މާތްﷲ ގެ ޢުޤޫބާތަކީ ދުނިޔެމަތީގައި އަތުވެދާނެ އެއްޗެއްކަން ޤަބޫލުކުރޭ: ޚުތުބާ
ޝައިތާނާގެ ބަހަށް ހެއްލި ރަނގަޅު މަގުން ކައްސާލައިގެން ނުވާނެ
ހުކުރު ނަމާދު ކުރަނީ
މާތްﷲ ގެ ޢުޤޫބާތަކީ ދުނިޔެމަތީގައި އަތުވެދާނެ އެއްޗެއްކަން ޤަބޫލުކުރަން ޖެހޭ ކަމަށް މިއަދުގެ ހުކުރު ޚުތުބާގައި ބުނެފިއެވެ.
ހުކުރު ޚުތުބާގައި ބުނެފައި ވަނީ ޝައިތާނާގެ ބަހަށް ހެއްލި ރަނގަޅު މަގުން ކައްސާލައިގެން ނުވާނެ ކަމަށާއި ހެޔޮ އެދޭ މީހުންނާއި ހެޔޮ ނޭދޭ މީހުން ދެނެގަންނަން ޖެހޭނެ ކަމަށެވެ. އަދި ދިވެހިރާއްޖެއަކީ ސައްތައިން ސައްތަ އިސްލާމީ ޤައުމެއްގެ ގޮތުގައި ދެމިއޮތަ ނުދިނުމަށްޓަކައި އިއްޔެ މަސައްކަތްކުރި ގޮތަށް މިއަދު ވެސް ބަޔަކު އެބަ މަސައްކަތް ކުރާ ކަމަށެވެ. މާތްﷲ ދެއްވި އިސްލާމްދީނުގެ ނޫރު ފަނޑުކޮށްލިޔަ ނުދިނުމަށް މަސައްކަތް ކުރަން މިއަދު ވެސް ޖެހިފައިވާ ކަމަށް ޚުތުބާގައި ފާހަގަކޮށްފައިވެއެވެ.
ވަތަނުގެ އަމްނާއި އަމާންކަމަކީ މާތްﷲ ދެއްވާފައިވާ ނިއުމަތެއް ކަމަށާއި ރާއްޖެއަށް ލިބެމުންދާ ކުރިއެރުމާއި ތަރައްޤީގެ އަސާސަކީ މިއަދު ޤައުމުގައި ފެތުރިފައިވާ އަމްނާ އަމާންކަން ކަމަށް ވެސް ޚުތުބާވެއެވެ. އަދި ޤައުމުގެ ކެރިފޯރުންތެރިކަން ހެޔޮ ގޮތުގައި ބޭނުން ކުރެވެމުން ދަނީ އަމާންކަމާއި ސުލްހަވެރިކަމުގެ ސަބަބުން ކަމަށް ވެސް ހުކުރު ޚުތުބާގައި ވަނީ ބުނެފައެވެ.
މީގެ އިތުރުން މާތްﷲ އަށް ޝުކުރު ކުރުމަކީ އިސްލާމީ ޝިއާރެއް ކަމަށާއި ޝުކުރުވެރިވުމަކީ އަޅުކަމެއް ކަމަށް ޚުތުބާގައި ވެއެވެ. ހަޤީޤަތުގައި ޝުކުރަކީ މާތްﷲ ގެ ފަޟްލުވަންތަ ކަމަށާއި ދީލަތިވަންތަ ކަމަށް ހިތުގެ އަޑިން އިއުތިރާފުވެ ދުލުން އެކަން ތަރުޖަމާކޮށް، ހަށިގަނޑުގެ އެންމެހާ ގުނަވަންތަކުން އެކަން ފާޅު ކުރުން ކަމަށް ޚުތުބާގައި ވެއެވެ. ހަށިގަނޑުގެ އެއްވެސް ގުނަވަނެއް މާތް ﷲ ރުހިވޮޑިނުގަންނަވާ ކަމެއް ކުރުމަށް ބޭނުން ނުކުރުމަށް ޚުތުބާގައި ވަނީ ގޮވާލާފައެވެ.
