ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު ބްރިގޭޑިއަރ ޖެނެރަލް (ރޓޑ) އިބްރާހީމް މުހައްމަދުދީދީގެ މައްޗަށް ދައުލަތުން އުފުލާފައިވާ ޓެރެރިޒަމްގެ ދައުވާ ބާތިލްކޮށްފިއެވެ.
އެމްޑީޕީގެ ޕާލަމެންޓްރީ ގުރޫޕްގެ މެމްބަރު، ޖެނަރަލް ދީދީގެ މައްޗަށް މި ދައުވާ ކޮށްފައިވަނީ އެމްޑީޕީގެ ސަރުކާރުގައި ކްރިމިނަލް ކޯޓުގެ ކުރީގެ އިސް ގާޒީ އަބްދުﷲ މުހައްމަދު (އަބްދުﷲ ގާޒީ) ސިފައިންގެ ބެލުމުގެ ދަށަށް ގެންދިޔަ މައްސަލައިގައެވެ. ދީދީގެ މައްޗަށް އުފުލި ޓެރެރިޒަމްގެ ދައުވާ މިއަދު ބާތިލްކޮށްފައިވާއިރު، މި މައްސަލައަކީ މީގެ ކުރިން ދައުވާ ނުކުރަން ޕްރޮސެކިއުޓާ ޖެނަރަލް ނިންމާފައިވާ މައްސަލައެއް ކަމަށް ވެސް ވަނީ ވިދާޅުވެފައެވެ.
އެގޮތުން މީގެ ކުރިން އެ މައްސަލަ ކޯޓުގައި ހިނގަމުން ދަނިކޮށް ދައުވާ އަނބުރާ ގެންދިއުމަށް ފަހު ދައުވާ ނުކުރަން ނިންމައި ސިޓީއެއްގައި ފޮނުވާފައިވާ ކަމަށް އިބްރާހީމް ދީދީ ވިދާޅުވެއެވެ. ނަމަވެސް ފަހުން އެ މައްސަލައަކީ ކުރިއަށް ގެންދެވިދާނެ މައްސަލައެއް ކަމަށް ކްރިމިނަލް ކޯޓުން ވަނީ ކަނޑައަޅާފައެވެ.
އަބްދުﷲ ގާޒީ ސިފައިންގެ ބެލުމުގެ ދަށުގައި ބެހެއްޓި މައްސަލައިގައި އޭރުގެ ރައީސް މުހައްމަދު ނަޝީދާއި އޭރުގެ ޑިފެންސް މިނިސްޓަރު ތޮލްހަތު އިބްރާހިމް ކަލޭފާނުގެ މައްޗަށް އުފުލި ޓެރަރިޒަމްގެ ދައުވާއާ ގުޅިގެން އެ ބޭފުޅުނަށް ވަނީ ޖަލު ހުކުމް އައިސްފައެވެ. އަދި އަބްދުﷲ ގާޒީ އެކަހަރި ކުރި މައްސަލާގައި ކާނަލް ޒިޔާދާއި އޭރުގެ ޗީފް އޮފް ޑިފެންސް ފޯސް މޫސާ އަލީ ޖަލީލުގެ މައްޗަށް ވެސް ޓެރަރިޒަމްގެ ދައުވާ އުފުލިއެވެ. ނަމަވެސް ކްރިމިނަލް ކޯޓުން ހުކުމް ކުރީ އެ ބޭފުޅުންގެ މައްޗަށް ކުށް ސާބިތުނުވާ ކަމަށެވެ.
ރައްޔިތުންގެ މަޖިލިސްގެ އިމާރާތަށް ވަނުމަށް ފުލުހުން ހުރައަޅާފައިވަނިކޮށް އެތަނަށް ވެންނެވި ކަމަށް ބުނާ މައްސަލައެއްގައި ވެސް އިބްރާހީމް ދީދީގެ މައްޗަށް ވަނީ ދައުވާ އުފުލާފައެވެ. އެ މައްސަލާގައި އޭނާގެ އިތުރުން 11 މެމްބަރެއްގެ މައްޗަށް އުފުލާފައި ވަނީ ގާނޫނު ތަންފީޒުކުރާ މުވައްޒަފެއްގެ މަސައްކަތައް ހުރަސްއެޅުމުގެ ދައުވާއެވެ. އެ ދައުވަތައް ވެސް ވަނީ ބާތިލްކޮށްފައެވެ.
