ދިވެހި ރައްޔިތުންގެ ނިންމުމަށް އިހުތިރާމް ކުރެއްވުމަށާއި، އިތުރަށް ރައްޔިތުންނަށް ފުރައްސާރަ ނުކުރެއްވުމަށް އިންތިހާބީ ރައީސް އިބްރާހީމް މުހައްމަދު ސޯލިހުގެ ތަރުޖަމާނު މާރިއާއަހުމަދުދީދީ ގޮވާލައްވައިފި އެވެ.
އިންތިހާބީ ރައީސް ސޯލިހުގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ތަރުޖަމާނު މާރިއާ އެގޮތަށް ގޮވާލެއްވީ ހުޅުމާލެ ފޭސް 2 އަކުން 400 ގޯތި ވިއްކުމަށް ނިންމާ އެކަން ހައުންސިންގ މިނިސްޓަރު ޑރ. މުހައްމަދު މުއިއްޒު އިއުލާނު ކުރުމާއި ގުޅިގެންނެވެ.
"ރިޔާސީ އިންތިހާބުގައި ރައްޔިތުން އެވަނީ ގޮތެއް ނިންމާފައި، ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހު އިންތިހާބު ކުރައްވާފަ އެވަނީ. ރައްޔިތުންގެ އެ ނިންމުމަށް ދެން އިތުރަށް ފުރައްސާރަ ނުކުރައްވާ. ދައުލަތުގެ މަގާމުތަކުގައި ތިއްބަވާ ބޭފުޅުންނަކީ ދާއިމީކޮށް ތިއްބަވާ ބޭފުޅުންނެއް ނޫން. މަގާމުތަކުގައި ތިއްބަވާ ބޭފުޅުން ބަދަލުވާނެ، އެހެން އޮންނަ ކަމެއްމިއީ. އެހެންވީމައި މިގޮތަށް ނުއަގުގައި އަދި ބަޔަކަށް ނާޖާއިޒު ފައިދާއެއް ހޯދައިދޭން ކުރާކަމެއްމިއީ، މިއަދަކު ނޫން އެބިން ހިއްކާފައިވަނީ، އިންތިގާލީ މަރުހަލާގައި މިފަދަ ކަންކަން ކުރުމަކީ ކޮށްގެންވާނެ ކަމެއްވެސް ނޫން،" މާރިއާ ވިދާޅުވި އެވެ.
ރައީސް އަބްދުﷲ ޔާމީންގެ ވެރިކަމުގެ ދައުރު ހަމަވުމަށް އެންމެ 41 ދުވަހަށް ވެފައިވަނިކޮށް، ހުޅުމާލެ ފޭސް 2 އިން 400 ގޯތި ދޫކުރަން ހައުސިން މިނިސްޓްރީން ނިންމި ނިންމާފައިވަނީ އާދިއްތަ ދުވަހު އެވެ.
އެކަން މިނިސްޓަރު މުއިއްޒު އިއުލާން ކުރެއްވުމާއެކު، އިންތިހާބީ ރައީސް އިބްރާހީމް މުހައްމަދު ސޯލިހުގެ ފަރާތްޕުޅުން ސަރުކާރު ބަދަލުކުރުމުގެ މަރުހަލާގެ އިޖުތިމާއީ ކޮމެޓީން، ކުރީގެ ހައިންސިންގ މިނިސްޓަރު މުހައްމަދު އަސްލަމް ހިމެނިވަޑާއިގަންނަވާ ގޮތަށް އެންޓި ކޮރަޕްޝަން ކޮމިޝަނަށް ވަޑައިގެން އެކަން ހުއްޓުވުމަށް ވަނީ އެދިވަޑައިގަންނަވާފަ އެވެ. އަދި އެންޓި ކޮރަޕްޝަން ކޮމިޝަނުން ވެސް ވަނީ، އެ މަޝްރޫއުގައި ގާނޫނީ ގޮތުން ސުވާލު އުފެދޭ ކަންތައްތަކެއް ހުރުމާއި ކޮރަޕްޝަނަށް މަގުފަހިވާ ކަންތައްތަކެއް ހުރުމުން، އެކޮމިޝަނުން ވަކި އެއްޗެއް އަންގަންދެން މަޑުޖައްސާލުމަށް ހައުންސިންގ މިނިސްޓްރީއަށް އަންގާފަ އެވެ.
ހައުސިން މިނިސްޓްރީން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރު މުއިއްޒު ވިދާޅުވީ މި މަޝްރޫއުގެ ދަށުން ދޫކުރާނީ 1000 އަކަފޫޓްގެ ގޯތި ކަމަށާއި، އަކަ ފޫޓެއް ވިއްކަނީ 400ރ. އަށް ކަމަށެވެ. މި ރޭޓުން ބަލާއިރު، ގޯއްޗެއްގެ ޖުމުލަ އަގަކީ 400،000 ރުފިޔާ ކަމަށެވެ.
