'ނަމަސްތޭ އިންގްލެންޑް' އާއި 'ބަދާއީ ހޯ' ރިލީޒްކުރާ ދުވަސް އަވަސްކޮށްފި
މި ދެ ފިލްމް ރިލީޒްކުރުން އޮކްޓޯބަރު 18 އަށް ވަނީ އަވަސް ކޮށްފައި
\'ނަމަސްތޭ އިންގްލެންޑް\'ގެ ޕޯސްޓަރަކާއި \'ބަދާއީ ހޯ
ބޮލީވުޑްގެ ބޮޑު ދެ ފިލްމް ކަމަށްވާ "ނަމަސްތޭ އިންގްލެންޑް" އަދި "ބަދާއީ ހޯ" ރިލީޒްކުރާ ދުވަސް އަވަސް ކޮށްފިއެވެ.
މި ދެ ފިލްމް ރިލީޒް ކުރުން އޮކްޓޯބަރު 18 އަށް އަވަސް ކޮށްފައި މި ވަނީ ފޭނުންނަށް މިހާރު އިންޑިއާ ގައި ކުރިއަށްދާ ނަވްރާތުރީ ފެސްޓިވަލްގެ ފަހު ދުވަސް ކަމަށްވާ ދަސުހްރާ ދުވަހާއި ގުޅުވައިގެން ދޭ ހަދިޔާއެއްގެ ގޮތުގައެވެ.
"ނަމަސްތޭ އިންގްލެންޑް" ރިލީޒްކުރާ ތާރީޚް ބަދަލުވި ކަން އިއުލަން ކޮށްފއި ވަނީ އެފިލްމްގެ ލީޑް ރޯލުން ފެނިގެންދާ އަރުޖުން ކަޕޫރު ކޮށްފައިވާ ޓްވީޓެއްގައެވެ.
މީގެ އިތުރުން "ބަދާއި ހޯ" ގެ ތަރި އަޔުޝްމަން ކުރާނާ ވެސް ވަނީ އޭނާގެ ފިލްމް ރިލީޒްކުރާ ތާރީޚް ބަދަލުވި ޚަބަރު ޓްވިޓާ މެދުވެރިކޮށް ފޭނުންނަށް ދީފައެވެ.
މި ދެ ފިލްމް ވެސް ރިލީޒް ކުރުން އަވަސް ކުރަން ނިންމާފައި މި ވަނީ ދަސުހްރާ ސެލެބްރޭޝަން އާ ގުޅުވައިގެން ލިބޭ ދިގު ޗުއްޓީއާ ދިމާކޮށް ރިލީޒް ކުރުމަށް ފިލްމް އުފައްދާ ފަރާތްތަކުން ނިންމައިގެން ކަމަށް ޚަބަރުތައް ބުނެފައެވެ.
"ނަމަސްތޭ އިންގްލެންޑް" ގައި ފެނިގެން ދާނީ އަރުޖުން ކަޕޫރާއި ޕަރިނީތީ ޗޯޕްޅާއެވެ. މި ފިލްމްގެ މަންޒަރުތައް ނަގާފައި ވަނީ ޕަންޖާބް އަދި ލަންޑަންގައެވެ. ވިޕުލް އަމްރުތުލާލް ޝާހު ޑައިރެކްޓްކުރާ މި ފިލްމަކީ 2007 ވަނަ އަހަރު ރިލީޒް ކޮށްފައިވާ އަކްޝޭ ކުމަރާއި ކެޓްރީނާ ކައިފް ލީޑް ރޯލުން ފެނިގެން ގޮސްފައިވާ ފިލްމް "ނަމަސްތޭ ލަންޑަން" ގެ ސީކުއެލް އެކެވެ.
"ނަމަސްތޭ އިންގްލެންޑް" އަކީ އަރުޖުން އާއި ޕަރިނީތީ އެކުގައި ކުޅޭ ދެވަނަ ފިލްމެވެ. މި ދެތަރިން އެންމެ ފުރަތަމަ ކުޅެފައި ވަނީ މި ދެ ތަރިން ވެސް ބޮލީވުޑަށް ތަޢާރަފް ވެގެން ދިޔަ ފިލްމް "އިޝަގް ޒާދޭ" އެވެ.
"ބަދާއީ ހޯ" އަކީ ހެއްވާ މަޖާ ކަންތައްތަކެއް ދައްކުވައިދޭ ފިލްމެކެވެ. މި ފިލްމުގައި އަޔުޝްމަންއާ ފެނިގެން ދާނީ "ޑަންގަލް" އިން ފެނިގެންދިޔަ ސަނާޔާ މަލޯތްރާ އެވެ. މީގެ އިތުރުން ނީނާ ގުޕްތާ އާއި ސުރޭޚާ ސިކްރީ، ގަޖްރާޖް ރާއޯ އަދި ޝީބާ ޗައްދާ ފެނިގެންދާނެއެވެ. މި ފިލްމް ޑައިރެކްޓް ކޮށްފައި ވަނީ "ތޭވަރް" ގެ ޑައިރެކްޓަރ އަމިތް ޝަރްމާއެވެ.
