އަބްދުއްރަހީމް ބޭނުންވިޔަސް މުސާރަ ބޮޑުކުރަން ނިހާނު ދެކޮޅު!
މެމްބަރުންގެ މުސާރަ 150000ރ އަށް ބޮޑުކުރަން ތާއީދެއް ނުކުރަން: ނިހާނު
ޕީޕީއެމް ޕީޖީ ލީޑަރު ނިހާނު (މ)ގައި، ޑެޕިއުޓީ ލީޑަރު ރިޔާޒު ރަޝީދު (ކ)، ޕީޕީއެމް ޕީޖީ މެމްބަރު އަދި ޕީޕީއެމްގެ ނައިބު ރައީސް އަބްދުއްރަހީމް (ވ)
ރައްޔިތުންގެ މަޖިލީހުގެ މެމްބަރުންގެ މުސާރަ ބޮޑު ކުރަން ހުށަހަޅުއްވާނެ ކަމަށް ޕީޕީއެމް ޕާލަމެންޓްރީ ގްރޫޕްގެ މެމްބަރު އަދި ޕީޕީއެމް ނައިބު ލީޑަރު އަބްދުއްރަހީމް އަބްދުﷲ ހުށަހަޅުއްވާނެ ކަމަށް ވިދާޅުވި ނަމަވެސް އެކަމަށް ތާއީދު ނުކުރައްވާނެ ކަމަށް ޕީޕީއެމް ޕާލިމެންޓްރީ ގްރޫޕްގެ ލީޑަރު އަހުމަދު ނިހާނު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މެމްބަރުންގެ މުސާރަ 150،000ރ އަށް ބޮޑު ކުރަން ހުށަހަޅުއްވާނެ ކަމަށް އަބްދުއްރަހީމް ވިދާޅުވެފައިވާތީ، އެކަމަށް ތާއީދު ކުރަންތޯ "ރާއްޖެއެމްވީ"އިން ނިހާނުއާ ސުވާލު ކުރުމުން އޭނާ ވިދާޅުވީ މެމްބަރުންގެ މުސާރަ ބޮޑު ކުރަން ބޭނުންނުވާ ކަމަށެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލަ ހުށަހަޅާފައިވާއިރު، ނިހާނު ވިދާޅުވީ އޭނާ މަސީހު އަށް ފުރިހަމައަށް އިތުބާރު ކުރައްވާ ކަމަށާއި، މަސީހު ކަންކަން ކުރައްވަމުންދަނީ ރަނގަޅަށް ކަމަށެވެ.
މަސީހުގެ އިތުބާރު ނެތްކަމުގެ މައްސަލަ އެންމެ ފަހުން މަޖިލީހަށް ހުށަހަޅާފައިވަނީ 51 މެމްބަރުންގެ ސޮޔާއެކު މިމަހުގެ 24 ވަނަ ދުވަހު އެވެ.
