މުހިންމު އެއްވެސް ލިޔެކިޔުމެއް ނައްތައެއް ނުލާނެ: މުއާޒް
15 އޮކްޓޯބަރު 2018 | ހޯމަ 12:19ފިތުނަވެރި، ބައިބައިވުން އުފެދޭ ވާހަކަ ނުފެތުރުމަށް އިލްތިމާސްކޮށްފައިވޭ
މުލިއާގެއިން ފޮށިތަކެއް ނެރެގެން ގެންދަނީ
ދައުލަތުގެ މުހިންމު އެއްވެސް ލިޔެކިޔުމެއް ނައްތާ ނުލާކަމަށް ރައީސް އޮފީހުގެ ތަރުޖަމާން އިބްރާހިމް މުއާޒް އަލީ ވިދާޅުވެއްޖެ އެވެ.
ދައުލަތުގެ ބައެއް އިދާރާތަކުން ގިނަ އަދަދެއްގެ ލިޔެކިޔުންތައް އުކާލާ، އަންދަމުން ގެންދާ މައްސަލަ ފެންމަތިވެ ފުލުހުންގެ ސަމާލުކަމަށް މައްސަލަ ގެނެސްފައިވާއިރު، މުއާޒް ވިދާޅުވީ ސަރުކާރުގެ އެއްވެސް މުއައްސަސާއެއްގައި ހުރި މުހިންމު އެއްވެސް ލިޔެކިޔުމެއް ނައްތައެއް ނުލާނެ ކަމަށެވެ. އަދި ކުނީގެ ގޮތުގައި ބޭނުން ނެތިގެންދާ ކަރުދާސް ނައްތާލުމަށް، ޝެރެޑާ އަބަދުވެސް ސަރުކާރު އޮފީސްތަކުގައި ހުންނަ ކަމަށެވެ.
މުއާޒް ވިދާޅުވީ ފިތުނަވެރި، ބައިބައިވުން އުފެދޭ ވާހަކަ ނުފެތުރުމަށް އިލްތިމާސްކުރާކަމަށެވެ.
މުއާޒް އެގޮތަށް ވިދާޅުވިއިރު، މުލިއާގެއިން ގިނަ އަދަދެއްގެ ލިޔެކިޔުންތައް އުކާލުމަށް ނެރުނު މައްސަލައެއް ވަނީ ފެންމަތިވެފަ އެވެ. އަދި ޕީޕީއެމްގެ ޖަގަހަތަކުން ބައެއް ލިޔެކިޔުންތައް އަންދާލި މައްސަލައެއް ވަނީ ފެންމަތިވެފަ އެވެ.
