ޗައިނާގެ ސަފީރު ޒަންގް ލިޒޯންގް އިންތިޚާބީ ރައީސް އިބްރާހީމް މުހައްމަދު ސޯލިހާ ބައްދަލުކުރައްވައިފި
9 އޮކްޓޯބަރު 2018 | އަންގާރަ 04:57ރައީސް ޔާމީންގެ ސަރުކާރުން ޗައިނާ ސަރުކާރާ ގުޅިގެން ގިނަ މަޝްރޫއުތަކެއް ހިންގާފައިވޭ
އިންތިހާބީ ރައީސް އިބްރާހީމް މުހައްމަދު ސޯލިހް އަދި ޗައިނާގެ ސަފީރު ޒަންގް ލިޒޯންގް ބައްދަލުކުރައްވަނީ
ޗައިނާގެ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޒަންގް ލިޒޯންގް އިންތިޚާބީ ރައީސް އިބްރާހިމް މުހައްމަދު ސޯލިހާ ބައްދަލުކުރައްވައިފިއެވެ.
މި ބައްދަލުކުރެއްވުން އޮތީ އިންތިޚާބީ ރައީސް އިބްރާހިމް މުހައްމަދު ސޯލިހުގެ ކެމްޕޭން އޮފީސް ހުންނަ "ސޯލްޓް ކެފޭ" އިމާރާތުގައެވެ.
ޗައިނާ ސަފީރާއި އިންތިޚާބީ ރައީސް އިބްރާހިމް މުހައްމަދު ސޯލިހު ސަލާމްކުރައްވަނީ
ޗައިނާއަކީ ރައީސް ޔާމީނުގެ ސަރުކާރުން ގާތް ގުޅުންތަކެއް ބާއްވަމުން އައި ގައުމެކެއެވެ. ރައީސް ޔާމީންގެ ސަރުކާރުން ޗައިނާ ސަރުކާރާއި ގުޅިގެން ރާއްޖޭގައި ގިނަ ޕްރޮޖެކްޓްތަކެއް ވަނީ ހިންގާފައެވެ. އެގޮތުން ސިނަމާލެ ބްރިޖާއި، ހުޅުމާލޭގައި ތަރައްގީކުރަމުން އަންނަ ފްލެޓްތަކާއި އަދި މާލޭގައި ބިނާކުރެވޭ އެންމެ ބޮޑު ޓުއަރިސްޓް ހޮޓަލަށްވާނެ ކަމަށް ބެލެވޭ ނަސަންދުރަ ޕެލެސް ހޮޓެލްގެ މަޝްރޫއު ހިމެނެއެވެ.
އިންތިޚާބީ ރައީސް މުހައްމަދު ސޯލިހާއި ޗައިނާ ސަފީރު މިއަދު ބައްދަލު ކުރައްވާފައި ވާއިރު ރާއްޖޭގައި ހުންނަވާ އދ. ގެ މަންދޫބު ޝޮކޮ ނޯޑާ ވަނީ ބުރާސްފަތިދުވަހު އިބޫގެ އަރިހަށް އިހުތިރާމްގެ ޒިޔާރާތެއް ކުރައްވާފައެވެ. މި ބައްދަލުވުމާ ގުޅޭ ގޮތުން އެއްވެސް ފަރާތަކުން އިތުރު ތަފްސީލެއް ހާމައެއް ނުކުރެއެވެ.
ރިޔާސީ އިންތިޚާބު އިބޫ ކާމިޔާބު ކުރެއްވުމާ ގުޅިގެން ބޭރުގެ ގައުމުތަކުގެ އިސްވެރިންނާއި، މަންދޫބުން އަންނަނީ އެމަނިކުފާނާ، ބައްދަލުކުރައްވައި މަރުހަބާ ދަންނަވަމުންނެވެ. އަދި މީގެ އިތުރުން ސަރުކާރުގެ އިސް ވެރިންނާއި، ދައުލަތުގެ އިސްވެރިން ވެސް އަންނަނީ އިބޫއާ ބައްދަލު ކުރައްވަމުންނެވެ.
