ރިޔާސި އިންތިޚާބު ބާތިލުކުރަން، އިންތިޚާބުން ނާކާމިޔާބުވެވަޑައިގެންނެވި ރައީސް އަބްދުﷲ ޔާމީން ހުށަހަޅުއްވާފައިވާ މައްސަލައިގައި ފަހު އަޑުއެހުމަށް ވަނުމަށް ސުޕްރީމް ކޯޓު ސަރަހައްދުގައި ހަދާފައިވާ ކިޔޫއަށް މިއަދު ހެނދުނު، ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފު އެރުއްވުމާއެކު އެ ސަރަހައްދު ހަލަބޮލިވެއްޖެ އެވެ.
މިއަދުގެ އަޑުއެހުމަށް ޕީޕީއެމްގެ ސަޕޯޓަރުން އިއްޔެ ހަވީރުން ފެށިގެން ވަނީ ކިޔޫ ހަދައިފަ އެވެ.
މަހުލޫފު ވިދާޅުވި ގޮތުގައި އޭނާ ކިޔޫއަށް އެރީ، ރެއިން ފެށިގެން ކިޔޫގައި އެހެން މީހަކު ބަހައްޓާފައި ހުރުމުން އެ ޖާގައަށް ކަމަށެވެ.
ނަމަވެސް ޝަރީއަތުގެ އަޑުއެހުމަށް ވަދެވަޑައިގަތުމުގެ ފުރުސަތެއް މަހްލޫފަށް ލިބިވަޑައެއް ނުގަތެވެ.
ޝަރީއަތް އަޑުއެހުމަށް ވަނުމުގެ ފުރުސަތު ދެނީ އާންމުންގެ ގާތްގަނޑަކަށް 25 މީހުންނަށެވެ.
މިއަދު 10:00 ގައި ބާއްވާ އަޑުއެހުމުގައި އިންތިޚާބު ބާތިލުކުރަން ރައީސް ޔާމީންގެ ފަރާތްޕުޅުން ސިއްރު ހެކި ހުށަހެޅުމަށް ފުރުސަތު ދިނުމާމެދު ގޮތެއް ނިންމާނެ އެވެ.
ސުޕްރީމް ކޯޓް ސަރަހައްދުގައި އެސްއޯ ފުލުހުން ދަނީ ހަރަކާތްތެރި ވަމުންނެވެ.
