އެފްއޭއެމް އެސޯސިއޭޝަން ކަޕްގެ ފިރިހެން ޑިވިޝަނުގައި އާދިއްތަ ދުވަހުގެ ރޭ ކުޅުނު މެޗު ދިވެހި ސިފައިންގެ ކްލަބުން ފަސޭހަކަމާ އެކު ކާމިޔާބުކޮށްފިއެވެ.

މި މެޗުގައި ސިފައިންގެ ކުލަބު ނުކުތީ މަލްސަން ސްޕޯޓްސް ކްލަބާ ދެކޮޅަށެވެ. ސިފައިންގެ ކުލަބު މި މެޗު ކާމިޔާބުކުރީ ސީދާ ތިން ސެޓުންނެވެ.

ވޮލީގެ ގަދަބާރެއްގެ ގޮތުގައި ބެލިވިފައިވާ ސިފައިންގެ ކުލަބުން މި މެޗުގެ ފުރަތަމަ ސެޓު ގެންގޮސްފައި ވަނީ 25-20 އިންނެވެ.

މަލްސަން ސްޕޯޓްސްގެ ފަރާތުން އާދައިގެ ކުޅުމެއް ފެނިގެންދިޔަ ދެވަނަ ސެޓު ސިފައިންގެ ކުލަބުގެ ފަރާތުން ގެންދިޔައީ 25-17 އިންނެވެ.

ތިން ވަނަ ސެޓުގައި މަލްސަން ސްޕޯޓްސް ކުލަބުގެ ފަރާތުން ބައެއް ގޯސްތައް ހެދުމުގެ ފައިދާނަގައި ސިފައިންގެ ކުލަބު އެ ސެޓު ގެންދިޔައީ ފަސޭހަ ކަމާއެކު 14-25 އިންނެވެ.

މެޗުގެ މޮޅު ކުޅުންތެރިއަކަށް ހޮވުނީ ދިވެހި ސިފައިންގެ ކްލަބްގެ އަހުމަދު ސައީދު (ސޭންޑީ) އެވެ.

ވީއޭއެމް އެސޯސިއޭޝަން ކަޕުގެ ފިރިހެން ޑިވިޝަނުގެ ފުރަތަމަ މެޗުގައި ހޮނިހިރު ދުވަހުގެ ރޭ ފޯރިގަދަ ކުޅުމަކަށް ފަހު ޕޮލިސް ކްލަބުން ވަނީ ހުޅުމާލެ ސްޕޯޓްސް ކްލަބް 3-2 ސެޓުން ބަލިކޮށް ފެށުން ރަނގަޅުކޮށްފައެވެ.