އަޅުގަނޑެއް ނުފުރަން، ފުރަންވީ ސަބަބެއް ނެތް: އީސީ ޝަރީފް

އިލެކްޝަންސް ކަމިޝަންގެ ރައީސް އަހްމަދު ޝަރީފް ރާއްޖެއިން ބޭރަށް ފުރާވަޑައިގެންފައިވާ ކަމަށް ދެކެވޭ ވާހަކަތައް އޭނާ ދޮގުކުރައްވައިފިއެވެ.

ޝަރީފު ވިދާޅުވީ އޭނާ ފުރާވަޑައިގަންނަވަންޖެހޭ ސަބަބެއް ނެތް ކަމަށާއި އޭނާ ހުންނެވީ މާލޭގައި ކަމަށެވެ.

Advertisement

ޕީޕީއެމުން ސިލްސިލާކޮށް ބާއްވަމުންދާ މުޒާހަރާތަކުގެ ތެރެއިން ހުކުރު ދުވަހުގެ ރޭ ބޭއްވި މުޒާހަރާގައި ރައީސް އޮފީހުގެ ތަރުޖަމާނު އިބްރާހިމް މުއާޒު އަލީ ވިދާޅުވީ ޝަރީފު ފިއްލަވައި ވަޑައިގެންނުވާނެ ކަމަށާއި އޭނާ ޖަވާބުދާރީވެ ވަޑައިގަންނަވަން ޖެހޭކަމަށެވެ.

"ބަލަ ޝަރީފޫ. އަނެއްކާ މިކަލޭގެ ހުރީ އަޑު އިވޭ ހިސާބުގަ ބާ. ނޫންނަމަ މިއޮތް ނަލަ ސަޅި ބްރިޖް މަތިންލާފައި ފިލަން ދަނީބާ މިކަލޭގެ. މިކަހަލަ ވާހަކަތަކެއް ވެސް އިވޭ ތީއޭ ދަންނަވަން ޖެހުނީ. ނިކަން ވެލާނާ އިންޓަނޭޝަނަލް އެއާޕޯޓުގައި މި ވަގުތު ހުންނެވި ނަމަވެސް މިވާހަކަތަކަށް އެބަ ޖަވާބެއް ދެއްވަންޖެހޭ ނޫންތޯ. މިތަނަށް ޖަވާބުދާރީވެވަޑައި ނުގަނެވިއްޖިއްޔާ ޖަވާބުދާރީވެ ވަޑައިގަންނަވަންޖެހޭ ތަންތަން ވެސް އެބަ ހުއްޓެއް ނޫންތޯ. އެހެންވީމަ ޝަރީފު ވެސް އެއްގޮތަކަށްވެސް ފިއްލަވައި ވަޑައިގަންނަވައިގެން ނުވާނެ. ފިއްލަވައި ވަޑައިގަންނަވަން ހިތްޕުޅަށް އަރައިގެން ވެސް ނުވާނެ،" މުއާޒު ވިދާޅުވިއެވެ.

ޝަރީފު ޖަވާބުދާރީވުމަށް މުއާޒު ގޮވާލައްވާފައިވާއިރު މިދިޔަ މަހުގެ 23 ގައި ބޭއްވި ރިޔާސީ އިންތިޚާބު ބާތިލް ކުރުމަށް، އެ އިންތިޚާބު ބޮޑު ތަފާތަކުން ބަލިވެ ވަޑައިގެންނެވި ރައީސް ޔާމީންގެ ފަރާތްޕުޅުން ސުޕްރީމް ކޯޓަށް ވަނީ މައްސަލައެއް ހުށައަޅާފައެވެ. އެމައްސަލާގައި ހޮނިހިރު ދުވަހު(މާދަމާ) ޖަވާބުދާރީ ވުމަށް އިލެކްޝަންސް ކަމިޝަނަށް ވަނީ އަންގާފައެވެ. އެމައްސަލައިގެ ޝަރީޢަތް އަންނަ އާދީއްތަ ދުވަހު ފަށާނެއެވެ.

މިދިޔަ މަހު ބޭއްވި ރިޔާސީ އިންތިހާބުގެ ނަތީޖާ އިއުލާން ކުރުމަށްފަހު ކޮމިޝަންގެ މެމްބަރުންނަށް ލިބުނު މަރުގެ އިންޒާރުތަކާއި ގުޅިގެން ޝަރީފު ފިޔަވައި އެހެން މެމްބަރުން ވަނީ އަވަށްޓެރި ސްރީ ލަންކާއަށް ވަޑައިގެންފައެވެ.

ލަންކާގައި މި ވަގުތު ތިއްބެވީ އިލެކްޝަންޝް ކޮމިޝަންގެ ނައިބު ރައީސް އަމްޖަދު މުސްތަފާ އާއި މެމްބަރު އަހުމަދު އަކްރަމާއި އަލީ ނަޝާތުގެ އިތުރުން މެމްބަރު އިސްމާއިލް ހަބީބެވެ. މަރުގެ އިންޒާރުތަކާއި ގުޅިގެން އެމައްސަލަވަނީ ފުލުހުންނަށް ހުށަހަޅާފައެވެ.