ނޮވެމްބަރު 15 ގައި އައްޑޫ އާއި ފުވައްމުލަކަށް ފްލައިމީގެ ދަތުރުތައް ފަށަނީ
މިހާރު ފްލައިމީން ދަތުރު ކުރަމުންދަނީ އދ.މާމިގިއްޔާއި ބ.ދަރަވަންދޫ އަށް އެކަނި
ފްލައިމީގެ މަތިންދާ ބޯޓެއް
އަންނަ ނޮވެމްބަރު މަހުގެ 15 ވަނަ ދުވަހުން ފެށިގެން އައްޑޫ ސިޓީ އާއި ފުވައްމުލަކު ސިޓީއަށް ވިލާ އެއާގެ ފްލައިމީގެ ދަރުތައް ފަށަން ތައްޔާރުވެއްޖެއެވެ.
މިހާރު ފްލައިމީން ދަތުރު ކުރަމުންދަނީ އދ.މާމިގިއްޔާއި ބ.ދަރަވަންދޫ އެއާޕޯޓަށް އެކަނި ނަމަވެސް ފުވައްމުލަކާއި އައްޑޫ އަށް ޝެޑިއުލް ދަތުރުތައް ފެށުމުގެ ގޮތުން ކަމާ ގުޅުންހުރި މުއައްސަސާތަކާއެކު އެކުންފުނިން މިހާރުވަނީ މަޝްވަރާތައް ކޮށްފައެެވެ. އެކުންފުނިން ދަތުރުތައް އަލުން ފެށުމަށް ވާން ޖެހޭ އެންމެ ފަހުގެ ތައްޔާރީތައްވެސް ވަމުން އަންނަކަމަށެވެ.
ވިލާ އެއާއިން އަންނަ މަހު ދަތުރުތައް ފެށުމަށް ތައްޔާރުވަމުން އަންނައިިރު، އެ ދަތުރުތައް ފެށުމަށްޓަކައި ގަން އެއާޕޯޓާއި ފުވައްމުލަކު އެއާޕޯޓަށް ގްރައުންޑް ސްޓާފުން ހޯދަންވެސް ވަނީ އިއުލާނުކޮށްފައެވެ.
2013 ވަނަ އަހަރުން ފެށިގެން 2015 ވަނަ އަހަރާ ހަމައަށް އެ އެއާލައިނުން ދެކުނަށްވެސް ދަތުރުތައް ކޮށްފައިވެއެވެ. އަދި ވޭތުވެދިޔަ އަހަރުގެ ތެރޭގައި ދެކުނަށް އަލުން ދަތުރުތައް ފަށަން މަސައްކަތް ކުރި ނަމަވެސް ސަރުކާރުގެ އެކިކަހަލަ ފިއްތުން ތަކައިހުރެ، އެކަން ވަނީ އެ އެއާލައިނަށް ކާމިޔާބު ވާގޮތް ނުވެފައެވެ.
