ވަގަށް އެތެރެ ކޮށްފައިވާ ސިނގިރޭޓް ތަކެއް ހޯދަން ފަށައިފި
28 އޮކްޓޯބަރު 2018 | އާދީއްތަ 20:58ހޯދަމުން ދަނީ ރައިޑާ ބްރޭންޑްގެ ސިގިރޭޓު
ކަސްޓަމްސްއިން ހޯދަމުންދާ ސިނގިރޭޓްތައް
ވަގަށް އެތެރެކޮށްފައިވާ "ރައިޑާ" ބްރޭންޑް ސިގިރެޓުތަކެއް ހޯދައި އަތުލުމުގެ މަސައްކަތް ކުރަމުން އަންނަ ކަމަށް މޯލްޑިވްސް ކަސްޓަމްސް ސަރވިސްއިން އާދީއްތަ ދުވަހު ބުނެފި އެވެ.
ކަސްޓަމްސް އިން ނެރުނު ބަޔާނެއްގައި ވަނީ ރައިޑާ ބްރޭންޑްގެ ސިގިރޭޓު ގާނޫނާއި ގަވާއިދާ ހިލާފަށް އެތެރެކޮށްފައިވާ ކަމަށް ބެލެވޭ މައްސަލައެއް ބަލަމުން އަންނާތީ އެ ބްރޭންޑުގެ ސިގިރޭޓުގެ ވިޔަފާރި އެއްވެސް ފަރާތަކުން ކުރަމުން އަންނަ ނަމަ އެކަން އެންގުމަށް އެދޭކަމަށެވެ.
ކަސްޓަމްސްއިން ބުނީ އެ އެންގުމާ ހިލާފަށް މި ބްރޭންޑްގެ ސިގިރޭޓުގެ ވިޔަފާރީގެ މުއާމަލާތް ހިންގާ ފަރާތްތަކާމެދު ގާނޫނީ ފިޔަވަޅު އަޅާނެ ކަމަށެވެ.
ކަސްޓަމްސް އިން އާންމުކުރި ރައިޑާ ބްރޭންޑުގެ ސިގިރޭޓު ފޮށިތަކުގެ ފޮޓޯއިން އެނގޭ ގޮތުގައި އެ ތަކެތި އެތެރެކުރީ "އެކިއުޓް ޓްރޭޑިން ޕްރައިވެޓް ލިމިޓެޑް" ކިޔާ ކުންފުންޏަކުންނެވެ. އެ ފޮށިތަކުގެ ބޭރުގައި، ދުންފަތުން ލިބޭ ގެއްލުމުގެ އިންޒާރު ވެސް ދިވެހި ބަހުން ލިޔެފައި ހުއްޓެވެ.
ރާއްޖެއަށް ސިގިރޭޓު އެތެރެ ކުރެވެނީ އެކަމަށް ވަކި ހާއްސަ ހުއްދައެއް ނަގައިގެންނެވެ. އަދި ސިގިރޭޓު އެތެރެކުރުމަށް ކޯޓާ ވެސް ހޯދަން ޖެހެ އެވެ.
