ޔާމީން ބަލިކުރުމުގައި އިދިކޮޅު ފަރާތްތަކަށް ރާއްޖެއިން ބޭރުގައި ތިބެގެން ކުރެވުނު މަސައްކަތް މުހިއްމު: ރައީސް ނަޝީދު

ރައީސް ޔާމީން މި އިންތިޚާބުގައި ބަލިކުރުމުގައި އިދިކޮޅު ފަރާތްތަކަށް ރާއްޖެ އިން ބޭރުގައި ތިބެގެން މަސައްކަތް ކުރަން ލިބުނު ފުރުސަތު މުހިއްމު ދައުރެއް އަދާކުރި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އިނގިރޭސިވިލާތުގެ ކުރީގެ ބޮޑުވަޒީރު ޑޭވިޑް ކެމަރަންއާ ބައްދަލުކުރެއްވުމަށް ފަހު، ކުރެއްވި ޓުވީޓެއްގައެވެ. އެ ޓްވީޓްގައި ރައީސް ނަޝީދު ވަނީ އެމަނިކުފާނަށް އިނގިރޭސިވިލާތުން ސިޔާސީ ހިމާޔަތް ހޯއްދަވައިދެއްވުމުގައި ކެމެރަން ކޮށްދެއްވި މަސައްކަތްޕުޅު ފާހަގަކުރައްވައި، ކެމަރަންއަށް ޝުކުރު އަދާކުރައްވާފައެވެ.

އަދި ސުލްހަވެރިކަމާ އެކު އިދިކޮޅު ފަރާތްތަކަށް ރާއްޖެއިން ބޭރުގައި ތިބެގެން ކުރެވުނު މަސައްކަތަކީ ރައީސް ޔާމީންގެ އަނިޔާވެރި ވެރިކަން ނިމުމަކަށް ގެނައުމަށް މުހިއްމުވި ކަމެއް ކަމަށް ރައީސް ނަޝީދު ވިދާޅުވިއެވެ.

އިނގިރޭސިވިލާތުގެ ކުރީގެ ބޮޑުވަޒީރު ޑޭވިޑް ކެމަރަންއަކީ ރައީސް ނަޝީދާ ގާތްގުޅުމެއް ބައްވަވާ ބޭފުޅެކެވެ. އަދި ކެމެރަން ނިސްބަތްވެވަޑައިގަންނަވާ ކޮންޒަވޭޓިވް ޕާޓީއަކީ ރައީސް ނަޝީދުގެ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އާ ގާތްގުޅުމެއް އޮންނަ ޕާޓީއެއް ވެސް މެއެވެ.

ރައީސް ޔާމީންގެ ސަރުކާރުގެ އަނިޔާވެރިކަމުން ސަލާމަތްވުމަށް ގިނަ އަދަދެއްގެ ސިޔާސީ ބޭފުޅުން ފާއިތުވި 3 އަހަރުތެރޭ އިނގިރޭސިވިލާތަށް ވަޑައިގެންނެވި އިރު، އޭގެ ތެރެއިން ގިނަ ބޭފުޅުންނަށް އެ ޤައުމުން ވަނީ ސިޔާސީ ޙިމާޔަތްދީފައެވެ. އަދި އެ ސިޔާސީ ޙިމާޔަތަކީ ސިޔާސީ ހަތިޔާރަކަށް ހަދައިގެން، ވެރިކަންކުރާ ޕީޕީއެމް އިން ވަނީ ރާއްޖޭއިން ބޭރުން ސިޔާސީ ޙިމާޔަތް ހޯދާފައިވާ މީހަކަށް ވެރިކަމަށް ވާދަނުކުރެއްވޭނެ ކަމަށް ޤާނޫނަށް ބަދަލު ގެނެސްފައެވެ.