަކީ 'ގާނޫނާ ހިލާފު' އަމަލެއްގެ ގޮތުގައި ކަނޑައަޅައި އޭނާ ވަނީ ފުލުހުންގެ ބަންދުގައި އެތައް ދުވަހެއް ހޭދަކޮށް އަދި ޖިނާއީ ކުށްވެރިއެއްގެ ލައްގަނޑު ޖެހި، ހުކުމަށް ވުރެ ދިގު މުއްދަތެއްގައި ޖަލުބަންދުގައި އޮންނަން ޖެހި، ނަފުސާނީ އަދި ޖިސްމާނީގޮތުން ބޮޑެތި ގޯނާތަކެއް ތަހައްމަލުކުރަން ޖެހިފައިވާކަމަށް ވެސް ބުނެފައިވެއެވެ.
އެސް.އޯ.އެފް އެކައުންޓަށް ވަންނަމުން ދިޔަ ބޮޑެތި އަދަދުތަކުގެ ވާހަކަ، ވިސްލްބްލޯވަރެއްގެ ހައިސިއްޔަތުން، ގާސިމް ފަޅާއަރުވާލިއިރު، މިކަން ހިނގާތާ އެތައް ދުވަހެއް ވެފައިވީނަމަވެސް، ބޭންކުން އެއްވެސް ފިޔަވަޅެއް އަޅާފައިނުވާތީ، އެކަމަކީ ބޭންކުގެ ބައިވެރިވުމާއެކު ހިނގަމުން ދިޔަ ކަމެއްތޯ ނުވަތަ ނޫންތޯ އޭނާޔަށް ޔަގީނެއް ނުވާކަމަށް ވެސް ޓްރާންސްޕޭރެންސީންވަނީ ބުނެފައެވެ.
