ރައްޔިތުންގެ ނިންމުމާއިއެކު ތިއްބެވި ހުރިހާ އެންމެންނަށް ޝުކުރިއްޔާ: ޝަރީފް
21 އޮކްޓޯބަރު 2018 | އާދީއްތަ 10:55ޤާނޫނީ ޓީމުން ކުރި ފުރިހަމަ މަސައްކަތަށް ޝުކުރު ދެންނެވި
ނޫސްވެރިންގެ ބައްދަލުވުމުގައި އިލެކްޝަންސް ކޮމިޝަންގެ ރައީސް އަޙުމަދު ޝަރީފް ވާހަކަފުޅުދައްކަވަނީ
މި އަހަރު ބޭއްވި ރިޔާސީ އިންތިޚާބުގައި ރައްޔިތުން ނިންމި ނިންމުމާއި އެކު ސާބިތުވެ ތިބި ހުރިހާ ފަރާތްތަކަށް އިލެކްޝަންސް ކޮމިޝަންގެ ރައީސް އަޙުމަދު ޝަރީފް ޝުކުރު އަދާކުރައްވައިފިއެވެ.
ޝަރީފް މިފަދައިން ވިދާޅުވީ، ރިޔާސީ އިންތިޚާބުން ނާކާމިޔާބު ވެވަޑައިގަތް ރައީސް ޢަބްދުﷲ ޔާމީން ޢަބްދުލް ޤައްޔޫމްގެ ފަރާތުން އިންތިޚާބު ބާތިލް ކުރުމަށް އެދި ސުޕްރީމް ކޯޓަށް ހުށަހެޅި މައްސަލައިގައި، އިންތިޚާބު ބާޠިލް ކުރާނެ އެއްވެސް އަސާސެއް އަދި ހެއްކެތްވެސް ނެތް ކަމަށް ސުޕްރީމް ކޯޓުގެ ފަސް ފަނޑިޔާރުންގެ އިއްތިފާޤުން ނިންމެވުމާއި ގުޅިގެން ކުރެއްވި ޓްވީޓެއްގައެވެ.
ޝަރީފްގެ ޓުވީޓްގައި ވިދާޅުވީ، އިލެކްޝަންސް ކޮމިޝަންގެ ޤާނޫނީ ޓީމުން މި މައްސަލައިގައި ކުރީ ވަރަށް ފުރިހަމަ މަސައްކަތެއް ކަމަށާއި، އެ ޓީމަށް ޝުކުރު ދަންނަވާ ކަމަށެވެ. އަދި ހަމަ އެއާއި އެކު ޝަރީފް ވަނީ އިލެކްޝަންސް ކޮމިޝަންގެ މުވައްޒަފުންނަށްވެސް ޝުކުރު ދަންނަވާފައެވެ.
ސުޕްރީމް ކޯޓުން އިންތިޚާބު ބާޠިލް ކުރާނެ އަސާސެއް ނެތް ކަމަށާއި، އިންތިޚާބު އޮޅުވާލާފައިވާކަން ސާބިތުވާ ފަދަ ހެއްކެއް ނެތް ކަމަށް ޙުކުމް ކޮށްފައިވާއިރު، ރައީސް ޔާމީންގެ ފަރާތުން ސުޕްރީމް ކޯޓަށް ހުށަހެޅި މައްސަލައިގައި އިންތިޚާބު އޮޅުވާލުމަށް މަގުފަހިވާގޮތަށް އިލެކްޝަން ކޮމިޝަނުން ގިނަ ކަންތައްތަކެއްކޮށް، ބައެއް ކަންކަމުގައި އިހުމާލު ވެފައިވާ ކަމަށް ތުހުމަތު ކޮށްފައެވެ. ނަމަވެސް މިއިން އެއްވެސް ކަމެއް ސާބިތު ކުރެވޭނެ ފަދަ ވަރުގަދަ ހެއްކެއް ޝަރީއަތަށް ހުށަހެޅިފައެއް ނުވެއެވެ.
