ލަންކާގެ ކުރީގެ ރައީސް މަހިންދަ ރާޖަޕަކްސަ ބޮޑުވަޒީރުކަމުގެ ހުވާ ކުރެއްވީ ގާނޫނާ ޚިލާފަށް ކަމަށާއި އެކަމަކީ ރައީސް ސިރިސޭނާ ކުރެއްވި ގާނޫނު އަސާސީއާ ޚިލާފު ކަމެއް ކަމަށް އެ ގައުމުގެ ފިނޭންސް މިނިސްޓަރ މަންގަލަ ސަމަރަވީރާ ވިދާޅުވެއްޖެއެވެ.

ރާޖަޕަކްސަ ހުވާކުރެއްވުމާ ގުޅިގެން ސަމަރަވީރާ ވިދާޅުވީ ރާޖަޕަކްސާ އަށް ބޮޑުވަޒީރުކަން ދީފަ ވަނީ ގާނޫނާ ޚިލާފަށް ކަމަށާއި އެއީ  ޑިމޮކްރެސީއާ ޚިލާފު ބަޣާވާތެއް ކަމަށެވެ.

ލަންކާގެ ކުރީގެ ރައީސް މަހިންދަ ރާޖަޕަކްސަ ލަންކާގެ ބޮޑުވަޒީރު ކަމުގެ ހުވައި ކުރެއްވިޔަސް އަދި ވެރިކަމުގައި ދެމިހުރެ ވޭނެ ކަމެއް ކަށަވަރެއް ނުވެއެވެ. ލަންކާގެ ބޮޑުވަޒީރުކަމުގެ ހުވާ ރާޖަޕަކްސަ ކުރެއްވީ ގާނޫނު އަސާސީއާ ޚިލާފަށް ކަމަށް ބޮޑުވަޒީރުކަމުގައި ހުންނެވި ރަނިލް ވިކްރަމަސިންހަ ވެސް ވަނީ ވިދާޅުވެފައެވެ. ލަންކާގެ ގާނޫނު އޮންނަ ގޮތުން ޕާލަމެންޓުގެ މެޖޯރިޓީ ނެތި ބޮޑު ވަޒީރުގެ މަގާމުން ރަނިލް ވަކިނުކުރެވޭނެއެވެ،  ރާޖަޕަކްސާ އާއި ލަންކާގެ މިހާރުގެ ރައީސް ސިރިސޭނާގެ ޕާޓީ އެއްކޮށްލުމުން ލިބެނީ 95 ގޮނޑިއެވެ. ލަންކާގެ ޤާނޫނު ހަދާ މަޖިލީހުގައި މެޖޯރިޓީ ހޯދުމަށް 113 ގޮނޑި ބޭނުންވާނެއެވެ. 

ލަންކާގެ ބޮޑުވަޒީރުކަމުގައި 2015 ވަނަ އަހަރުން ފެށިގެން ހުންނެވީ ޔޫއެންޕީގެ ލީޑަރު ރަނިލް ވިކްރަމަސިންހައެވެ.