އަދީބު ގޭބަންދަށް ބަދަލުކޮށްދިނުމަށް ކަރެކްޝަންގެ މައްޗަށް އަމުރުކޮށްދިނުމަށް އެޗްއާރުސީއެމްގެ ކިބައިން އެދިއްޖެ
25 އޮކްޓޯބަރު 2018 | ބުރާސްފަތި 06:58އެޗްއާރުސީއެމްއަށް ސިޓީ ފޮނުވާފައި ވަނީ ބުރާސްފަތިދުވަހު
ކުރީގެ ނައިބު ރައީސް އަހުމަދު އަދީބު
ކުރީގެ ނާއިބު ރައީސް އަހުމަދު އަދީބުގެ ސިއްހީ ހާލަކޮޅު ހުރި ގޮތުން ގޭބަންދަށް ބަދަލުކޮށްދިނުމަށް ޑޮކްޓަރުން ލަފާދެއްވާފައި ވާތީ، ބަންދުގައި ބަހައްޓައިގެން މިހާރުން މިހާރަށް އެކަން ކުރުމަށް މޯލްޑިވްސް ކަރެކްޝަނަލް ސާވިސްގެ މައްޗަށް އަމުރު ނެރުމަށް އެދި ހިއުމަން ރައިޓްސް ކަމިޝަން އޮފް ދަ މޯލްޑިވްސް (އެޗްއާރުސީއެމް)ގެ ކިބައިން އަދީބުގެ އަނބިކަނބަލުން މަރިޔަމް ނަޝްވާ އެދިވަޑައިގެންވިއެވެ.
އެޗްއާރުސީއެމް އަށް ބުރާސްފަތިދުވަހު ނަޝްވާ ފޮނުއްވާފައިވާ ސިޓީގައި ވިދާޅުވެފައި ވަނީ އެންމެ ފަހުން ހަދާފައިވާ ސީޓީ ސްކޭނުން ދައްކާ ގޮތުން އެތެރެހަށީގައި އުފެދިފައިވާ ސިސްޓްތައް އިތުރުވެފައިވާ ކަމަށް ދައްކާ ކަމަށާއި ސިއްހީ ހާލަތު މާބޮޑަށް ގޯސްވެފައިވާތީ އަދީބު ގޭބަންދަށް ބަދަލުކޮށްދިނުމަށް ޑޮކްޓަރުން ލަފާ ދެއްވާފައިވާ ކަމަށެވެ.
ބޭސްފަރުވާގެ ކަންކަމަކީ ކޮންމެ އިންސާނަކަށް ވެސް ލިބިގެންވާ އަސާސީ ހައްގެއް ކަމަށް ވެފައި އެކަމުގައި ޖަލު ހުކުމެއްގައި ހުރި މީހެއް އިސްތިސްނާ ނުވާ ކަމަށް ނަޝްވާގެ ސިޓީގައި ފާހަގަކުރައްވާފައި ވެއެވެ.
އެންމެ ފަހުން އަދީބު ޑޮކްޓަރަށް ދައްކަން މާލެ ގެނެސްފައި ވަނީ މި މަހުގެ 10 ވަނަ ދުވަހުއެވެ. އެދުވަހު ހެދި ޓްސްޓުތަކުގެ ނަތީޖާތައް ލިބިފައިވާއިރު، އެ އަށް ބެލުމަށް ފަހު އަދީބު ގޭބަންދުގައި ބެހެއްޓުމަށް ޑޮކްޓަރ ލަފާ ދެއްވާފައިވާ ކަމަށް ނަޝްވާ ވިދާޅުވިއެވެ. ނަޝްވާ ވިދާޅުވީ އަދީބުގެ އެތެރެހަށީގައި އުފެދިފައިވާ ސިސްޓުތައް އިތުރުވެފައިވާ ކަމަށް ޑޮކްޓަރ ވިދާޅުވެފައިވާ ކަމަށެވެ. އަދި ޖަލުގެ ހާލަތު ހުންނަ ގޮތުން އެހާލަތުގައި އަދީބު ގެއަށް ބަދަލުކުރަންޖެހޭ ކަމަށް ޑޮކްޓަރ ވިދާޅުވެފައިވާ ކަމަށެވެ.
އެމްއެމްޕީއާރުސީގެ ކޮރަޕްޝަނާއި ރިޔާސީ ލޯންޗުކޮޅުގައި އެއްޗެއް ގޮއްވާލި ކަމަށް ބުނެ، އަދީބުގެ މައްޗަށް ދައުލަތުން ކުރި ތިން ދައުވާއެއް ސާބިތުވާ ކަމަށް ނިންމުމާ ގުޅިގެން އަދީބު ގެންދަވަނީ 33 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. މީގެ އިތުރުން ވެސް އެމްއެމްޕީއާރުސީގެ ހިޔާނާތުގެ ގިނަ މައްސަލަތަކެއްގައި އަދީބުގެ މައްޗަށް ދައުވާކޮށް، ޝަރީއަތްތައް ވެސް ދަނީ ހިންގަމުންނެވެ.
އަދީބު ޖަލަށްލީ ފަހުން ސިއްހީ ބޮޑެތި މައްސަލަތަކެއް ވަނީ ކުރިމަތިވެފައެވެ. އަދި ރާއްޖެއިން ބޭރުން ބޭސްފަރުވާ ކުރުމަށް ޑޮކްޓަރުން އަދީބަށް ލަފާ ދެއްވާފައިވާއިރު، ސަރުކާރުން ދަނީ އެކަމަށް ހުރަސް އަޅަމުންނެވެ. އަދީބުގެ ހަށިގަނޑުގައި ސިސްޓެއް އުފެދިފައިވާ ކަމަށާއި ނުރައްކާތެރި ބައްޔެއް ކަމަށްވާ ގްލޮކޮމާ އަދީބުގެ ލޮލަށް ޖެހިފައިވާ ކަމަށް އަދީބުގެ އާއިލާއިން ދަނީ ބުނަމުންނެވެ. ފަރުވާ ހޯދަން އަދީބު ރާއްޖެއިން ބޭރަށް ގެންދިއުމުގެ ހުއްދައަށް އެތައް ފަހަރެއްގެ މަތިން އެދުނެވެ. އެހެން ނަމަވެސް އެ ފުރުސަތު ލިބިފައެއް ނުވެއެވެ.
