ފާރިސް ޝަޚްސު އޮޅުވާލި ކަމަށް ބުނާ މައްސަލައިގެ އިސްތިއުނާފްގެ އަޑުއެހުންތައް ނިންމާލައިފި
މިހަފުތާގެ ތެރޭގައި ހުކުމް ކުރާނެ
ކަފާލާތުގެ ދަށުން ފާރިސް އިއްޔެ ދޫކޮށްލުމުން ގިނަ ބަޔަކު މަރުހަބާ ކިޔަނީ
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން، ސަރުކާރު ހިންގާ ޕާޓީ ޕީޕީއެމްގެ ހުއްދަ ހޯދުމެއް ނެތި އެ ޕާޓީގެ ލޯގާ އާއި ދިދަ ބޭނުންކުރިކަން ސާބިތުވާ ކަމަށް ކަނޑައަޅައި އޭނާ ހަތަރު މަހާ 24 ދުވަހަށް ޖަލަށް ލާން ކްރިމިނަލް ކޯޓުން ކުރި ހުކުމް އިސްތިއުނާފު ކުރަން ހުށައެޅި މައްސަލައިގެ އަޑުއެހުންތައް ނިންމާލައިފިއެވެ.
ހޯމަ ދުވަހު ބޭއްވި އަޑުއެހުމަށް ފަހު ފާރިސްގެ ޤާނޫނީ ވަކީލް ހުސައިން ޝަމީމް ރާއްޖެ އެމްވީއަށް ވިދާޅުވީ މައްސަލައިގެ އަޑުއެހުންތައް އެއްކޮށް ނިމުނީކަން ގާޒީ އިއުލާން ކުރެއްވި ކަމަށާއި ދެން އޮންނާނީ ހުކުމްކުރުން ކަމަށް ވިދާޅުވި ކަމަށެވެ. އަދި މިހަފުތާގެ ތެރޭގައި ހުކުމް ކުރައްވާނެ ކަމަށް ގާޒީ ވިދާޅުވި ކަމަށް ވެސް ޝަމީމް ވިދާޅުވިއެވެ.
ހޯމަ ދުވަހު ބޭއްވި އަޑުއެހުމަށް އިޝާރާތް ކުރައްވާ ޝަމީމް ވިދާޅުވީ މައިގަނޑު ގޮތެއްގައި ދެކެވުނީ އިޖުރާއީ މައްސަލައިގެ ވާހަކަ ކަމަށާއި ކްރިމިނަލް ކޯޓުން ފާރިސްއަށް ހުކުމް ކުރިއިރު އިޖުރާއީ ގޮތުން ފުރިހަމަވާން ޖެހޭ އެތައް ކަމެއް ފުރިހަމަނުކޮށް މައްސަލަ ނިންމާލާފައިވާތީ އެވާހަކަ ކަމަށެވެ.
ޝަމީމް ވިދާޅުވީ ކްރިމިނަލް ކޯޓުގައި ވެސް އަދި ހައިކޯޓުގައި ވެސް ފާރިސްގެ ފަރާތުން އެދެމުން ދިޔައީ ފާރިސް ކުށެއް ކޮށްފިތޯ ކަނޑައެޅުމުގެ ކުރިން އެކަން ބެލުމަށް ބާއްވާ ޝަރީއަތުގެ ކުރިންނާއި ޝަރީއަތުގައި ވެސް ފުރިހަމަވާން ޖެހޭ އިޖުރާއަތްތައް ފުރިހަމަވެފައި ނުވާތީ އެކަން ބަލައިދިނުމަށް ކަމަށެވެ. އަދި އެކަންކަން ދައުލަތުން ވެސް ޤަބޫލު ކުރައްވާ ކަމަށް ޝަރީއަތުގެ މަޖިލީހުގައި ވިދާޅުވެފައިވާ ކަމަށް ޝަމީމް ވިދާޅުވިއެވެ.
ފާރިސްގެ ވަކީލުންގެ ޓީމުގައި ހިމެނިވަޑައިގަންނަވާ ޤާނޫނީ ވަކީލު މުހައްމަދު ފައިސަލް ވިދާޅުވީ އިޖުރާއީ ނުކުތާތަކުގެ ގޮތުގައި ފާހަގަ ކުރައްވާފައި ވާނީ ޖިނާއީ އިޖުރާއަތުގެ ޤާނޫނުގައި ބަޔާންކުރާ ކަންކަން ކަމަށާއި އެކަންކަމަކީ އިންސާފްވެރި ޝަރީއަތެއް ހިންގުމަށްޓަކައި ކަނޑައަޅާފައިވާ ކަންތައްތަކެއް ކަމަށެވެ.
ފާރިސްގެ މައްޗަށް އެ ހުކުމް ކޮށްފައި ވަނީ މިދިޔަ ޖޫން މަހުގެ 27 ވަނަ ދުވަހުގެ ރޭ ކްރިމިނަލް ކޯޓުގެ ގާޒީ އިބްރާހިމް އަލީއެވެ. އެ މައްސަލަ މި އަހަރުގެ ޖުލައި މަހު އިސްތިއުނާފު ކޮށްފައިވާއިރު، މައިގަނޑު 27 ކަމެއް ފާހަގަކޮށްފައިވެއެވެ.
ފާރިސްގެ މައްޗަށް އިއްވި ހުކުމުގައި ވަނީ ޕީޕީއެމް އިން ފާރިސް ވަކިކޮށްފައި ވަނިކޮށް އެ ޕާޓީގެ މުސްތަޝާރު ރައީސް އަބްދުﷲ ޔާމިނާއި އެ ޕާޓީގެ ކައުންސިލް މެމްބަރުންގެ ހުއްދަ ނެތި ނޫސްވެރިންގެ ބައްދަލުވުމެއްގައި ފާރިސް ޕީޕީއެމްގެ ލޯގޯ އާއި ދިދަ ބޭނުން ކޮށްފައިވާކަން އެކަށީގެންވާ ޝައްކެތް ނެތް މިންވަރަށް ޝަރީއަތަށް ސާބިތުވާ ކަމަށެވެ.
މި މައްސަލަ ފާރިސްގެ މައްޗަށް ސާބިތު ކުރުމަށް ދައުލަތުން ސިއްރު ތިން ހެކިވެރިޔަކާއި، ފާރިސް ޕާޓީން ވަކިކުރިކަން ސާބިތު ކުރުމަށް އިލެކްޝަންސް ކޮމިޝަނުގެ ސިޓީއެއްގެ އިތުރުން ފާރިސް ޕީޕީއެމްގެ ދިދަ އާއި ލޯގޯ ބޭނުން ކުރި ކަމަށް ބުނާ ނޫސްވެރިންގެ ބައްދަލުވުމުގެ ރެކޯޑިންގއެއް ހުށަހަޅާފައިވެއެވެ. އަދި ފާރިސް މި ދައުވާއިން ދިފާއުވުމަށް 47 މީހަކު ހެކީގެ ގޮތުގައި ހުށަހެޅިއިރު 27 ކިތާބީ ހެއްކެއް ހުށަހެޅިއެވެ. ނަމަވެސް ހެކިބަސް ނެގީ ހަ މީހެއްގެއެވެ.
ކަފާލާތުގެ ދަށުން ފާރިސް މިހާރު ވަނީ މިނިވަންކޮށްފައެވެ.
