ކުރީގެ އޮޑިޓަރ ޖެނެރަލް ނިޔާޒު މިއަދު ހަވީރު ރާއްޖެ ވަޑައިގަންނަވަނީ
12 އޮކްޓޯބަރު 2018 | ހުކުރު 05:17ނިޔާޒު ރާއްޖެ ވަޑައިގަންނަވާނީ މިއަދު ހަވީރު
ކުރީގެ އޮޑިޓަރ ޖެނެރަލް ނިޔާޒު އިބްރާހިމް
އަމިއްލަފުޅަށް އަރުވާލެއްވިގެން ދެ އަހަރު ވަންދެން ސްރީ ލަންކާގައި ދިރިއުޅުއްވުމަށް ފަހު މިއަދު ރާއްޖެ ވަޑައިގަންނަވާނެ ކަމަށް ކުރީގެ އޮޑިޓަރ ޖެނެރަލް ނިޔާޒު އިބްރާހިމް ވިދާޅުވެއްޖެއެވެ.
ނިޔާޒު ރާއްޖެއެމްވީ އަށް ވިދާޅުވީ މިއަދު ހަވީރު ރާއްޖެ ވަޑައިގަންނަވާނެ ކަމަށެވެ.
ސަރުކާރުގެ ޚިޔާނާތްތަކެއް ފަޅާއަރުވާލި އޮޑިޓް ރިޕޯޓެއް ނެރުމާ އެކު ޤާނޫނަށް ގެނައި އިސްލާހަކުން ނިޔާޒް ވަނީ މަގާމުން ވަކިކޮށްފައެވެ. މަޤާމުން ވަކިކުރި ފަހުން ވެސް ނިޔާޒު ގެންދަވަނީ ސަރުކާރުން ހިންގާފައިވާ ބައެއް ކަރަޕްޝަންތައް ރައްޔިތުންނަށް ހާމަކޮށްދެއްވަމުންނެވެ.
ސްރީ ލަންކާ އަށް ނިޔާޒް ދިރިއުޅުއްވުން ބަދަލު ކުރެއްވީ އެމްއެމްޕީއާރުސީގެ ބޮޑު ޚިޔާނަތް ފަޅާއަރުވާލައި، އަލްޖަޒީރާއިން އާއްމުކުރި ޑޮކިއުމެންޓްރީ އަށް މައުލޫމާތު ދެއްވުމުން ލިބިވަޑައިގަތް އިންޒާރުތަކާ ގުޅިގެން 2016 ވަނަ އަހަރުގެ ސެޕްޓެމްބަރު މަހުގެ 7 ވަނަ ދުވަހުއެވެ. އެދުވަހު ކުރިމަތިވި އުނދަގޫތަކާ އެކު އާއިލާ އެކު އެއާޕޯޓުން ލަންކާއަށް ފުރާވަޑައިގެންނެވުނީ "ހަމަ ކިރިޔާ" ކަމަށް ނިޔާޒު ވަނީ ވިދާޅުވެފައެވެ.
