އިރާނަށް އަޅާފައިވާ ދަތިކުރުމުގެ ފިޔަވަޅުތައް ލުއިކުރަން އައިސީޖޭއިން އެމެރިކާއަށް އަމުރުކޮށްފި

އީރާނުގެ ނިއުކްލިއަރ ޕްރޮގްރާމްގެ މައްސަލައިގައި ދުނިޔޭގެ ބާރުތަކާއެކު ވެފައިވާ އެއްބަސްވުމުން މެއި މަހު އެމެރިކާއިން ވަކިވެ އީރާނާ ދެކޮޅަށް އިއާދަކުރި ދަތިކުރުމުގެ ފިޔަވަޅުތައް ލުއިކުރުމަށް އިންޓަރނޭޝަނަލް ކޯޓް އޮފް ޖަސްޓިސް(އައިސީޖޭ)އިން އަމުރުކޮށްފިއެވެ.

ފަނޑިޔާރުންވަނީ ކާބޯތަކެއްޗާއި، ބޭސް ހިމެނޭ ގޮތުން އިންސާނީ އެހީގެ ސާމާނާއި ވައިގެ ދަތުރުފަތުރުގެ ސަލާމަތާބެހޭ ތަކެތި އެ ގައުމަށް ފޯރުކޮށްދިނުމަށް ހުރަހެއް އެޅޭ އެއްވެސް މާއްދާއެއް އޮތްނަމަ ނައްތާލެއްވުމަށް އަންގަވާފައެވެ. އެމެރިކާއިންވަނީ އެގައުމުން މިހާރުވެސް އިންސާނީ އެހީގެ ސާމާނު ފޮނުވުމަށް މަނާނުކުރާއިރު ހުކުމަކީ އިރާނު "ބަލިވުމެއް"ކަމަށް ބުނެފައެވެ.

އައިސީޖޭގެ ނިންމުމަކީ އެ މައްޗަށް އަމަލުކުރުން ލާޒިމް އެއްޗަކަށްވީ ނަމަވެސް ތަންފީޒު ކުރުމުގެ ބާރެއް ނޯންނާނެއެވެ.

މިއީ އދ.ގެ މެމްބަރު ގައުމުތަކުގެ މެދުގައި އުފެދޭ ގާނޫނީ ޚިލާފްތަކުގައި ގޮތް ނިންމާ މައި ކޯޓެވެ. ނަމަވެސް އެމެރިކާއާއި އިރާނާ ވެސް މީގެ ކުރިން އެ ކޯޓްގެ ނިންމުންތަކަށް އަޅާނުލައި ދޫކޮށްލާފައިވާ ދެ ގައުމެވެ.

އެމެރިކާ ވަނީ މެއި މަހުގެ ތެރޭގައި ނިއުކްލިއަރ އެއްބަސްވުމުން ވަކިވެ އީރާނަށް އަޅާފައި އޮތް ދަތިކުރުމުގެ ފިޔަވަޅުތައް އޯގަސްޓް މަހުގެ ކުރީކޮޅު އިޔާދަކުރައްވާފައެވެ.

ރައީސް ބަރަކް އޮބާމާގެ ވެރިކަމުގައި އެެމެރިކާ އާއި، ރަޝިއާ އާއި، ޗައިނާ އާއި، ފްރާންސާއި، އިނގިރޭސިވިލާތާއި، ޖަރުމަނު ވިިލާތުން، އީރާނާ އެކު، ވި ނިއުކްލިއަރ އެއްބަސްވުން ގާއިމް ކުރީ 2015 ވަނަ އަހަރުއެވެ.

މި އެއްބަސްވުމުގެ ދަށުން އީރާނުން ވަނީ އެ ގައުމުގެ ނިއުކްލިއަރ ހަރަކާތްތައް މަދުކުރުމަށް އެއްބަސްވެފައެވެ. އަދި އޭގެ ބަދަލުގައި އެ ގައުމަށް އަޅާފައިވާ ދަތިކުރުމުގެ ފިޔަވަޅުތައް ލުއިކުރުމަށް ދުނިޔޭގެ ބާރުތަކުންވަނީ އެއްބަސްވެފައެވެ.

ރައީސް ޓްރަމްޕް ވިދާޅުވެފައިވަނީ އެ އެއްބަސްވުމަކީ އެއްފަރާތަކަށް ޖެހިފައިވާ އެއްބަސްވުމެއްކަމަށެވެ.

އޯގަސްޓު މ،ަހުގެ ހަތްވަނަ ދުވަހުންފެށިގެން ފިޔަވަޅު އަޅާފައިވާ ދާއިރާ ތަކުގެ ތެރޭގައި:

-އީރާނު ސަރުކާރާއިއެކު އެމެރިކާ ޑޮލަރުގެ މުއާމަލާތްކުރުން

-އިރާނުގެ ރަނާއި އެހެނިހެން މައުދަނުގެ ވިޔަފާރި

-ގްރެފައިޓް،އެލުމެނިއަމް،ދަގަނޑު، ބޯޓުދެލި،ސޮފްޓްވެއަރ ބޭނުންކޮށްގެން ކުރެވޭ އިންޑަސްޓްރިއަލް ބޭނުންތައް

-އީރާނުގެ ފައިސާ، ރިއާލް ބޭނުންކޮށްގެން ހިންގޭ ޓްރާންސެކްޝަންތައް

-އީރާނުގެ ދަރަނީގެ މުއާމަލާތްތައް

-އިންޖީނު އުޅަނދު އުފެއްދުމުގެ އިންޑަސްޓްރީ

މިއީ ފުރަތަމަ ފިޔަވަހީގައި ފިޔަވަޅު އަޅާފައިވާ ދާއިރާތައް ކަމަށްވާއިރު ނޮވެމްބަރު މަހުގެ 5ން ފެށިގެން ފިޔަވަޅު އެޅޭ ދާއިރާތަކުގެ ތެރޭގައި އިރާނުގެ ހަކަތައާއި ޝިޕިންގ ދާއިރާ، އަދި ޕެޓްރޯލިއަމް ވިޔަފާރިއާއި، އީރާނުގެ މަރުކަޒީ ބޭންކް މެދުވެރިކޮށް ބޭރުގެ ފަރާތްތަކާއި ހިންގޭ ފައިސާގެ މުއާމަލާތްތައް ހިމެނެއެވެ.