ހުޅުމާލެ ފޭސް 2 އިން ދިރިއުޅުމަށް ދޫކުރާ ގޯއްޗަށް އެދި ހުށަހަޅާ ފޯމަށް ހަތް އިސްލާހެއް ގެނެސް އަލުން ގެޒެޓް ކޮށްފިއެވެ.

ހައުސިން މިނިސްޓްރީން ކުރިން އޮތީ ގޯއްޗަށް އެދި ކުރިމަތިލުމުގެ އެންމެ ފަހު މުއްދަތަކީ މި މަހުގެ 11 ވާ ބުރާސްފަތި ދުވަސް ކަމަށް ކަނޑައަޅާފައެވެ. އެހެން ނަމަވެސް އެންޓިކަރަޕްޝަން ކަމިޝަން (އޭސީސީ) އިން އެކަން މެދުކަނޑާލުމަށް އަންގައި ބައެއް ކަންކަން އިސްލާހުކުރުމަށް އެންގުމުން އެ މިނިސްޓްރީން ވަނީ މިމަހުގެ 14 ވާ އާދީއްތަ ދުވަހަކީ ފޯމުލާންޖެހޭ އެންމެ ފަހު ދުވަސް ކަމަށް ކަނޑައަޅާފައެވެ. 

ހައުސިން މިނިސްޓްރީން ގެނެސްފައިވާ 7 އިސްލާހަކީ :

1.  ފޯމު ހުށަހަޅާ ތާރީޚުގައި ކައިވެންޏެއް ކޮށްގެން އުޅޭ ފަރާތަކަށްވުން ނުވަތަ ފޯމު ހުށަހަޅާ ތާރީޚުގައި ވަރިވެފައިވާ ފަރާތެއް ނަމަ ފުލެޓަށް އެދޭ ފަރާތުގެ ދަރިއަކު ހުރުން ނުވަތަ އެއް ދަރިއަށް ވުރެ ގިނަ ދަރިން ބަލަމުންދާ ފަރާތަކަށް ވުން ނުވަތަ ފޯމު ހުށަހަޅާ ތާރީޚުގައި އަނބި/ފިރިމީހާ ނިޔާވެފައިވާ ފަރާތެއް ނަމަ ގޯއްޗަށް އެދޭ ފަރާތުގެ ދަރިއަކު ހުރުން ނުވަތަ އެއް ދަރިއަށް ވުރެ ގިނަ ދަރިން ބަލަމުންދާ ފަރާތަކަށްވުން

2. ކައިވެނީގެ ސެޓްފިކެޓުގެ ކޮޕީ (ވަރިވެފައިވާ ނަމަ ވަރީގެ ސެޓްފިކެޓުގެ ކޮޕީ، އަނބި/ފިރިމީހާ ނިޔާވެފައިވާނަ ނިޔާވިކަމުގެ ލިޔުން)

3.  މާލެއިން 600 އަކަފޫޓް ނުވަތަ އެ އަށް ވުރެ ބޮޑު ގޯއްޗެއް/ފުލެޓެއް/ރޯހައުސްއެއް ލިބިފައި ނުވުން އަދި އެކަކަށް ވުރެ ގިނަ މީހުންގެ ނަމުގައި ރަޖިސްޓްރީ ކުރެވިފައިވާ ގޯއްޗަކުން 600 އަކަފޫޓް ނުވަތަ އެ އަށް ވުރެ ބޮޑު ބައެއް ލިބިފައިނުވުން އަދި 600 އަކަފޫޓް ނުވަތަ އެ އަށް ވުރެ ބޮޑު ފުލެޓެއް ގަނެވިއްކުމުގެ އެއްބަސްވުމެއްގައި އެއްވެސް ފަރާތަކާ އެކު ސޮއިކޮށްފައިނުވުން

ފޯމާއި އެކު ހުށަހަޅަންޖެހޭ ލިޔުންތަކަށް ގެނެވުނު އިޞްލާޙް: ތިމާގެ އަމިއްލަ ނަމުގައި މާލޭގައި ގޯއްޗެއް/ފުލެޓެއް/ރޯހައުސްއެއް ލިބިފައިވާ ނަމަ އަދި/ނުވަތަ އެކަކަށް ވުރެ ގިނަ މީހުންގެ ނަމުގައި ރަޖިސްޓްރީކުރެވިފައިވާ މާލޭގެ ގޯއްޗެއް/ފުލެޓެއް/ރޯހައުސްއެއްގެ މިލްކުވެރިޔަކު ކަމުގައިވާ ނަމަ އެ އެތަނެއްގެ ރަޖިސްޓްރީ/މައްސަލަ ނިމުނު ގޮތުގެ ގަޒިއްޔާ/އެގްރީމެންޓްގެ ކޮޕީ 

4.  ތިމާގެ މަންމަ ނުވަތަ/އަދި ބައްޕައަށް މާލެއިން ގޯއްޗެއް/ފުލެޓެއް/ރޯހައުސްއެއް ލިބިފައިވާ ނަމަ އެތަނެއް މަންމަ/ބައްޕަގެ ދަރިންގެ މެދުގައި ބަހާލުމުން ތިމާއަށް ލިބޭ ބައި 600 އަކަފޫޓު ނުވަތަ އެ އަށް ވުރެ ބޮޑު ނުވުން

ފޯމާއި އެކު ހުށަހަޅަންޖެހޭ ލިޔުންތަކަށް ގެނެވުނު އިޞްލާޙް: ފޯމު ހުށަހަޅާ ފަރާތުގެ މަންމަ އަދި/ނުވަތަ ބައްޕައަށް މާލެއިން ގޯއްޗެއް ލިބިފައިވާ ނަމަ ގޯތީގެ ރަޖިސްޓްރީގެ ކޮޕީ ނުވަތަ މައްސަލަ ނިމުނު ގޮތުގެ ގަޒިއްޔާ ނުވަތަ ފޯމު ހުށަހަޅާ ފަރާތުގެ މަންމަ އަދި/ނުވަތަ ބައްޕައަށް މާލެއިން ފުލެޓެއް/ރޯހައުސްއެއް ލިބިފައިވާނަމަ އެތަނެއްގެ އެގްރީމެންޓް ނުވަތަ ރަޖިސްޓްރީގެ ކޮޕީ

5. ވިޔަފާރި އުސޫލުން ފުލެޓު ނުވަތަ ރޯހައުސް ވިއްކާ ފަރާތަކާ އެކު، ފުލެޓެއް ނުވަތަ ރޯހައުސްއެއް ގަތުމުގެ އެއްބަސްވުމެއްގައި ސޮއިކޮށްފައި ނުވުން، އުނިކުރެވިފައި

ހައުސިން މިނިސްޓްރީން ބުނީ ފޯމް ބަލައިގަންނާނީ 8 އޮކްޓޯބަރު 2018 ވާ ހޯމަ ދުވަހުން ފެށިގެން 14 އޮކްޓޯބަރު 2018 ވާ އާދީއްތަ ދުވަހުގެ ނިޔަލަށް، ކޮންމެ ދުވަހެއްގެ ހެނދުނު 09:00 އިން 14:00 އަދި 16:00 އިން 18:00 އަދި 20:00 އިން 23:00 އާއި ދެމެދު، މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރގެ ކައުންޓަރުން ކަމަށެވެ. ފޯމު ހުށަހަޅާ މުއްދަތަށް ނުވަތަ ގަޑިއަށް އެއްވެސް ބަދަލެއް ގެނެވޭ ނަމަ އެކަން އާންމުކޮށް އަންގާ އިއުލާން ކުރެވޭނެ ކަމަށް ވެސް ބުނެފައި ވެއެވެ. 

ފޯމުގައި ކަނޑައެޅިފައިވާ ހުރިހާ ޝަރުޠެއް ފުރިހަމަވާ ފަރާތްތަކަށް ޖުމްލަ 100 ޕޮއިންޓް ދެވި، ކަނޑައެޅިފައިވާ 400 ގޯއްޗަށް މީހުން ހޮވޭނީ، ޝަރުތު ހަމަވާ ފަރާތްތަކުގެ މެދުގައި ނެގޭ ގުރުއަތަކުން ކަމަށް ހައުސިން މިނިސްޓްރީން ބުނެއެވެ. ނޫސްވެރިންގެ ބައްދަލުވުމުގައި ހައުސިމް މިނިސްޓަރު ޑރ. މުހައްމަދު މުއިއްޒު ވިދާޅުވީ 400 މީހުންގެ އިތުރުން އިތުރު 100 މީހުން ގުރުއަތުން ނަގާނެ ކަމަށާއި ގުރުއަތުން ހޮވޭ 400 މީހުންގެ ތެރެއިން އެކި ސަބަބުތަކާ ހުރެ އުނިކުރެވޭ ފަރާތްތަކުގެ ބަދަލުގައި ގުރުނަގާ ތަރުތީބުން އެ 100 މީހުންގެ ތެރެއިން ފުރުސަތު ދެވިގެންދާނެ ކަމަށެވެ.