މާލޭގެ މަގުތަކުގައި ހެދޭ ފެން ހިންދުމަށް "ސްޓޯމް ވޯޓަރ ޑްރެއިން" ޕްރޮޖެކްޓަށް 37 މިލިއަން ރުފިޔާ ޚަރަދުކޮށްފައިވާކަމަށް ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވެއްޖެއެވެ.
މޫސުން ގޯސްވެ، މާލޭގެ މަގުތަކުގައި ފެންބޮޑުވުމުގެ މައްސަަލައިގެ ސަބަބުން ގިނަ ރައްޔިތުންތަކެއްގެ ފާޑުކިޔުންތައް ހަައުސިން މިނިސްޓަރ ޑރ. މުއިއްޒުއަށް އަމާޒުވެފައިވާއިރު، އަންގާރަ ދުވަހު ކުރެއްވި ޓުވީޓެއްގައި މިނިސްޓަރު ވަނީ ފެން ހިންދުމުގެ ނިޒާމް ޤާއިމްކުރުމަށް 2014 އިން ފެށިގެން ކުރި ހަރަދުގެ ތަފްސީލްތަކެއް ހާމަކޮށްފައެވެ. އެގޮތުން 2014 އިން ފެށިގެން މިހާތަނަށް ފެން ހިންދުމުގެ ނިޒާމް ޤާއިމްކުރުމަށް، ނުވަތަ "ސްޓޯމް ވޯޓަރ ޑްރެއިން" ޕްރޮޖެކްޓަށް 37 މިލިއަން ރުފިޔާ ޚަރަދުކޮށްފައިވާކަން މިނިސްޓަރ ހާމަކޮށްފައިވެއެވެ.
އެމްޑަބްލިޔުއެސްސީ އާއި ހަވާލުކޮށްގެން ކުރިއަށްގެންދާ އެ ޕްރޮޖެކްޓްގެ މަސައްކަތުގެ ބޮޑު ބައެއް ނިންމާލައިފައިވާއިރު، އެ ލިޔުމުގައިވާގޮތުން މިހާރު ކުރިއަށްދަނީ މި އަހަރުގެ ޖޫން މަހުގައި ފެށި މަސައްކަތްތަށް އެކަނިއެވެ. އަދި އެ ޕްރޮޖެކްޓްގެ ދަށުން 15 ޕަންޕް އިންސްޓޯލް ކުރެވިފައިވެއެވެ.
Details of storm water drainage projects carried out in Male since 2014. pic.twitter.com/7QhXjY6dgQ
— Dr.Mohamed Muizzu (@MMuizzu) October 30, 2018
މީގެކުރިން ހައުސިން މިނިސްޓަރ ވަނީ މާލޭގެ މަގުތަކުގައި ފެން ބޮޑުވިި ހަނދާންވެސް ނެތްކަމަށް ވިދާޅުވެ ވާހަކަފުޅުވެސް ދައްކަވާފައެވެ. މިނިސްޓަރުގެ އެ ވާހަކަފުޅާ ގުޅިގެން ގިނަ ބައެއްގެ ފާޑުކިޔުން އޭރުވެސް އަމާޒުވިއިރު، އެމްޑަބްލިޔުއެސްސީ އިންވެސް 2015 ވަނަ އަހަރު އަދި 2016 ވަނަ އަހަރުވެސް ބުނެފައިވަނީ މަސް ދުވަހުގެ ތެރޭގައި ފެން ބޮޑުވުމުގެ މައްސަލައަށް ހައްލެއް ލިބޭނެ ކަމަށެވެ. އެގޮތުން އެންމެ ގިނަވެގެން 45 މިނެޓްގެ ތެރޭގައި ފެން ހިނދޭނެކަމަށް އެ ކުންފުނިން އޭރުގައި ބުނެފައިވެއެވެ.
ފެން ހިންދުމުގެ ނިޒާމަށް 37 މިލިއަން ރުފިޔާ ޚަރަދުކުރިކަމަށް މިނިސްޓަރު ފާހަގަކުރެއްވިއިރު، މާލެއަށް ބޯކޮށް ވާރޭވެހުމާއެކުގައި މަގުތަކުގައި މީހާރުވެސް ފެން ބޮޑުވާއިރު، ވޭތުވެދިޔަ ދެ ދުވަހު އެކަނިވެސް ބައެއް މަގުތަކުގައި ވަނީ ކަކޫތާފެނަށް ފެން ހެދިފައެވެ.
