މާރިއާ، ޕީޕީއެމަށް: ގައުމު ހަލަބޮލި ކުރުމުގެ 'މޫޑެއް' ރައްޔިތުންގެ ނެތް!
10 އޮކްޓޯބަރު 2018 | ބުދަ 13:50އިންތިހާބުގެ ކުރިން ޝަކުވާއެއް އަދި މައްސަލައެއް ޕީޕީއެމުން ހުށަހަޅާފައެއް ނެތް
އިންތިހާބީ ރައީސް އިބްރާހީމް މުހައްމަދު ސޯލިހުގެ ތަރުޖަމާނު މާރިއާ އަހުމަދުދީދީ
ދިވެހި ރައްޔިތުންގެ މެދުގައި ފިތުނަ ފަސާދަ އުފެއްދުމަށް ސަރުކާރުން މަސައްކަތް ނުކުރުމަށާއި ގައުމުގެ ހަލަބޮލި ކުރުމުގެ "މޫޑެއް" ރައްޔިތުންގެ ނެތް ކަމަށް އިންތިހާބީ ރައީސް އިބްރާހީމް މުހައްމަދު ސޯލިހު (އިބޫ)ގެ ތަރުޖަމާނު މާރިއާ އަހުމަދުދީދީ ވިޑާޅުވެއްޖެއެވެ.
އިންތިހާބީ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މާރިއާ ވިދާޅުވީ ސަރުކާރުގެ އަމަލުތައް ހުރި ގޮތަށް ބިނާކޮށް ނިމިދިޔަ ރިޔާސީ އިންތިހާބުގައި ރައްޔިތުން އެވަނީ ވޯޓުން ގޮތެއް ނިންމާފަ ކަމަށާއި ރައްޔިތުން ނިކުމެ ސަރުކާރަށް ނޫނެކޭ ބުނީ ރައްޔިތުންގެ މެދުގައި ފިތުނަ ފަސާދަ އުފައްދަމުންދާތީ ކަމަށް މާރިއާ ވިދާޅުވިއެވެ.
"ފިތުނަ އުފައްދާތީ ރައްޔިތުން އެވަނީ ނޫނެކޭ ބުނެފައި. އެކަން ގަބޫލުފުޅު ނުކުރެއްވިގެން އެއުޅުއްވަނީ. އިތުރަށް ފިތުނަ އުފައްދައި، އެބޭފުޅުން އެކުރައްވާ ކަންކަމަކީ ވަރަށް ދެރަކަމެއް. އެބޭފުޅުންނަށް ހަމަ ނަސޭހަތްތެރިވަން ފިތުނަ އުފެދޭ ކަންކަން ނުކުރެއްވުމަށް،" މާރިއާ ވިދާޅުވިއެވެ.
މާރިއާ ވިދާޅުވީ ވެރިކަން ބަދަލުކުރުމުގެ މަރުހަލާގެ ކަންކަން ޑައިރެކްޓަރ ޖެނެރަލް އޮފް ޓްރާންސިޝަންގެ އޮފީހުން ކުރަމުންދާއިރު، މިހާރު ސަރުކާރުގެ ގިނަ އޮފިސްތަކަކުން އެއްބާރުލުން ލިބެމުންދާ ކަމަށެވެ.
މާރިއާ ވިދާޅުވީ ރައީސް ޔާމީނާއި ސަރުކާރު ހިންގާ ޕާޓީ ޕީޕީއެމުން ވެސް އިންތިހާބުގެ ނަތީޖާ ގަބޫލު ކުރުމަށް ފަހު، ވެރިކަން ބަދަލުކުރުމުގެ މަރުހަލާގެ ކަންކަން ވެސް ދައުލަތުގެ އިދާރާތަކާ އެކު ވަރަށް އަމާންކަމާއި އޮމާންކަމާ އެކު ކުރިއަށްދާ މިދަނޑިވަޅުގައި، އިންތިހާބާ ގުޅޭ މައްސަލައެއް ސުޕްރީމް ކޯޓަށް ހުށަހަޅައިގެން ގައުމު ހަމަބޮލި ކުރަން އުޅުނަސް އެކަމެއް ނުވާނެ ކަމަށެވެ.
"އެމައްސަލަ ސުޕްރީމް ކޯޓަށް ހުށަހެޅުއްވުމަށްފަހުވެސް ވިދާޅުވީ އެމައްސަލާގައި އެދުނު ގޮތެއް މިވަގުތު ހާމަކުރަން ބޭނުންނޫން ވާހަކަ. އިންތިހާބު ބާތިލު ކުރަން ބޭނުންނަމަ އެވާހަކަވެސް ވިދާޅުވާންވީ. އެކަމަކު އެހެނެއްވެސް ނޫން ވިދާޅުވީކީ، ދެން ތިމަންނާމެން އިންތިހާބާ ގުޅޭ މައްސަލައެއް ވައްދާލައިފީމޭ ކަހަލަ ގޮތަކަށް މިވިދާޅުވަނީ. މިފެންނަނީ ކޮންމެވެސް ގޮތަކުން ރަށުތެރެ ހަލަބޮލި ކުރުމަށްޓަކައި މަސައްކަތްތަކެއް ކުރެވެމުންދާކަން. އެނޫން އެހެން އެއްވެސް ކަމެއް ނޫން. ރައްޔިތުން ތިބީކީއެއް އެ މޫޑަކު ނޫން،" މާރިއާ ވިދާޅުވިއެވެ.
މާރިއާ ވިދާޅުވީ ރިޔާސީ އިންތިހާބު ބޭއްވި ދުވަހާ ހަމައަށް ގުޅިފައިވާ ސިޔުާސީ ޕާޓީތަކުން ވަރަށް ގިނަ ޝަކުވާތަކާއި ކަންބޮޑުވުންތައް އިލެކްޝަންސް ކޮމިޝަނަށް ހުށަހަޅަމުންދިޔަ ކަމަށެވެ. އަދި ރައްޔިތުންގެ ހުރި ގިނަ ކަންބޮޑުވުންތަކަށް އިލެކްޝަންސް ކޮމިޝަނުން ކޮންމެވެސް ވަރަކަށް ހައްލުތައް ގެންނަމުން ދިޔަ ކަމަށް މާރިއާ ވިދާޅު ވިއެވެ. ނަމަވެސް ސަރުކާރު ހިންގާ ޕީޕީއެމުން އެއްވެސް މައްސަލައެއް ޝަކުވާއެއް އިލެކްޝަންސް ކޮމިޝަނަށް ހުށަނާޅުއްވާ، ނަތީޖާ އިއުލާނު ކުރުމުން އަދި އޭގެ ހަފްތާއެއް ފަހުން އިންތިހާބުގައި ބޮޑެތި އޮޅުވާލުންތަކެއް ހުރިކަމަށް ބުނުމަކީ ކަންބޮޑުވާ ކަމެއް ކަމަށް ވެސް މާރިއާ ވިދާޅުވި އެވެ.
މާރިޔާ ވިދާޅުވީ ރައްޔިތުންގެ ނިންމުން ކޯޓުން ބަދަލުކުރާނެ ކަމަށް ގަބޫލުނުކުރައްވާ ކަމަށެވެ.
