ސުލަވެސީއަށް އެރި ސުނާމީ: މަރުވި ގިނަ ބަޔަކު ބޮޑު އެއް ކަށްވަޅަކަށް

އިންޑޮނީޝިއާ އަށް އައި ބިންހެލުމާއި ސުނާމީގައި މަރުމި މީހުންގެ ހަށިތައް ބޮޑު ކަށްވަޅެއްގައި ވަޅުލުމުގެ މަސައްކަތް ހިލޭސާބަހަށް މަސައްކަތްކުރާ ފަރާތްތަކުން ފަށައިފިއެވެ.

ހުކުރު ދުވަހު އައި ބިން ހެލުމާއި ސުނާމީއާ ގުޅިގެން ސުލަވެސީގެ ބޮޑު ސަރަހަދެއް ސުންނާފަތިވެފައިވާއިރު މަރުވި މީހުންގެ އަދަދުވަނީ 844 އަށް އަރާފައެވެ.

ދުރު ސަރަހައްދުތަކާއި މުވާސަލާތީ ޚިދުމަތް އަދިވެސް ކެނޑިފައިވާއިރު މަރުވި މީހުންގެ އަދި މިއަށް ވުރެ ވެސް އިތުރުވެދާނެކަމުގެ ބިރުވަނީ ހީވެފައެވެ.

ބަރު އެއްޗެތި އުފުލާނެ އާލާތްތައް މަދުވުމުން، ވެއްޓިފައިވާ އިމާރާތްތަކުގެ ދަށުގައި ދިރިތިބި މީހުން ސަލާމަތްކުރުމުގެ މަސައްކަތަށް ހުރަސްއެޅިފައެވެ.

ޕާލޫގެ ސުންނާފަތިވެފައިވާ ރިޒޯޓެއް ކަމަށްވާ ރޯއާރޯއާ ހޮޓެލުގެ ދަށުގައި އެކަނި ވެސް އެތައް ބަޔަކުވާނެކަމުގެ ބިރުހީވެފައި ވެއެވެ.

ޕާލޫގެ ދެކުނުން އޮންނަ ސިގީގެ ކްރިސްޓިއަން ފައްޅިއެއްގައި 34 ކުއްޖަކު މަރުވެ ކިސަޑާއި ކުނިބުނީގެ ތެރޭގައި ވަނިކޮށް ފެނިފައިވާ ކަމަށް އިންޑޮނީޝިއާގެ ރެޑްކްރޮސްގެ ތަރުޖަމާނު އޯލިއާ އަރިއާނީއާ ހަވާލާދީ ރޮއިޓަރސްގައi ބުނެފައިވެއެވެ.

އޭނާ ބުނީ އެ ކުދިން ތިބީ "ބައިބްލް ކޭމްޕްގައި" ކަމަށެވެ.

އިންޑޮނީޝިއާގެ ޑިޒާސްޓަރ މިޓިގޭޝަން އޭޖެންސީ އިން ވަނީ ސުލަވެސީ އަށް ސުނާމީ އެރުމުގެ ކުރިން ސުނާމީގެ އިންޒާރުދޭ ބޮއިތައް މަސައްކަތްނުކުރާ ކަން ކަށަވަރުކޮށްދީފައެވެ.

އޭޖެންސީގެ ތަރުޖަމާނު ސުޓޯޕޯ ޕުރްވޯ ނުގުރޯހޯ ވިދާޅުވީ ފުންކަނޑު ސެންސަރާއި ގުޅުވާފައިވާ ފްލޯޓިންގ ޑިޓެކްޝަން ޔުނިޓްތައް ހުރީ ހަލާކުވެފައި ނޫނީ ވަގަށް ނަގާފައި ކަމަށެވެ.

އެ ހާލަތުގައި ހުރި ނަމަވެސް ސުނާމީގެ އިންޒާރު ދީފައިވެއެވެ. ނަމަވެސް ރާޅުތައް ހުންނާނެ މިންވަރު ލަފާކޮށްލަން ނޭނގުނީއެވެ.

ބިންހެލުމަށް ފަހު ކަރަންޓު ކެނޑިފައިވާތީ ޕާލޫއަށް ސުނާމީގެ އިންޒާރު ލިބިފައެއް ނުވެއެވެ. އަދި އައްސޭރި ފަށުން ސައިރެން އަޑު އިވިފައެއް ނުވެއެވެ.

ހުކުރު ދުވަހު 7.5 މެގްނިޓިއުޑްގައި އައި ބިންހެލުމަށް ފަހު ކުރިމަތިވި ސުނާމީގެ ރާޅުތައް 6 މީޓަރަށް (20) އަރާ ކަމަަށް ސުޓޯޕޯ ޕުރުވޯ ވިދާޅުވިއެވެ.