ރައީސް ޔާމީނާ ދެކޮޅަށް އެމްއެމްއޭ އިން ފުލުހުންނަށް ހުށަހެޅި މައްސަލަ ނަގައިފި ކަމަށް ބުނެފި
ރައީސް އެކައުންޓަށް 1.5 މިލިއަން ޑޮލަރު ޖަމާވި ކަމަށް ތުހުމަތުކޮށްފައިވޭ
ރައީސް ޔާމީން ކެބިނެޓް ބައްދަލުވުމެއްގެ ރިޔާސަތުގައި
ރައީސް އަބްދުﷲ ޔާމީން މައްޗަށް ތުހުމަތުކުރެވޭ މަނީ ލޯންޑަރިންގގެ މައްސަލައަކާ ގުޅިގެން އެމްއެމްއޭގެ ފައިނޭންޝިއަލް އިންޓެލިޖެންސް ޔުނިޓުން (އެފްއައިޔޫ) އިން ފުލުހުންނަށް ހުށަހެޅި މައްސަލަ އަބުރާ ނަގާފައިވާ ކަމަށް ރައީސް އޮފީހުން ބުނެފިއެވެ.
ރައީސް އޮފީހުގެ ސްޕޯކްސްޕާސަން އިބްރާހިމް މުއާޒު އަލީ ކުރެއްވި ޓްވީޓެއްގައި ވިދާޅުވީ އެމްއެމްއޭ އިން ފުލުހުންނަށް މައްސަލަ ހުށަހެޅިކަން ރައީސް ޔާމީނަށް އެނގިވަޑައިގެން، އެކަމުގެ މައުލޫމާތު ހޯއްދެވުމަށް ގަވަރުނަރު އަހުމަދު ނަސީރަށް ރައީސް ގުޅުއްވި ކަމަށާއި އެމްއެމްއޭގެ ފައިނޭޝަން އިންޓެލިޖެންސް ޔުނިޓުން ފުލުހުންނަށް ސިޓީއެއް ފޮނުވާފައި ވަނީ ގަވަރުނަރަށް އެނގިވަޑައިގެން ނޫން ކަމަށް ވިދާޅުވި ކަމަށެވެ.
މުއާޒު ވިދާޅުވީ އެމްއެމްއޭގެ ފައިނޭޝަލް އިންޓަލިޖެންސް ޔުނިޓުން ފުލުހުންނަށް ފޮނުވި ސިޓީގައި ހުރި ވާހަކަތަކުން ރައީސް ޔާމީން ގާނޫނާ ހިލާފުވެފައިވާ އެއްވެސް ކަމެއް އެނގެން ނެތް ކަމަށާއި އެ ސަބަބާ ހުރެ، އެ ސިޓީ އަބުރާ ނަގާފައިވާ ކަަމަށް ގަވަރުނަރު ނަސީރު ވިދާޅުވި ކަމަށް މުއާޒު ކުރެއްވި ޓްވީޓުގައި ވެއެވެ.
އެހެންކަމުން އެމްއެމްއޭގެ ފަރާތުން އެ ވާހަކައިގެ ހަގީގަތް ރައްޔިތުންނަށް ހާމަކޮށް ދެއްވުމަށް ރައީސް ޔާމީން ގަވަރުނަރު އަރިހުން އެދިވަޑައިގެންނެވި ކަމަށް މުއާޒު ކުރެއްވި ޓްވީޓުގައިވެއެވެ.
މުއާޒު އެގޮތަށް ޓްވީޓު ކުރައްވާފައި ވަނީ އިންތިޚާބަށް ކައިރިވެފައި ވަނިކޮށް ރައީސް ޔާމީންގެ އެކައުންޓަށް 1.5 މިލިއަން ޑޮލަރު ޖަމާވެފައިވާ ކަމަށް އަލްޖަޒީރާ އިން ބުނެފައި ވަނިކޮށެވެ.
އަލްޖަޒީރާއިން ރިޕޯޓްކޮށްފައި ވަނީ އެމްއެމްއޭގެ ފައިނޭންޝިއަލް އިންޓެލިޖެންސް ޔުނިޓުން (އެފްއައިޔޫ) ސެޕްޓެމްބަރު މަހުގެ 13 ވަނަ ދުވަހު އޭރުގެ އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ނަވާޒަށް ފޮނުވި ސިޓީއަކާ ހަވާލާދީއެވެ. އަލްޖަޒީރާ އިން ބުނީ އެ ސިޓީ އެތަނަށް ލިބިފައިވާ ކަމަށެވެ. އަދި އެ ފައިސާތައް ޖަމާކޮށްފައި ވަނީ ދެ ފަހަރެއްގެ މަތިން މޯލްޑިވްސް އިސްލާމިކް ބޭންކުގައި ހުންނަ ރައީސް ޔާމީންގެ އެކައުންޓަށެވެ. އެއީ މިދިޔަ ސެޕްޓެމްބަރު މަހުގެ ފަސް ވަނަ ދުވަހު 648،508 ޑޮލަރު އަދި ސެޕްޓެމްބަރު 10 ވަނަ ދުވަހު ޖަމާކުރި 810،635 ޑޮލަރު ކަމަށް އެފްއައިޔޫއާ ހަވާލާދީ އަލްޖަޒީރާގައި ބުނެފައި ވެއެވެ.
މުއާޒު ވިދާޅުވީ އިންތިހާބުގެ ކެމްޕެއިނަށް ރައީސް ވަކި އެކައުންޓެއް ހަމަޖައްސެވި ކަމަށާއި އެ އެކައުންޓަށް ގަވާއިދުން ފައިސާ ލައްވަމުން ގެންދެވި ކަމަށެވެ. އަދި ގާނޫނާ ހިލާފު އެއްވެސް ކަމެއް އެކަމުގައި ނޫޅޭނެ ކަމުގެ ފުރިހަމަ ޔަގީންކަން އަރުވާ ކަމަށް މުއާޒު ވިދާޅުވެފައި ވެއެވެ.
މިކަމާ ބެހޭ ގޮތުން މިހާތަނަށް ގަވަރުނަރުގެ ވެސް އަދި ފުލުހުންގެ ވެސް ބަހެއް ވަނީ ލިބޭ ގޮތް ނުވެފައެވެ.
