ބްރޯޑް ކޮމްއިން މައްސަލަތައް ބެލުމުގައި ހަމަހަމަ ކަމެއްނެތް: ކޮމިޝަނުގެ ރައީސް ޝަހީބު
4 އޮކްޓޯބަރު 2018 | ބުރާސްފަތި 09:01ރާއްޖެޓީވީގެ މައްސަލަތައް އެކޮމިޝަނުގެ މެމްބަރުން އަމިއްލައަށް ހުށަހަޅައި ބަލާފައިވޭ
ބްރޯޑްކާސްޓިންގ ކޮމިޝަންގެ މެމްބަރުން
މޯލްޑިވްސް ބަރޯޑްކާސްޓިންގ ކޮމިޝަން (ބްރޯޑްކޮމް) އިން އަމިއްލަ އިސްނެގުމުގެ މަތިންނާއި ކޮމިޝަނުގެ ވަކިވަކި މެމްބަރުން ހުށަހަޅާ މައްސަލަތައް ބެލުުމުގައި ހަމަހަމަކަން ނެތް ކަމަށް ގަބޫލު ކުރައްވާ ކަމަށާއި ސިޔާސީ ނުފޫޒު އެބޭފުޅުންގެ މައްޗަށް އޮތް މިންވަރު އެނގޭނީ ވެސް ހަމަ އެބޭފުޅުންނަށް ކަމަށް ބްރޯޑްކޮމްގެ ރައީސް މުހައްމަދު ޝަހީބު ވިދާޅުވެއްޖެ އެވެ.
ބްރޯޑް ކާސްޓިންގ ދުވަހުގެ މުނާސަބަތުގައި ބްރޯޑްކޮމްއިން ބޭއްވި ނޫސްވެރިންގެ ބައްދަލުވުމުގައި ބްރޯޑްކޮމްގެ ރައީސް މުހައްމަދު ޝަހީބު ވިދާޅުވީ ކޮމިޝަނުގެ އިސްނެގުމުގެ މަތިންނާއި ވަކިވަކި މެމްބަރުން މައްސަލަތައް ހުށަހެޅި ބަލަމުންދާއިރު، އެ މައްސަލަތައް ހުށަހަޅާ ކޮމިޝަނުގެ މެމްބަރުންނަށް ސިޔާސީ ނުފޫޒު އޮތްކަން ނުވަތަ ނެތްކަން އެނގޭނީ ހަމަ އެ ބޭފުޅުންނަަށް ކަމަށެވެ. އަދި ކޮމިޝަނުގެ ރައީސް ޝަހީބަށް ސިޔާސީ އެއްވެސް ނުފޫޒެއް ނެތް ކަމަށް އޭނާ ވިދާޅުވި އެވެ.
ރާއްޖޭގެ އެންމެ ގިނަ މީހުންބަލާ ރާއްޖެޓީވީ ހަތަރު ފަހަރެއްގެ މަތިން ޖޫރިމަނާކޮށް، ޖުމްލަ 3.7 މިލިއަން ރުފިޔާއިން ޖޫރިމަނާކޮށްފައި، އެހެން ޓީވީސްޓޭޝަންތަކުގެ މައްސަލަތައް ނުބަލަނީ ކޮންއުސޫލަކުންތޯ އާއި ދައުލަތުގެ މީޑިއާއިންނާއި ބައެއް އަމިއްލަ ޓީވީ ސްޓޭޝަންތަކުން ކުރީގެ ރައީސުންނާއި ސިޔާސީ ބައެއް ބޭފުޅުންގެ އަބުރަށް އަރައިގަންނައިރު، އެފަދަ މައްސަލަތައް ބެލުމަށް ފަސްޖެހެނީ ކީއްވެތޯ ރާއްޖެޓީވީން ސުވާލު ކުރުމުން ޝަހީބު ވިދާޅުވީ މައްސަލަތައް ބެލުމުގައި ހަމަހަމަކަން ނެތްކަން ގަބޫލު ކުރައްވާ ކަމަށެވެ.
"އަޅުގަނޑު ދަންނަވާނީ ތިވިދާޅުވާ ހަމަހަމަކަން ނެތް މައްސަލަތައް އެބަހުރި. ބައެއް މައްސަލަތަކަކީ ކޮމިޝަނުގެ އިސްނެގުމަށް ނުވަތަ ކޮމިޝަނުގެ ބައެއް މެމްބަރުން އިސްނަންގަވައިގެން ހުށަހަޅުއްވާފައިހުރި މައްސަލަތައް. ދެން އެބޭފުޅުންނަށް އެނގިވަޑައިގަންނަވާނީ އެބޭފުޅުންގެ މިނިވަންކަމާމެދު އެއްޗެއް ވިދާޅުވާން... އަޅުގަނޑު މިދަންވަނީ އަޅުގަނޑަށް އެއްވެސް ކަމެއްގައި އެއްވެސް ސިޔާސީ ފަރާތަކުން ނުފޫޒެއް ފޯރުވާފައެއް ނެތް،" ޝަހީބު ވިދާޅުވި އެވެ.
ޝަހީބު ވިދާޅުވީ ކޮމިޝަނުގެ އިސްނެގުމުގެ މަތިންނާއި ކޮމިޝަނުގެ މެމްބަރުން އިސްނަގައިގެން މައްސަލަތައް ބަލާކަމުގައިވާނަމަ މިއަށް ވުރެ ހަމަހަމަކޮށް ބެލެންޖެހޭނެ ކަމަށް ގަބޫލު ކުރައްވާ ކަމަށެވެ.
"އަޅުގަނޑު ދެކޭގޮތުގައި ކޮމިޝަނުން އިސްނަގައިގެން މައްސަލަތައް ބަލާކަމުގައި ވާނަމަ މިއަށް ވުރެ ހަމަހަމަކޮށް ބެލެންޖެހޭނެ ކަމަށް އަޅުގަނޑުވެސް ގަބޫލު ކުރަން. ހަމަ އެންމެ ޓީވީއެއްގެ މައްސަލައެއް ނޫން ކޮމިޝަނުން ބަލާނަމަ ފެންނަންޖެހޭނީކީއެއް. އެއަށް ވުރެ ހަމަހަމަކޮށް ހުރިހާ ޓީވީ ސްޓޭޝަންތައް ބަލައިގެން ކުރާނަމަ ތިސުވާލެއް ނުކުރައްވާނެކަން އަޅުގަނޑު ގަބޫލު ކުރަން،" ޝަހީބު ވިދާޅުވި އެވެ.
ޝަހީބު އެގޮތަށް ވިދާޅުވިއިރު، ރާއްޖެޓީވީ ހަތަރު ފަހަރެއްގެ މަތިން 3.7 މިލިއަން ރުފިޔާއިން ޖޫރިމަނާ ކޮށްފައި ވެއެވެ. އަދި ރައީސް އަބްދުﷲ ޔާމީންގެ އަބުރުފުޅަށް އަރައިގަނެފައިވާ ކަމަށް ބުނެ ބޮޑެތި އަދަދުތަކުން ރާއްޖެޓީވީ ޖޫރިމަނާ ކޮށްފައިވާއިރު، އެއީ އެކިއެކި ސިޔާސީ ބޭފުޅުން ސިޔާސީ ޕޯޑިއަމްތަކުގައި ނުވަތަ ޓީވީ ޕްރޮގްރާމްތަކުގައި ދައްކާފައިވާ ވާހަކަތައް ބްރޯޑްކާސްޓް ކުރުމާއި ގުޅިގެން ކޮށްފައިވާ ޖޫރިމަނާ ތަކެކެވެ.
ނަމަވެސް ދައުލަތުގެ މީޑިއާއިންނާއި ބައެއް އަމިއްލަ ޗެނަލްތަކުން ކުރީގެ ރައީސް މައުމޫން އަބްދުލްގައްޔޫމާއި ކުރީގެ ރައީސް މުހައްމަދު ނަޝީދުއާއި ސިޔާސީ ބައެއް ފަރާތްތަކުގެ އަބުރަށް އަރައިގަނެ، ފާޑުފާޑުގެ ރިޕޯޓްތައް އެ ސްޓޭޝަނުން ގެނެސްދީފައިވާއިރު، އެމައްސަލަތައް އެކޮމިޝަނުގެ ނުވަތަ އެކޮމިޝަނުގެ މެމްބަރުންގެ ސަމާލު ކަމަށް އައިކަމަކަށް ނުވިއެވެ.
