ރިޔާސީ އިންތިޚާބު ކާމިޔާބު ކުރެއްވި އިބްރާހިމް މުހައްމަދު ސޯލިހު އާއި ނައިބު ރައީސް ފައިސަލް ނަސީމަށް މަރުހަބާ ދެންނެވުމަށް ހުޅުމާލޭގައި ކުލަގަދަ ހަފަލާއެއް ބާއްވައިފިއެެވެ.
ބޮނޑިބަތާއި އެކު އޮތް މިމަރުހަބާގެ ހަފްލާ ކުރިއަށް ގެންގޮސްފައިވަނީ ހުޅުމާލޭ ގޭޓްވޭ އިންޓަނޭޝަނަލް ސްކޫލުގައެވެ. މި އިވެންޓްގައި ދެބޭފުޅުންނާއި އެކު އާއްމުންގެ އެތައް ސަތޭކަ ބަޔަކު ވަނީ ފޮޓޯ ނަގާފައެވެ.
ހުޅުމާލޭގައި ބޭއްވި މި ހަފްލާގައި، ޖުމްހޫރީ ޕާޓީގެ ބާނީ ގާސިމް އިބުރާހިމާއި އެޕާޓީގެ ރައީސް އަލީ ވަހީދައި ރައީސް މުހައްމަދު ނަޝީދުގެ އެޑްވައިޒަރު އަބުދުﷲ ޖާބިރުވެސް ބައިވެރިވެވަޑައިގަތެވެ.
ކޯލިޝަނުން އިންތިޚާބު ކާމިޔާބު ކުރުމާއި ގުޅިގެން މާލޭގެ އެކި ސަރަހައްދުތަކުގައި އަންނަނީ އުފާފާޅު ކުރުމުގެ ހަރަކާތްތައް ބާއްވަމުންނެވެ.
އެގޮތުން ބުރާސްފަތި ދުވަހުގެ ރޭ 9 ޖެހިއިރު "ބިޔަ ހެންވޭރުން" ނަމުގައި ދަރުބާރު ގޭގައި ވަނީ އުފާފާޅުކުރުމުގެ ހަރާކާތްތައް ކުރިއަށް ގެންގޮސްފައެވެ. މިހަރަކާތުގައި ވެސް 11:30 ވަންދެން އިންތިޚާބީ ރައީސް އިބްރާހީމް މުހައްމަދު ސޯލިހާއި އިންތިޚާބީ ނައިބު ރައީސް ފައިސަލް ނަސީމް ވަނީ ހަފްލާއަށް ހާޒިރުވި ފަރާތްތަކާއެކު ފޮޓޯ ނަންގަވާފައެވެ.މީގެ އިތުރުން ހުކުރު ދުވަހުގެރޭ ވިލިމާލޭގައިވެސް އުފާފާޅުކުރުމުގެ ހަފްލާއެއް ބޭއްވިއެވެ.
