ސްޓޯމް ވޯޓަރ ސިސްޓަމުގެ ގިނަ ޕަމްޕް ސްޓޭޝަންތައް ހަލާކުވެފައިވާ ކަމަށް ހައުސިންގ މިނިސްޓަރ ޑރ. މުހައްމަދު މުއިއްޒު ވިދާޅުވެއްޖެއެވެ.
މާލެއަށް ބޯކޮށް ވާރޭވެހި މަގުތަކުގައި ފެންބޮޑުވެފައިވާ އިރު، ހައުސިންގ މިނިސްޓަރ މުއިއްޒު ވިދާޅުވީ، މާލޭގެ ސްޓޯމްވޯޓަރ ސިސްޓަމްގެ ގިނަ ޕަމްޕު ސްޓޭޝަންތަކުގެ ޕެނަލް ބޯޑްތަކަށް ގެއްލުންދީ، ހަލާކުކޮށްލާފައިވާ ކަމަށާއި އަދި ބައެއް ޕަމްޕު ސްޓޭޝަންތަކުގެ ކަރަންޓު ސަޕްލައި ކަނޑާލާފައިވާ ކަމަށް މުއިއްޒު ވިދާޅުވިއެވެ.
މިކަން ކަން ކުރި ފަރާތްތަކުގެ ނާތަހުޒީބު އަމަލު މިނިސްޓަރު ވަނީ ކުށްވެރި ކުރައްވާފައެވެ. އަދި ރައްޔިތުންނަށް ދިމާވާ އުންދަގުލަށްޓަކައި މިނިސްޓަރު ވަނީ މައާފަށް އެދިވަޑައިގެންފައެވެ. ފެން ހިންދުމުގެ މަސައްކަތް އެމްއެންޑީއެފް އިން ދަނީ ކުރަމުނެންނެވެ.
Stormwater system ge gina pump stations thakuge panel board ah vanee gellundhee halaaku kollaafa. Adhi baeh pumpstation thakuge current supply vanee kandaalafa. Mikankan kuri faraaithakuge naathahuzeeb amalu kuvverikuran. Adhi rayyithunnah dhimaavaa undhagulah ma'aafah edhen.
— Dr.Mohamed Muizzu (@MMuizzu) October 30, 2018
މިނިސްޓަރ މިހެން ވިދާޅުވެފައިވާ އިރު މާލެއަށްފަތިހުން ފެށިގެން ތިން ގަޑިއިރުގެ ތެރޭގައި ވަނީ 48 މިލިލީޓަރުގެ ވާރޭ ވެހިފައެވެ.
މާލެއަށް ފެން ހިންދާ ނިޒާމެއް ގާއިމް ކުރުމަށްތަކައި ހަތަރު ފިޔަވައްސަކަށް ބަހާލައިގެން ފެން ހިންދާ ޕަމްޕު އިސްޓޯލު ކުރުމުގެ މަސައްކަތް ކޮށްފައިވަނީ މޯލްޑިވްސް ވޯޓަރ އެންޑް ސްވަރޭޖު ކޮމްޕެނީ (އެމްޑަބްލިއުއެސްސީ) އާ ހަވާލުކޮށްގެންނެވެ. އެގޮތުން ފުރަތަމަ ފިޔަވަހީގެ މަސައްކަތްތަކަށް 4 މިލިއަން ރުފިޔާ ޚަރަދު ކުރެވުނު އިރު ދެވަނަ ފިޔަވައްސަށް 13.7 މިލިއަން ރުފިޔާ ޚަރަދު ކުރެވުނެވެ.
މީގެ އިތުރުން ތިން ވަނަ ފިޔަވައްސަށް 5.4 މިލިއަން ރުފިޔާ އަދި ހަތަރު ވަނަ ފިޔަވައްސަށް 20.1 މިލިއަން ރުފިޔާ ހޭދަކުރެވުނެވެ. މުޅި ޖުމްލަ ފެން ހިންދުމުގެ ނިޒާމުގެ މަސައްކަތްތަކަށް 43.2 މިލިއަން ރުފިޔާ ވަނީ ޚަރަދު ކުރެވިފައެވެ.
