ހަމްބަންތޯޓާ ބަނދަރު ޗައިނާގެ އަސްކަރީ ބޭސްއަކަށް ހަދާފާނެ: އެމެރިކާ
7 އޮކްޓޯބަރު 2018 | އާދީއްތަ 19:42ޗައިނާއިން ދަނީ ޤައުމުތަކުގެ ޚާރިޖީ ސިޔާސަތަށްވެސް ނުފޫޒު ފޯރުވަމުން
އެމެރިކާގެ ނައިބު ރައީސް މައިކް ޕެންސް (މ)
ދަރަނި އަދާނުކުރެވިގެން ސްރީލަންކާއިން ޗައިނާއަށް ވިއްކާލާފައިވާ ހަމްބަންތޯޓާ ބަނދަރު ޗައިނާގެ ކަނޑުގެ ސިފައިންގެ ބޭސްއަކަށް ހަދާފާނެކަމުގެ ބިރު އެބައޮތްކަމަށް އެމެރިކާގެ ނައިބު ރައީސް މައިކް ޕެންސް ވިދާޅުވެއްޖެއެވެ.
އެމެރިކާގެ ތިންކް ޓޭންކެއްކަމަށްވާ ހަޑްސަން އިންސްޓިޓިއުޓްގައި ވާހަކަ ދައްކަވަމުން ޕެންސް ވިދާޅުވީ ޗައިނާއިން ގެންގުޅެނީ 'ދަރަނީގެ ޑިޕްލޮމަސީ' ކަމަށެވެ. އަދި ލޯނުގެ ގޮތުގައި ޗައިނާއިން އޭޝިއާ، ޔޫރަޕް އަދި އެފްރިކާ ސަރަހައްދުގެ ޤައުމުތަކަށް އެތައް ބިލިއަން ޑޮލަރެއް ދެމުންދާއިރު، މި ލޯނުތަކުގެ ސަބަބުން އެޤައުމުތަކުގެ އިޤްތިޞާދު އިނދަޖެހިދާނެ ކަމުގެ ބިރު ވަނީ ހީވެފައެވެ. އަދި މި ލޯނުތަކުގެ ސަބަބުން ފައިދާވަމުން ދަނީ ބެއިޖިންގއަށް ކަމަށާއި، ލޯނު ލިބޭ ޤައުމަށް ލިބޭ ފައިދާއަށްވުރެ، ހުށަހެޅޭ ނުރައްކާ ބޮޑުކަމަށް ޕެންސް ވިދާޅުވިއެވެ.
ހަމްބަންތޯޓާގެ ވާހަކަ ޕެންސް ދެއްކެވީ ޗައިނާގެ މިދެންނެވި ދަރަނީގެ ޑިޕްލޮމަސީގެ ސިޔާސަތުގެ ވާހަކަ ދައްކަވަމުންނެވެ. އެގޮތުން ޗައިނާގެ ދަރަނީގެ ސަބަބުން ލިބޭ ގެއްލުން އެންމެ ބޮޑަށް އެނގޭނެ އެއް ޤައުމަކީ ސްރީލަންކާ ކަން، ޕެންސް ފާހަގަކުރެއްވިއެވެ. އަދި އެބަނދަރު ހޯދައި، އެތަނަކީ ޗައިނާގެ ކަނޑުގެ ލަޝްކަރުގެ ނުފޫޒު ފުޅާކުރުމުގެ ތެރެއިން ޗައިނާގެ ކަނޑުގެ ސިފައިންގެ މަރުކަޒެއް ޤާއިމްކުރާނެ ތަނެއްކަމަށް ވުމުގެ ބިރު އެބައޮތްކަމަށް ޕެންސް ފާހަގަކުރެއްވިއެވެ.
މީގެ އިތުރުން ޗައިނާއިން ލޯނުދީ، ޤައުމުތަކުގެ ސިޔާސަތުތަކަށް ނުފޫޒު ފޯރުވަމުންދާކަންވެސް ޕެންސް ފާހަގަކުރެއްވިއެވެ. އެގޮތުން މިހާރުވެސް ލެޓިން އެމެރިކާގެ 3 ޤައުމެއްގެ ޚާރިޖީ ސިޔާސަތަށް ނުފޫޒު ފޯރުވައި، އެޤައުމުތަކުން ޓައިވާނާއިއެކު އޮންނަ ގުޅުން ކަނޑުވާލުމުގެ އަޑީގައި އޮތީ ޗައިނާކަމަށް ނައިބު ރައީސް ޕެންސް ތުހުމަތުކުރެއްވިއެވެ.
