ވޯޓު އޮޅުވާލި ގޮތެއް ޕީޕީއެމްގެ ސަޕޯޓަރުންނަށް ވެސް ބުނެ ނުދެވުނު

ރިޔާސީ އިންތިހާބު ބާތިލު ކުރުމަށް ސުޕްރީމް ކޯޓަށް ހުށަހަޅާފައިވާ މައްސަލައާ ގުޅިގެން، އެ ކޯޓުގެ ކައިރިއަށް އެއްވެ، އަޑުއުފުލި ޕީޕީއެމްގެ ސަޕޯޓަރުންނަށް ވެސް ވޯޓު އޮޅުވާލި ގޮތް ކިޔައި ނުދެވި، "ބޭޒާރު ވެއްޖެ"އެވެ.

އިންތިހާބާ ގުޅޭ އެންމެ ފަހު އަޑުއެހުން ސުޕްރީމް ކޯޓުގައި އަންގާރަ ދުވަހު ކުރިއަށް ދިޔަ ވަގުތު ޕީޕީއެމްގެ ސަޕޯޓަރުންތަކެއް ވަނީ އެ ސަރަހައްދަށް ގޮސް، އިންތިހާބު ގަޑުބަޑު ކޮށްލާފައިވާ ކަމަށް ބުނެ އަޑުއުފުލާއެވެ. އަދި އިލެކްޝަންސް ކޮމިޝަންގެ ރައީސް އަހުމަދު ޝަރީފުގެ އިސްތިއުފާ އަށް ގޮވައި، އަލުން އިންތިހާބެއް ބޭއްވުމަށް ޕީޕީއެމުން ބަޔަކު ވަނީ އަޑުއުފުލާފައެވެ.

ގުޅިފައިވާ ޕާޓީތަކުގެ ސަޕޯޓަރުން ވެސް ޖަމާވެފައި ތިބި ތަނުގައި، ތިބެގެން އަޑުއުފުލި ޕީޕީއެމްގެ ސަޕޯޓަރުންނާ، ރާއްޖެޓީވީގެ "ރައްޔިތުންގެ ހުކުމް"ގެ ކަވަރޭޖުގެ ތެރެއިން ވަނީ ސުވާލުކޮށްފައެވެ. ވޯޓު އޮޅުވާލީ ކިހިނެއްތޯ ރާއްޖެޓީވީން އެ މީހުންނަށް ސުވާލު ކުރުމުން ޖަވާބު ދިނުމަށް ވަނީ ފަސްޖެހިފައެވެ.

"ވޯޓު އޮޅުވާލީ އެތަނުގައި ތިބި އިލެކްޝަންސްގެ އޮފިޝަލުންނޭ... އަޅުގަނޑުމެންގެ މީހުންނެއް ނުތިބޭނެ އެތާކު [ވޯޓުލާ މަރުކަޒުތަކުގައި]. އަޅުގަނޑުމެންގެ މީހުން ލައްވާ އެގްރިމެންޓުގައި ސޮއެއް ނުކުރޭ. އަޅުގަނޑުމެންގެ މީހުންނަކަށް ފާހެއް ނުދޭ. އެ މީހުން ބޭނުން ބަޔަކަށް ބޭނުން ކަމެއް ކުރީ. ހަގީގަތް އެނގޭތީ މިބުނީ. ދެން އިތުރަކަށް އެއްޗެއް ބުނާކަށް އަޅުގަނޑު ބޭނުމެއް ނޫން. އަޅުގަނޑުމެންގެ ކުރިމަތީގައި ވަނީ މަކަރު ހަދާފަ،" ސުޕްރީމް ކޯޓު ކައިރި އަށް އެއްވެފައި ތިބި ޕީޕީއެމްގެ ސަޕޯޓަރުންގެ ތެރެއިން އަންހެނަކާ ސުވާލުކޮށްލުމުން ބުންޏެވެ. ވޯޓު އޮޅުވާލި ގޮތް ކިޔައި ދިނުމަށް އޭނާއާ ތަކުރާރުކޮށް ސުވާލު ކުރުމުން ޖަވާބެއް ނުދިނެވެ.

ވޯޓު އޮޅުވާލި ކަމަށް ބުނެ، ރައީސް އަބްދުﷲ ޔާމީންގެ ފަރާތްޕުޅުން ސުޕްރީމް ކޯޓަށް ހުށަހެޅުއްވި މައްސަލާގައި ހިޔާލީ ވާހަކަތަކެއް ހިމެނޭ ކަމަށް ބުނަމުން ދަނިކޮށް، ޕީޕީއެމްގެ އެކްޓިވިސްޓުންނަށް ވެސް އެ ވާހަކަ ތަފްސީލު ނުކުރެވުމުން ގިނަ ބައެއްގެ ފާޑުކިޔުން އަނެއްކާ ވެސް ދަނީ އެކަމަށް އަމާޒުވަމުންނެވެ. އެގޮތުން އަސާސެއް ނެތް ކަންތައްތަކެއްގެ މައްޗަށް ބިނާކޮށް، ހިޔާލީ ވާހަކަތަކެއް ސުޕްރީމް ކޯޓަށް ހުށަހަޅައިގެން އުޅެނީ ރައީސް ޔާމީނަށް ބަލި ގަބޫލު ނުކުރެވިގެން ކަމަށް ބުނެ ދަނީ ފާޑުކިޔަމުންނެވެ.

ސުޕްރީމް ކޯޓުގެ ސަރަހައްދަށް ޖަމާވި ގުޅިފައިވާ ޕާޓީތަކުގެ ސަޕޯޓަރުންނާ ރާއްޖެޓީވީން ސުވާލު ކުރުމުން ބައެއް މީހުން ބުނެފައި ވަނީ ރައީސް ޔާމީން ހުށަހެޅުއްވި މައްސަލައަކީ ސުޕްރީމް ކޯޓުގައި ކުރިއަށް ގެންދެވޭނެ މައްސަލައެއް ނޫން ކަމަށެވެ. އަދި މިދިޔަ މަހުގެ 23 ވަނަ ދުވަހު ރައްޔިތުން ނުކުމެ، ވޯޓުލައިގެން ނެރުނު ނަތީޖާ ބާތިލު ކުރަންޖެހޭ ސަބަބެއް ނެތްކަމަށް އެ މީހުން ބުންޏެވެ.

"މިހާރު މިއޮތީ ވޯޓެއް ލައިގެން ވަރަށް ސާފުކޮށް ނިންމާފައި. ދުސްތޫރީ މައްސަލަ އެއް ގައި ޖިނާއީ ހެކި ހޯދާކަން ނުވެސް ޖެހޭ. މިކަމަކީ ކޯޓަށް ވެސް ދާންޖެހޭ ވަރު ކަމެއް ނޫން. މިއަށް ވުރެ ރަނގަޅު ވާނެ މިކަން ވެމްކޯއަށް ހުށަހެޅިޔަސް. އަހަރުމެން ދުލެއް ނުކުރާނަން. އަހަރުމެން ތިބޭނީ ބަންދުގައި. އަހަރުމެން ޖަލަށް ލިޔަސް މަރާލިޔަސް، މިތާކުން ނުދާނަން. ރައްޔިތުން ނުދާނެ މިތަނަކުން،" އެއްވުމުގެ ބައިވެރިންގެ ތެރޭގައި ހުރެ ރާއްޖެޓީވީއާ ވާހަކަ ދެއްކި ކ. މާފުށީ ގެސްޓްހައުސް ވިޔަފާރިވެރިޔާ މުހައްމަދު އާދިލް ވިދާޅުވިއެވެ.