އެކިރަށްރަށުގެ މެޖިސްޓްރޭޓް ކޯޓު ތަކަށް 15 ފަނޑިޔާރަކު އައްޔަން ކުރައްވައިފިއެވެ.

ސުޕްރީމް ކޯޓުގައި ހޯމަ ދުވަހުގެރޭ ބޭއްވި ރަސްމިއްޔާތެއްގައި މެޖިސްޓްރޭޓުންގެ މަޤާމަށް އައްޔަން ކުރެއްވި ބޭފުޅުންނަށް ހުވާ ލައިދެއްވީ ސުޕްރީމް ކޯޓުގެ ފަނޑިޔާރު ޢަބްދުﷲ ދީދީއެވެ. އަދި މެޖިސްޓްރޭޓް ކަމުގެ ފަތްކޮޅު ހަވާލުކޮށް ދެއްވީ އުއްތަމަ ފަނޑިޔާރު ޑރ ޢަބްދުﷲ ދީދީއެވެ.

ޖުޑީޝަލް ސަރވިސް ކޮމިޝަންގެ ބައެއް މެމްބަރުންނާއި ބައެއް ކޯޓުތަކުގެ ފަނޑިޔާރުންވެސް ބައިވެރިވެވަޑައިގެންނެވި މިރަސްމިއްޔާތުގައި ޖުމްލަ  މެޖިސްޓްރޭޓަކު ވަނީ އައްޔަން ކުރައްވާފައެވެ.

އޭގެތެރޭގައި ހިމެނެނީ މެޖިސްޓްރޭޓް ކޯޓުގެ 7 މެޖިސްޓްރޭޓުންނާއި މެޖިސްޓްރޭޓް ކޯޓުގެ 8 އިސް މެޖިސްޓްރޭޓުންނެވެ.

ހުވާ ކުރައްވައި މަޤާމާ ހަވާލުވި 15 މެޖިސްޓްރޭޓުންގެ ތެރޭގައި ދެ އަންހެން މެޖިސްޓްރޭޓުންވެސް ހިމެނެއެވެ.

މިރަސްމިއްޔާތުގައި ޖުޑީޝަލް ސަރވިސް ކޮމިޝަނަށް ރައްޔިތުންގެ މަޖިލީހުން އައްޔަން ކުރައްވާފައިވާ މެމްބަރު އަދި އެކޮމިޝަންގެ ނައިބު ރައީސް އިބްރާހީމް ރިޒާ ވާހަކަ ދެއްކެވިއެވެ.

ރިޒާ ވިދާޅުވީ ރައްޔިތުންގެ އެނމެބޮޑު އެއް ކަންބޮޑުވުމަކީ މައްސަލަތައް ނިމުން ލަސްވުން ކަމަށާއި މައްސަލަތައް އަވަހަށް ނިންމާ އިންސާފް ޤާއިމްކޮށްދެއްވުމަށް މެޖިސްޓްރޭޓުންގެ ކިބައިން އެދޭ ކަމަށެވެ. އަދި ހުކުމް ކުރުމުގައި އަމިއްލަ އިލްމީ ޤާބިލްކަމާއި ތަޖްރިބާގެ އިތުރުން މަތީ ކޯޓުތަކުން ނިންމާފައިވާ ނިންމުންތަކަށް ބެއްލެވުމަށްވެސް ޖޭއެސްސީގެ ނައިބު ރައީސް ގޮވާލެއްވިއެވެ.