ޖަމާލް ޚަޝޫގީ އިސްތަންބޫލްގައި ހުންނަ ސައުދީގެ ކޮންސިއުލޭޓް އޮފީހުގައި މަރާލާފައި ވާނަމަ ހަރުކަށި އަދަބެއް ދޭނަން: ޓްރަމްޕް

ގެއްލިގެން ހޯދަމުންދާ ނޫސްވެރިޔާ، ޖަމާލް ޚަޝޫޤީ އިސްތަންބޫލް ގައި ހުންނަ ސައުދީގެ ކޮންސިއުލޭޓް އޮފީހުގައި މަރާލާފައި ވާނަމަ, ސައޫދީ ސަރުކާރަށް ހަރުކަށި އަދަބެއް ދޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ސީބީއެސް އަށް ދެއްވި އިންޓަރވިއު އެއްގައި ޓްރަމްޕް ވިދާޅުވީ ޚަޝޫޤީގެ ކޭސް އަކީ ޚާއްސަ ކޭސް އެއް ކަމަށާއި، މި ކޭސް ޚާއްސަވެގެން ދަނީ އޭނާ އަކީ ނޫސްވެރިއަކަށް ވާތީ ކަމަށެވެ.

ޓްރަމްޕް މިހެން ވިދަޅުވެފައި ވަނީ ޚަޝޫޤީ އިސްތަންބޫލް ގައި ހުންނަ ސައޫދީ ކޮންސިއުލޭޓް އޮފީހުގައި އޭނާ މަރާލާފައިވާ ކަމުގެ ވީޑިޔޯ އާއި އޯޑިއޯ ހެކި ތުރުކީގެ އޮފިޝަލުންގެ އަތުގައި އެބަހުރި ކަމަށް ތުރުކީގެ އޮފިޝަލަކު ބީބީސީ ގައި ބުނެފައި ވަނިކޮށެވެ.

ޚަޝޫޤީ ގެއްލިފައިވާ މައްސަލަ ތަހްގީގް ކުރަމުންދާ ތަހްގީގީ ޓީމާއި ގާތް ފަރާތަކުން ބުނެފައި ވަނީ ތުރުކީގެ އިންޓެލިޖެންސްގެ އަތުގައި"ކިތާބީ ހެކި" އެބަ ހުރި ކަމަށެވެ. ނަމަވެސް ސައުދީ އަރަބިއްޔާގެ އިންޓީރިއަރ މިނިސްޓަރ ވަނީ އެ ތުހުމަތުތައް ދޮގު ކުރައްވާފަ އެވެ.

ސައުދީގެ ރަސްމީ ނޫސް އޭޖެންސީން ބުނެފައިވާ ގޮތުގައި ޕްރިންސް އަބްދުލް އަޒީޒް ބިން ސައުދު ބިން ނާއިފް ބިން އަބްދުލް އަޒީޒް ވަނީ ޚަޝޯގީ "މަރާލަން އަމުރުކުރި ކަމަށް ބުނާ ވާހަކައަކީ ދޮގެއް އަދި އަސާސެއް ނެތް ތުހުމަތުތަކެއް" ކަމަށް ވިދާޅުވެފައެވެ. އެންމެ ފަހުގެ ރިޕޯޓްތައް ބުނާގޮތުން މަރާލުމާއި އަނިޔާކުރުމުގެ ކަންކަން ހިނގާފައި ވަނީ ކޮންސިއުލޭޓްގެ ތެރޭގައެވެ.

ތުރުކީގެ ސަލާމަތީ ޚިދުމަތްތަކުގައި މަސައްކަތްކުރާ އޮފިޝަލަކު ވަނީ ވީޑިއޯ އާއި އޯޑިއޯ އޮތްކަން ބީބީސީ އަރަބިކް އަށް ކަށަވަރުކޮށްދީފަ އެވެ. ނަމަވެސް ސާފު ނުވާ ކަމަކީ ތުރުކީގެ އޮފިޝަލުން ނޫން ބަޔަކަށް އެ ފެނި ނުވަތަ އަޑުއިވިފައި ނުވާ ވާކަމެވެ.

ވޮޝިންގޓަން ޕޯސްޓުގައި ވާހަކަ ދައްކާފައިވާ މީހަކު ބުނެފައިވާ ގޮތުގައި ޚަޝޫޤީގެ ގައިގައި ތަޅާ އަޑު އިވެއެވެ. އަދި އޭނާ އިތުރަށް ބުނެފައިވާ ގޮތުގައި އެ ރެކޯޑިންގ އިން ދައްކާ ގޮތުގައި ޚަޝޫޤީ މަރާލުމަށް ފަހު ވަނީ ކޮށާލާފައެވެ.

ސައުދީ ސަރުކާރަށް ފާޑުކިޔާ ޚަޝޫޤީ އޮކްޓޯބަރު މަހުގެ 2 ވަނަ ދުވަހު ކޮންސިއުލޭޓް އިމާރާތަށް ވަން ފަހުން ފެނިފައެއް ނުވެއެވެ.