އެންޓި ޑިފެކްޝަން ޤާނޫނު އެއްކޮށް އުވާލުވުމަކީ މަޖިލީސް މެމްބަރުން ޓްރާންސްފަރ މާކެޓަށް ހުޅުވާލުން: ކުރީގެ އުއްތަމަ ފަނޑިޔާރު
26 އޮކްޓޯބަރު 2018 | ހުކުރު 18:10އެންޓި ޑެފެކްޝަން ޤާނޫނު އުވާލުމަށް ހުށަހެޅުއްވީ ރައްޔިތުންގެ މަޖިލީހުގެ ވިލުފުށި ދާއިރާގެ މެމްބަރު ރިޔާޒް ރަޝީދު
ކުރީގެ އުއްތަމަ ފަނޑިޔާރުު އަހުމަދު ފާއިޒް ހުސެއިން
އެންޓި ޑިފެކްޝަންގެ ޤާނޫނު އެއްކޮށް އުވާލުވުމަކީ މަޖިލީސް މެމްބަރުން ޓްރާންސްފަރ މާކެޓަށް ހުޅުވާލުން ކަމުގައި ކުރީގެ އުއްތަމަ ފަނޑިޔާރު އަހުމަދު ފާއިޒް ހުސެއިން ވިދާޅުވެއްޖެއެވެ.
ފާއިޒްގެ ފޭސްބުކް ޕޯސްޓެއްގައި ވިދާޅުވެފައިވަނީ އެންޓި ޑިފެކްޝަން ޤާނޫނުގައި ހުރި ޤާނޫނު އަސާސީއާ ހިލާފު މާއްދާތައް އުވާލިކަމުގައިވީ ނަމަވެސް އެ ޤާނޫނު އެއްކޮށް އުވާލުވުމަކީ މަޖިލީސް މެމްބަރުން ޓްރާންސްފަރ މާކެޓަށް ހުޅުވާލުން ކަމުގައެވެ. އަދި އެއީ ނުހައްޤުން މުއްސަނދި ކަމަށް ޖާގަ ދިނުން ކަމުގައި އޭނާ ވިދާޅުވިއެވެ.
ފާއިޒް މިހެން ވިދާޅުވެ ޕޯސްޓެއް ކުރައްވާފައިވާއިރު އެންޓި ޑިފެކްޝަން ގާނޫނެއް އޮތުމަށް ތާޢީދުކުރާކަން ބައެއް މެންބަރުން ވަނީ ހާމަކުރައްވާފައެވެ. އެގޮތުން އޭދަފުށި ދާއިރާގެ މެންބަރު އަހުމަދު ސަލީމް (ރެޑްވޭވް ސަލީމް) ވިދާޅުވީ އެފަދަ ގާނޫނެއް އޮންނަންޖެހޭ ކަމަށް ދެކެވަޑައިގަންނަވާ ކަމަށެވެ. އަދި ސަލީމް ވިދާޅުވީ އެންޓި ޑިފެކްޝަން ގާނޫނު އުވައިލުމުގެ ބަދަލުގައި އިސްލާހުތަކެއް ގެނެސްގެން އެ ގާނޫނު ވުޖޫދުގައި އޮންނަން ޖެހޭނެ ކަމަށެވެ.
ގަމު ދާއިރާގެ މެންބަރު ފައްޔާޒް އިސްމާއީލް ވިދާޅުވީ އެންޓި ޑިފެކްޝަން ގާނޫނެއް އޮތުން ރަނގަޅު ކަމަށެވެ. ނަމަވެސް އެންޓި ޑިފެކްޝަން ގާނޫނެއް ގެނެވޭނީ ގާނޫނު އަސާސީ ބަދަލުކޮށްގެން ކަމަށް ފައްޔާޒު ވިދާޅުވިއެވެ.
އެންޓި ޑިފެކްޝަން ޤާނޫނު އުވާލުމަށް ހުށަހެޅުއްވީ ޕީޕީއެމްގެ ޕާލިމެންޓްރީ ގުރޫޕްގެ ނައިބް ލީޑަރ ރިޔާޒް ރަޝީދު އެވެ.
ރައްޔިތުންގެ މަޖިލީހުގެ އެއްވެސް މެމްބަރަކު، އެ ބޭފުޅަކު އިންތިޚާބުވި ޕާޓީން ވަކިވެއްޖެނަމަ ނުވަތަ ވަކިކޮށްފިނަމަ ނުވަތަ އެހެން ޕާޓީއަކަށް ބަދަލުވެއްޖެނަމަ، މަޖިލީހުގެ މެމްބަރުކަމުން ވަކިވާ ގޮތަށް ހެދި އެންޓި ޑިފެކްޝަން ގާނޫނު ރައްޔިތުންގެ މަޖިލީހުން ފާސްކޮށްފައިވަނީ 13 މާރިޗު 2018 ގައެވެ. އަދި އެ ބިލް ރައީސުލްޖުމްހޫރިއްޔާ ތަސްދީގު ކުރައްވާފައިވަނީ 14 މާރިޗު 2018 ގައެވެ.
