އިސްރާއީލުން ގައްޒާއަށް ވައިގެ ހަމަލާ ދޭން ފަށައިފި

އިސްރާއީލުން ފަލަސްޠީނުގެ ގައްޒާއަށް ވައިގެ ހަމަލާ ދޭން ފަށައިފިއެވެ.

އިސްރާއީލުގެ އަސްކަރިއްޔާ އިން ބުނެފައިވަނީ މި ހަމަލާތަކަކީ އަންގާރަ ދުވަހުގެ ރޭ ފަތިހު ގައްޒާއިން އިސްރާއީލުގެ ދެކުނުގެ ޝަހަރެއް ކަމަށްވާ ބީރް ޝެވާއަށް ފޮނުވާލި ރޮކެޓު ހަމަލާއެއް އެ ޝަހަރުގެ ގެއަކަށް އަމާޒުވުމާ ގުޅިގެން އޭގެ ރައްދުގައި ދޭން ފެށި ހަމަލާތަކެއް ކަމަށެވެ. އަދި ހަމަލާ ދެމުންދަނީ ޓެރަރިސްޓުންގެ ޖަގަހަތަކަށް ކަމަށެވެ.

ގައްޒާގެ ރައްޔިތުންނާއި ހަވާލާދީ އަލްޖަޒީރާއިން ބުނެފައިވަނީ އިސްރާއީލުން ހަމަލާ ދިނީ ގައްޒާގެ ތިން ސަރަޙައްދަކަށް ކަމަށާއި، ނަމަވެސް އެ ހަމަލާތަކުގައި މީހަކަށް އަނިޔާ ވެފައި ނުވާ ކަމަށެވެ.

އިސްރާއީލުން ބުނީ ބީރް ޝެވާއަށް ދިން ހަމަލާއާ ގުޅިގެން ޝޮކްގައި ތިބި ހަތަރު މީހަކަށް ފަރުވާދެމުންދާ ކަމަށެވެ. އިސްރާއީލުން އިތުރަށް ބުނެފައި ވަނީ ޔަހޫދީ ދައުލަތުގެ ރައްޔިތުން ހިމާޔަތް ކުރުމަށްޓަކައި ކުރަންޖެހުނު ކޮންމެ ކަމެއް ވެސް ކުރާނެ ކަމަށެވެ.

އަންގާރަ ދުވަހުގެ ރޭ ފަތިހު ގައްޒާގެ ސަރަޙައްދުގެ ތެރެއިން އިސްރާއީލަށް ދިން ހަމަލާއަކީ ގިނަ ދުވަސްތަކަކަށް ފަހު އިސްރާއީލަށް ދިން ފުރަތަމަ ހަމަލާއެވެ. އަދި މިއީ 2014 ވަނަ އަހަރުގެ ފަހުން ގައްޒާގެ ތެރެއިން ދިން މިފަދަ ހަމަލާއެއް އިސްރާއީލުގެ ގެއަކަށް އަމާޒުވި ފުރަތަމަ ފަހަރެވެ.

ބީރް ޝެވާއަށް ދިން ރޮކެޓް ހަމަލާގެ އިތުރުން ގައްޒާއިން އިސްރާއީލުގެ ތެރެއަށް އިތުރު ހަމަލާއެއް ވެސް ފޮނުވާލާފައިވާއިރު، އެ ހަމަލާގައި އެއްވެސް މީހަކަށް އެއްވެސް ގެއްލުމެއް ލިބިފައެއް ނުވެއެވެ.

މި ހަމަލާތަކުގެ ޒިންމާ އެއްވެސް ފަރާތަކުން އަދި ނަގާފައި ނުވާއިރު، އިސްރާއިލުން ވަނީ މި ހަމަލާގެ ޒިންމާ ނަގަން ޖެހޭނީ ހަމާސް ޖަމާޢަތުން ކަމަށް ބުނެފައެވެ.

މި ހަމަލާ ދިން އިރު އިސްރާއީލުން ފަލަސްޠީނަށް އަޅާފައިވާ ދަތިކުރުމާއި ހިޞާރު ކުރުމުގެ ފިޔަވަޅުތަކުގެ ސަބަބުން ފަލަސްޠީނާއި އިސްރާއީލާއި ދެމެދު އުފެދިފައިވާ ހަމަނުޖެހުން ވަނީ އިތުރުވެފައެވެ. އަދި މާޗް މަހުން ފެށިގެން ފަލަސްޠީނު – އިސްރާއީލު ބޯޑަރު ސަރަޙައްދުގައި ފަލަސްޠީނުގެ ރައްޔިތުން މުޒާހަރާކުރަމުންދާއިރު ނިމިގެންދިޔަ ހަފްތާގެ މުޒާހަރާތަކުގައި 14000 ރައްޔިތުން ވަނީ ބައިވެރި ވެފައެވެ. އަދި އޭގެ ތެރެއިން 20 މީހަކު ބޯޑަރު ހުރަސްކުރަން މަސައްކަތް ކުރުމުން އިސްރާއީލު ސިފައިން ބަޑިޖަހައި، އޭގެ ތެރެއިން 7 މީހަކު ވަނީ މަރާލާފައެވެ.

ގައްޒާއިން އަންގާރަ ދުވަހުގެ ރޭ ފަތިހު ފޮނުވާލި ރޮކެޓް ހަމަލާއާ ގުޅިގެން 4 މީހަކު ހޮސްޕިޓަލަށް ގެންގޮސް "ސިހުމަށް" ފަރުވާ ދެމުންދާއިރު، މާޗް މަހުން ފެށިގެން އިސްރާއީލު ސިފައިން ބަޑިޖަހައި ފަލަސްޠީނުގެ 205 މީހަކު ވަނީ މަރާލާފައެވެ.