ރައްޔިތުންގެ ނިންމުން ސިފައިން ދަމަހައްޓާނެ: ޝިޔާމް
އިންތިޚާބުގެ ނަތީޖާ ރައީސް ޔާމީން ވަނީ ގަބޫލުކުރައްވާފައި
އެމްއެންޑީއެފްގެ ޖަލްސާ އެއްގައި ޖެނެރަލް ޝިޔާމް ވާހަކަ ދައްކަވަނީ
ސެޕްޓެމްބަރު 23 ގައި ބޭއްވި ރިޔާސީ އިންތިޚާބު ރައީސް އަބްދުﷲ ޔާމީނަށް ނާ ކާމިޔާބުވެ ވަޑައިގެންފައިވާ އިރު، ރައްޔިތުންގެ ނިންމުން ސިފައިން ދަމަހައްޓާނެ ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އަހްމަދު ޝިޔާމް ވިދާޅުވެއްޖެ އެވެ.
ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހް ބޮޑު އަޣުލަބިއްޔަތަކުން މޮޅުވެފައިވާ އިންތިޚާބުގެ ނަތީޖާ ބާތިލުކުރަން މަސައްކަތް ކުރަމުންދާކަމުގެ އަޑުތައް ފެތުރެމުންދާތީ، އެކަމާ ގުޅޭ ގޮތުން ރާއްޖެއެމްވީން ކުރި ސުވާލަކަށް ޖަވާބު ދެއްވަމުން ޗީފް އޮފް ޑިފެންސް ފޯސް ވިދާޅުވީ އެ ވާހަކަތަކަކީ ޝޯޝަލް މީޑިއާގައި ދައްކަމުންދާ ވާހަކަ ތަކެއް ކަމަށެވެ.
"ރައްޔިތުންގެ ނިންމުން (އިންތިޚާބުގެ ނަތީޖާ) ސިފައިން ދަމަހައްޓާނެ ކަމީ ކަށަވަރު ކަމެއް،" ޝިޔާމް ވިދާޅުވި އެވެ.
އެމްޑީޕީގެ ނާއިބު ރައީސް މުހައްމަދު ޝިފާޒު ވިދާޅުވީ ރައީސް އަބްދުﷲ ޔާމީންގެ ބާރުވެރިކަން ދެމެހެއްޓުމަށް މަސައްކަތް ކުރަން ބޭނުންފުޅު ވިޔަސް، ރައްޔިތުންގެ ބަސް ވަކި ގޮތަކަށް ބުނެފައި ވަނިކޮށް، އެ ނިންމުން މުއައްސަސާތަކުން ދަމަހައްޓާނެ ކަމަށެވެ.
"ރައްޔިތުންގެ ނިންމުމާ ޚިލާފަށް ޖެނެރަލް ޝިޔާމް ވެސް، އެކްޓިން ޕޮލިސް ކޮމިޝަނަރު ވެސް، އިލެކްޝަންސް ކޮމިޝަން ވެސް، ބްރޯޑްކާސްޓިން ކޮމިޝަން ވެސް މަސައްކަތެއް ނުކުރާނެ،" އޭނާ ވިދާޅުވި އެވެ.
މި އިންތިޚާބު 58.4 ޕަސެންޓް ވޯޓުން އިބްރާހިމް މުހައްމަދު ސޯލިހް އިންތިޚާބު ކާމިޔާބު ކުރެއްވުމާއެކު، ބަލި ގަބޫލުކުރައްވައި، އިބްރާހިމް މުހައްމަދު ސޯލިހްއާ ރައީސް ޔާމީން ވަނީ ބައްދަލު ކުރައްވައިފަ އެވެ.
އިބްރާހިމް މުހައްމަދު ސޯލިހަށް ލިބިވަޑައިގެންނެވި ކާމިޔާބު ފާހަގަކޮށް ގައުމުތަކުން އެ މަނިކުފާނަށް މަރުޙަބާ ކިޔާފައިވާ އިރު، ދައުލަތުގެ މުއައްސަސާތަކުން ވެސް އެ މަނިކުފާނަށް އަންނަނީ މަރުޙަބާ ކިޔަމުންނެވެ.
އެކްޓިން ޕޮލިސް ކޮމިޝަނަރު އަބްދުﷲ ނަވާޒު ވަނީ އިބްރާހިމް މުހައްމަދު ސޯލިހްއާ ބައްދަލު ކުރައްވައިފަ އެވެ.
