އިދިކޮޅު ލީޑަރުން އެދިއްޖެ ނަމަ ރައީސް ނަޝީދު މިނިވަން ވާގޮތަށް ޤާނޫނު ބަދަލުކޮށްދޭނަން: ރައީސް ޔާމީން
ހުރިހާ ލީޑަރުން ވަކިވަކިން ސިޓީ ހުށަހެޅުއްވުމަށް ވިދާޅުވި
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް
ސަރުކާރާ ދެކޮޅަށް މިހާރު އެއްގަލަކަށް އަރާވަޑައިގެން ތިއްބެވި ހުރިހާ ސިޔާސީ ލީޑަރުން އެދިވަޑައިގެންފި ނަމަ، ރައީސް ނަޝީދު މިނިވަން ވާނޭ ގޮތަށް ޤާނޫނު ބަދަލުކޮށްދެއްވާނެ ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ވިދާޅުވެއްޖެއެވެ.
ވެރިކަންކުރާ ޕީޕީއެމުން ބުރާސްފަތި ދުވަހު "މަވެސް ޕީޕީއެމް" ގެ ނަމުގައި ބޭއްވި ހަރަކާތުގައި ވާހަކަ ދައްކަވަމުން ރައީސް ޔާމީން ވިދާޅުވީ، އިދިކޮޅު ފަރާތްތަކުން ރައީސް ނަޝިދާއި، ޝައިޚް އިމްރާނާއި، އެފަދަ ބަންދުތަކުގައި ތިއްބެވި އެހެނިހެން ބޭފުޅުން ދޫކޮށްލުމަށް ގޮވި ނަމަވެސް، އެކަން އެގޮތަށް ކުރުމުގެ ފުރުޞަތު ރައީސަށް ޤާނޫނުއަސާސީގައި ދީފައި ނުވާ ކަމަށެވެ. ނަމަވެސް، މިހާރު އެއްގަލަކަށް އަރާވަޑައިގެން ތިއްބެވި ހުރިހާ ސިޔާސީ ލީޑަރުން ވަކިވަކިން ރައީސް ނަޝީދު ދޫކޮށްދެއްވުމަށް މަގުފަހި ކުރުމަށް ޤާނޫނަށް ގެންނަން ޖެހޭ ބަދަލުތައް ގެނެސްދެއްވުން އެދި އެބޭފުޅެއްގެ ޕާޓީ، ނުވަތަ އަމިއްލަ ހައިސިއްޔަތުން ސިޓީއަކުން އެދިއްޖެ ނަމަ، އެ ބަދަލު ގެނެސްދެއްވާނެ ކަމަށް އެމަނިކުފާނު ވިދާޅުވިއެވެ.
އަޅުގަނޑުމެންނަށް ކުރެވޭނެ ކަމަކީ ރައީސް ނަޝީދު ވެސް މިނިވަން ވާން ކަމަށްވަންޏާ، އަޅުގަނޑަށް އިދިކޮޅުގަ ތިއްބެވި ހުރިހާ ލީޑަރުން ވަކިވަކިން ސިޓީ ފޮނުއްވާ. ރައީސް މައުމޫން ވެސް ފޮނުއްވައިދެއްވާ. އިމްރާނު ވެސް ފޮނުއްވައިދެއްވާ. ރައީސް ނަޝީދު ވެސް ފޮނުއްވައިދެއްވާ. އަދި ޤާސިމް އިބްރާހިމް ވެސް ވަކިން ސިޓީއެއް ފޮނުއްވައިދީ ޕާޓީން މިއީން ކޮންމެ ބޭފުޅަކު ސޮއިކުރައްވާފަ، ނޫނީ އެބޭފުޅެއްގެ ހައިސިއްޔަތުން ސޮއިކުރައްވާފަ. ތިމަންނަމެން ކޮންމެ މީހަކު ބޭނުމޭ ރައީސް ނަޝިދު މިނިވަންވާން. އަދި މިކަން ކުރަން ޤާނޫނަށް ގެންނަންޖެހޭ ބަދަލުތައް ގެނެސްދޭށޭ. އޭރަށް އަޅުގަނޑަށް އަޅުގަނޑުގެ ޕީޖީ ލީޑަރަށް ހުށަހަޅައިގެން މަޖިލިސްގެ ތެރޭގަ ކިހާވަރެއްގެ ރުހުމެއްތޯ މިޔަށް ހޯދޭނީ އަޅުގަނޑުމެންނަށް ބެލިދާނެ. އެހެންވީމަ މިމަގު ވެސް އެބައޮތް. އެހެންވީމަ މިމަގުން ހިންގަވަންވީ.
ރައީސް ވިދާޅުވީ ޤައުމުގައި އިސްލާހުކުރަން ހުރި ކަންކަން ހުރި ނަމަ އެކަން ކުރުމަށް ސިޔާސީ ޕާޓީތަކުގެ މަޝްވަރާއަށް މިހާރު ވެސް ހުޅުވާލަފައިވަ ކަމަށާއި، އެ ފުރުޞަތު މިހާރު ވެސް އޮތް ކަމަށެވެ. ނަމަވެސް ފުރަތަމަ ޝަރުތެއްގެ ގޮތުން ވަކި ބަޔަކު ބައިވެރިކޮށްގެން ނޫނީ މަޝްވަރާ ނުކުރަން ހުށަހެޅުމުން އެކަން ނުވާނެ ކަމަށް ރައީސް ވިދާޅުވިއެވެ.
ޕާޓީގެ ލީޑަރު. އޭގެ ތެރެއިން ބައެއް ލީޑަރުންނަކީ އަމިއްލައަށް ރާއްޖެއިން ބޭރަށް އަރުވާލެވިގެން ތިއްބެވިބޭފުޅުން. އެބޭފުޅުން ބޭނުންފުޅެއްނުވޭ ރާއްޖެއަށް ވަޑައިގަންނަވާކަށް. އަނެއްބައި ބޭފުޅުންނަކީ ކޮންމެސް ހުކުމެއް ތަންފީޒު ކުރަމުންދާ ބޭފުޅުން. އަޅުގަނޑުމެން ދިވެހި ދައުލަތަކުން ބޭނުމެއް ނުވާނެ ހުކުމް ތަންފީޒުވެގެންދާ މީހުންނާ ދޭތެރޭގަ މިކަހަލަ މުއާމަލާތްތަކެއް ކުރާކަށް. އެއަށްވުރެ އިތުބާރު ހުރި މީހުންނާ ދޭތެރޭ. ޓެރަރިސްޓުންނާ ނެގޯޝިއޭޓް ކުރާނީ ކޮންބައެއްތޯ؟ ނުކުރާނެ ދެއްތޯ؟
މީގެ އިތުރުން ރައީސް ޔަމީން ދެއްކެވި ވާހަކަފުޅުގައި އެމަނިކުފާނު ވަނީ ރައްޔިތުންގެ މަޖިލީހާއި ކައުންސިލްތަކުގެ އިންތިޚާބީ މަޤާމުތަކުގައި ތިބި ފަރާތްތަކުގެ އިތުބާރު އޮތްތޯ ބެލުމަށް ދައުރުގެ މެދުން ވޯޓެއް ނެގުމަށް ހިތްވަރުދެއްވާ ވާހަކަ ދައްކަވާފައެވެ. ރައްޔިތުންގެ މަޖިލީހާއި ލޯކަލް ކައުންސިލްތަކަށް އިންތިޚާބުވެވަޑައިގެންފައި ތިއްބެވި އިދިކޮޅު ފިކުރުގެ ފަރާތްތަކުގެ އިތުބާރު އޮތްތޯ ބެލުމަށް މިފަދަ ވޯޓެއް ނެގުމަށް ހިއްވަރުދެއްވާ ރައީސް ވާހަކަ ދެއްކެވީރު، ހައްޔަރަށް ވަޑައިގެންނެވުމުގެ ކުރިން ކުނޫޒު ޖަލްސާއެއްގައި ވާހަކަ ދައްކަވަމުން، ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވަނީ ރައީސް ޔާމީންގެ އިތުބާރު އޮތްތޯ ބެލުމަށް ރައްޔިތުންގެ ފެންނަ ނުފެންނަ ވޯޓެއް ނެގުމަށް ގޮވާލައްވާފައެވެ.
ބުރާސްފަތި ދުވަހުގެ ވާހަކަފުޅުގައި ރައީސް މިފަދަ ވާހަކަފުޅުތައް ދެއްކެވިއިރު، ކުރިއަށް އޮތް ލޯކަލް ކައުންސިލް އިންތިޚާބާ ގުޅޭ ގޮތުން ރައީސް ވިދާޅުވީ، ޕީޕީއެމުން ކުރިއަށް އޮތް އިންތިޚާބަށް ކުރަމުންދަނީ މީގެ ކުރިން ދުވަހަކު ވެސް ރާއްޖޭގައި ކޮށްފައި ނުވާވަރުގެ ފުޅާ، ރައްޔިތުންނާއި ގާތް ކެމްޕެއިނެއް ކަމަށެވެ.
