އިންތިޚާބީ ރައީސް އިބުރާހިމް މުހައްމަދު ސޯލިހް ރިޔާސީ އިންތިޚާބުގައި ހޯއްދެވި ކާމިޔާބީ ފާހަގަކޮށް މަރުހަބާ ކިޔުމަށް މާފަންނު މެދު ދާއިރާއިން ބޮޑު ހަފްލާއެއް ބާއްވައިފިއެވެ.
ބުދަ ދުވަހުގެ ރޭ މުއިވެޔޮ މަގުގެ ބޮޑު ބައެއްގައި ބޭއްވި މި އުފާފާޅުކުރުމުގެ ހަފްލާގައި އިންތިޚާބީ ރައީސާ ސޯލިހް އާއި އިންތިޚާބީ ނައިބު ރައީސް ފައިސަލް ނަސީމްގެ އިތުރުން ޖުމްހޫރީ ޕާޓީގެ ލީޑަރު ގާސިމް އިބުރާހިމާއި، ދިއްގަރު ދާއިރާގެ މެންބަރު އަހުމަދު ފާރިސް މައުމޫނާއި، ރައްޔިތުންގެ މަޖިލީހުގެ ބައެއް މެންބަރުން ބައިވެރިވެވަޑައިގަތެެވެ.
ތަފާތު ކެއުންތަކާއި ބޮޑުބެރާއި ނެށުމުގެ އައިޓަމްތަކާއިއެކު ކުރިއަށް ގެންދިޔަ މި ހަފްލާގައިވެސް އިންތިޚާބީ ރައީސާއި ނައިބު ރައީސާއި އެކު ފޮޓޯނެގުމަށްޓަކައި ވަރަށް ގިނައަދަދެއްގެ އާއްމުން ޖަމާވިއެެވެ.
އިންތިޚާބުގައި ލިބުނު ބޮޑު ކާމިޔާބީ ރަމްޒުކޮށްދޭ ބޮޑު ކޭކެއްވެސް ކުޑަކުދިންނާއެކު މި ހަފްލާގައި އިންތިޚާބީ ރައީސް ސޯލިހް އާއި އިންތިޚާބީ ނައިބު ރައީސް ފައިސަލް ވަނީ ފަޅައިފައެވެ.
މިހާރުގެ ރައީސް އަބްދުﷲ ޔާމީނު ބަލިކޮށް، ބޮޑު ތަފާތަކުން އިންތިޚާބު ކާމިޔާބު ކުރުމާ ގުޅިގެން މާލޭގެ އެކި ސަރަހައްދުތަކުންނާއި ރަށްރަށުގައި އަންނަނީ އުފާފާޅުކުރުމުގެ ހަރަކާތްތައް ހިންގަމުންނެވެ. އޮފީސްތަކާއި ޖަމާއަތްތަކުން ގެންދަނީ އިންތިޚާބީ ރައީސް އާއި އިންތިޚާބ ނައިބު ރައީސް އަށް މަރުޚަބާ ކިޔަމުންނެވެ.
ގުޅިފައިވާ ޕާޓީތަކުން ރިޔާސީ އިންތިޚާބު ކާމިޔާބު ކުރުމާއި ގުޅިގެން މާލެއާއި އަތޮޅުތެރޭގައި ދަނީ އުފާފާޅުކުރުމުގެ ހަފްލާތައް ބާއްވަމުންނެވެ.
މިއިންތިޚާބު ސޯލިހާއި ފައިސަލް ކާމިޔާބު ކުރެއްވީ 134،705 ވޯޓުންނެވެ. ވޯޓުލީ މީހުންގެ 58.4 ޕަސެންޓް މީހުން އިބޫ އަށް ތާއީދުކޮށްފައި ވެއެވެ. އިންތިޚާބުގައި ނާކާމިޔާބުވެވަޑައިގެންނެވި ރައީސް ޔާމީނަށް ލިބިވަޑައިގެންނެވީ 96052 ވޯޓެވެ. އެއީ 41.6 ޕަސެންޓެވެ.
އިންތިޚާބު ބާތިލުކުރަން ރައީސް ޔާމީން ސުޕްރީމް ކޯޓަށް ހުށަހެޅި މައްސަލައިގައި ވެސް އެ މަނިކުފާނަށް ވަނީ ނާކާމިޔާބީ ލިބިވަޑައިގެންފަ އެވެ. އިންތިޚާބު ބާތިލުކުރަންޖެހޭ ވަރުގެ ހެއްކެއް ގަރީނާއެއް ހުށަހަޅުއްވާފައި ނުވާ ކަމަށް ފަނޑިޔާރުން ވަނީ ނިންމަވައިފަ އެވެ.
