ސައްހަ ނޫން ކޯޓު އަމުރެއް ނެރެ ރައީސް އަބުދުﷲ ޔާމީން ހައްޔަރުކޮށް ރަހީނު ކުރަން އުޅުނު ކަމަށް ބުނެ ޖަލު ހުކުމެއް އިއްވާފައިވާ އދ. މާމިގިލީ ކޯޓުގެ ކުރީގެ އިސް މެޖިސްޓްރޭޓް އަހުމަދު ނިހާން ކަފާލާތުގެ ދަށުން ދޫކޮށްލެވެން ނެތް ކަމަށް ހައިކޯޓުން އޭނާގެ ވަކީލުންނަށް އަންގައިފިއެވެ.

ރާއްޖެއެމްވީއަށް އެނގިފައިވާ ގޮތުގައި ނިހާން ދޫކޮށްލެވެން ނެތް ކަމަށް ބުނެ ހައިކޯޓުން ވަކީލުންނަށް އެގޮތަށް އަންގާފައި ވަނީ ބުދަ ދުވަހުގެ މެންދުރު ފަހުއެވެ. އަދި އޭނާ ދޫކޮށްލެވެން ނެތީ ޓެރަރިޒަމްގެ ހުކުމެއް ތަންފީޒު ކުރައްވަމުން ގެންދަވާތީ ކަމަށް ހައިކޯޓުން އަންގާފައި ވެއެވެ.

ޓެރަރިޒަމްގެ ކުށް ސާބިތުވެ 17 އަހަރުގެ ޖަލު ހުކުމް ތަންފީޒު ކުރަމުންދާ ނިހާންގެ ހުކުމް ބާތިލް ކުރުމަށް ނިހާންގެ ފަރާތުން ހައިކޯޓަށް ހުށަހަޅާފައިވާ މައްސަލައާ ގުޅިގެން ބުދަ ދުވަހުގެ ހެނދުނު ވަނީ އަޑުއެހުމެއް ބާއްވާފައެވެ. އެ އަޑުއެހުމުގައި ދައުލަތުން ވަނީ އެ މައްސަލާގައި ޖަވާބުދާރީވެފައެވެ. އަދި އެ މައްސަލައިގެ އިތުރު އަޑުއެހުމެއް އަންނަ ހަފްތާގެ ހޯމަ ދުވަހަށް ޝެޑިއުލް ކޮށްފައިވާ ކަމަށް ވަކީލުންނަށް ވަނީ އަންގާފައެވެ.

ރައީސް އަބްދުﷲ ޔާމީން ހައްޔަރު ކުރުމަށް އަމުރެއް ނެރުނު މައްސަލައާ ގުޅިގެން ނިހާނުގެ މައްޗަށް ހަތަރު ދައުވާއެއް އުފުލާފައި ވެއެވެ.

ނިހާނުގެ މައްޗަށް އުފުލާފައިވަނީ ވަކި އަސްލެއް އޮތް އެއްޗެއް ކަމުގައި ސައްހަ ނޫން ގޮތެއްގައި ދެއްކުމަށްޓަކައި ލިޔުމެއް އުފެއްދި ކަމުގެ ދައުވާ އާއި، ރަސްމީ ވާޖިބު އަދާކުރުމުގައި އެކަށީގެން ނުވާ އަމަލެއް ހިންގި ކަމުގެ ދައުވާ އާއި، ރަސްމީ ހައިސިއްޔަތު ނަހަމަ ގޮތުގައި ބޭނުން ކުރި ކަމުގެ ދައުވާ އާއި ޓެރަރިޒަމްގެ އަމަލެއް ހިންގަން އުޅުމާއި ބައިވެރިވުމުގެ ދައުވާއެވެ.

ނިހާނު 17 އަހަރަށް ޖަލަށް ލުމަށް ހުކުމް ކޮށްފައިވަނީ 2016 ވަނަ އަހަރުގެ ޖޫން 16 ވަނަ ދުވަހުއެވެ. އެ ހުކުމް ނިހާންގެ މައްޗަށް އިއްވާފައި ވަނީ އާ ޓެރަރިޒަމްގެ ގާނޫނުގެ ހަވަނަ މާއްދާގެ (ނ) އާ ހަވާލާދީއެވެ.