މެލޭޝިއާގެ ވެރިކަން ކުރާ ޕީޕަލްސް ޖަސްޓިސް ޕާޓީގެ ފައުންޑަރ އަދި އެ ގައުމުގެ ބޮޑުވަޒީރުގެ ނައިބު، އަޒީޒާ ވާން އިސްމާއިލްގެ ފިރިކަލުން އަންވަރު އިބްރާހިމް ގާނޫނު ހަދާ މަޖިލީހުގެ ގޮނޑި ކާމިޔާބު ކުރައްވައި، ބޮޑުވަޒީރުގެ މަގާމާއި ގާތަށް ޖެހިވަޑައިގެންފިއެވެ.

ހޮނިހިރު ދުވަހު ބޭއްވި ޕޯޓް ޑިކްސަން ސަރަޙައްދުގެ ބައި އިލެކްޝަންގައި ނަޒާރީ މުޚްތާރުގެ މައްޗަށް ކުރި ހޯއްދަވައި އަންވަރު އިންތިޚާބު ކާމިޔާބު ކުރެއްވީ 31،000 އަށް ވުރެ ގިނަ ވޯޓުންނެވެ. މުޚްތާރަށް ލިބިވަޑައިގަތީ 7456 ވޯޓެވެ. އަދި އިންތިޚާބުގައި ބައިވެރިވެވަޑައިގަތް އަމިއްލަ ކެންޑިޑޭޓް އީސާ ސަމަދަށް ލިބިވަޑައިގެންނެވީ ހަތަރު ހާހެއްހާ ވޯޓެވެ.

އަންވަރަށް ބައި އިލެކްޝަންގައި ބައިވެރިވެ ވަޑާއިގަންނަވަން ފުރުސަތު ލިބިވަޑައިގަތީ ޕޯޓް ޑިކްސަންގެ މެމްބަރު ކަމުގައި ހުންނެވި ދަންޔާލް ބަލަގޮޕާލް އަބްދުﷲ އިސްތިއުފާ ދެއްވުމުންނެވެ. އެ މެމްބަރު އިސްތިއުފާ ދެއްވީ ގާނޫނު ހަދާ މަޖްލީހަށް އަންވަރު އިންތިޚާބު ކުރުމަށެވެ. ބައި-އިލެކްޝަން ކާމިޔާބު ވުމާއެކު ގައުމުގެ އެންމެ މަތީ މަގާމަށް ވަޑައިގަތުމަށް އަންވަރަށް ވަނީ މަގު ތަނަވަސްވެފައެވެ. މެލޭޝިއާއަކީ ބަރުލަމާނީ ރަސްކަމެއް އޮންނަ ޤައުމެއް ކަމުން އެ ޤައުމުގެ ބޮޑުވަޒީރަށް ވެވެނީ ގާނޫނު ހަދާ މަޖްލީހުގެ މެމްބަރުންނަށެވެ.

ބޮޑު ވަޒީރު ކަމުގައި މިހާރު ހުންނެވި މަހާތިރު މުހައްމަދު ވިދާޅުވެފައި ވަނީ ދެ އަހަރެއްހާ ދުވަހު ވެރިކަން ކުރެއްވުމަށްފަހު އަންވަރަށް މަގާމު ހަވާލު ކުރައްވާނެ ކަމަށެވެ. އެއީ އެ ބޭފުޅާގެ ރިޔާސީ އެއް ވައުދެވެ. ބޮޑުވަޒީރު މަހާތީރުގެ އެދުމުގެ މަތިން މެއި 26 ވަނަ ދުވަހު އުމުރުން 71 އަހަރުގެ އަންވަރު ޖަލުން މިނިވަންވެވަޑައިގަތީ ރަސްގެފާނުގެ ޝާހީ މާފެއް ހޯއްދަވައިގެންނެވެ. އެހެންވެ ސިޔާސީ ދާއިރާގައި އުޅުއްވުމަށް އެމަނިކުފާނަށް ހުރަހެއް ނެތެވެ.

ވޭތުވިޔަ ދުވަސްތައް އަންވަރު ޖަލުގައި ހޭދަ ކުރައްވަން ޖެހިވަޑައިގަތީ އެމަނިކުފާނު ބަދުއަޚްލާގީ އަމަލެއް ހިންގެވިކަމަށް ސާބިތުވާ ކަމަށް، 2015 ވަނަ އަހަރުގެ ފެބްރުއަރީ މަހުގެ ތެރޭގައި ނިންމައި، ފަސް އަހަރަށް ޖަލަށް ލުމަށް ހުކުމް ކުރުމުންނެވެ. އެހެންނަމަވެސް އަންވަރު ވަނީ އެއީ ސިޔާސީ ގޮތުން ކުރި ދައުވާ އެއްކަމަށާއި އެއީ އެބޭފުޅާގެ "ދުވަސް ދުއްވާލަން" ކުރި ކަމެއް ކަމަށް ވިދާޅުވެފައެވެ.