އޮސްޓްރިއާގެ ފޮރިން މިނިސްޓަރު އަރަބިން ވާހަކަފުޅު ދައްކަވައި އެންމެން ހައިރާން ކޮށްލައްވައިފި
30 ސެޕްޓެމްބަރު 2018 | އާދީއްތަ 16:48އަރަބިން ވާހަކަފުޅު ދައްކަވަން ފެއްޓުމާއެކު އެންމެންގެ ސަމާލުކަން އެ ކަމަނާއަށް ވަނީ ހުއްޓިފައި
އޮސްޓްރިއަން ފޮރިން މިނިސްޓަރ ކަރިން ކެނައިސްއެލް
އޮސްޓްރިއާގެ ފޮރިން މިނިސްޓަރު ކަރިން ކެނައިސްއެލް އދ. ގެ 73 ވަނަ ޖެނެރަލް އެސެމްބްލީގައި އަރަބި ބަހުން ވާހަކަފުޅު ދައްކަވާ އެންމެން ހައިރާން ކޮށްލައްވައިފިއެވެ.
އަރަބިން ވާހަކަފުޅު ދައްކަވަން ފެއްޓުމާއެކު އެންމެންގެ ސަމާލުކަން އެ ކަމަނާއަށް ވަނީ ހުއްޓިފައެވެ. އެ ވަގުތު އެތަނަށް ހާޒިރުވެ ތިއްބެވި މެމްބަރުން ވަނީ އެކަމަނާގެ ހިތްވަރަށް އަތްޖަހާފައެވެ.
އަރަބި ބަހަކީ ވަރަށް ފުރިހަމަ ބަހެއް ކަމަށް ކެނައިސްއެލް ވިދާޅުވިއެވެ. އދ. ގެ ރަސްމީ ހަ ބަހުގެ ތެރޭގައި ހިމެނޭ އަރަބި ބަހަކީ ތާރީޚް ދެނެގަތުމަށް އިސް ދައުރެއް އަދާ ކުރާ ބަހެއް ކަމަށް ކެނައިސްއެލް ވިދާޅުވިއެވެ.
ކެނައިސްއެލް ވިދާޅުވީ އެކަމަނާގެ ބަޔާން އަރަބި ބަހުން ދެއްވުނީ، ވިއެނާ އާއި ބެއިރުއިތުގެ އދ. ގެ ހެޑް ކުއާޓާސްގައި އުޅުއްވި ދުވަސްވަރު އަރަބި ބަސް ދަސްކުރެެއްވުމުންނެވެ. ހަނގުރާމައިގެ ދުވަސްވަރު ލުބުނާނުގައި ކިޔަވަން އުޅުއްވި ދުވަސް ވަރުވެސް އަރަބި ބަސް ދަސްކުރެއްވި ކަމަށާއި ނަމަވެސް އެ ގައުމުން ދަސްވި އެންމެ މުހިއްމު ފިލާވަޅަކީ ކެތްތެރިކަން ކަމަށް ކެނައިސްއެލް ވިދާޅުވިއެވެ.
ޖެނެރަލް އެސެމްބަލީގައި ކެނައިސްއެލް ވަނީ އަރަބި ބަހުގެ އިތުރުން ފްރެންޗާއި ސްޕެނިޝް އަދި އިނގިރޭސި ބަހުން ވާހަކަފުޅު ދައްކަވާފައެވެ.
