އެމަނިކުފާނު ވެރިކަމަށް ހޮވިވަޑައިގެންފިނަމަ އެންމެންގެ ގައުމެއް ގޮތުގައި އިހުސާސްކުރެވޭނެ ރާއްޖެއެއް ހޯއްދަވައިދެެއްވާނެކަމަށް ކޯލިޝަން ކެންޑިޑޭޓް އިބުރާހިމް މުހައްމަދު ސޯލިހު (އިބޫ) ވިދާޅުވެއްޖެއެވެ.

ކޯލިޝަންގެ ކެމްޕެއިން ނިންމުމުގެ ގޮތުން އައްޑޫގައި ބޭއްވި ބޮޑު ޖަލްސާގައި ވާހަކަފުޅު ދައްކަވަމުން އިބޫ ވިދާޅުވީ، އައްޑޫގެ ރައްޔިތުންނަކީ އަބަދުވެސް ހައްގުތައް ހޯދުމަށް ގިނަ މަސައްކަތްތަކެއްކުރެއްވި ބޭފުޅުންތަކެއް ދިރިއުޅުއްވާ ސިޓީއެއް ކަމަށެވެ. އަދި އައްޑޫއަކީ ގިނަ ތައުލީމީ ދަރިންތަކެއް އުފަންވި ފަސްގަނޑެއްކަމަށްވެސް އެމަނިކުފާނު ވިދާޅުވިއެވެ.

ކޮންމެ ރަށަކަށްވެސް އަރައި ވަޑައިގަތުމުން ރައްޔިތުންގެ ހުންނަ އެންމެ ބޮޑު ކަންބޮޑުވުމަކީ، އިންސާފު ނުލިބޭ ވާހަކައާއި ވަޒީފާގެ ބިރާއި އާސަންދަ ނުލިބޭކަމުގެ ޝަކުވާކަމަށް ވިދާޅުވިއެވެ.

އިބޫ ވިދާޅުވީ، މިއަދު ރާއްޖެ އޮތީ ވަރަށް ބޮޑު އަނދަވަޅަކަށް ވެއްޓިފައިކަމަށާއި، ކެމްޕެއިނަށް ފެއްޓެވި މިދަތުރު އައްޑޫއިން މި ނިންމާލަނީ ރާއްޖެއަށް ކުރިމަތިވެފައިވާ އެކިއެކި މައްސަލަތަކަށް ހައްލެއް ލިބޭނެކަމުގެ ފުރިހަމަ އުއްމީދާއި އެކުގައިކަމަށެވެ،

"އުފަލުން ފަހުރުވެރި އާއިލާއާއި އެކު އުޅެއެވޭނެކަމުގެ އުއްމީދުގައި. ވަކި ޕާޓީއަކަށް ސޮއިނުކުރިއަސް ވަޒީފާއާއި ލޯނުވެސް ލިބޭނެ" އިބޫ ވިދާޅުވިއެވެ.

އިބޫ ވިދާޅުވީ، އެބޭފުޅުންގެ ވެރިކަމެއްގައި ރީތިވާ ކުލައެއްގެ ސަބަބުން އެއްވެސް ދިވެހި ރައްޔިތަކު ބާކީވެގެން ދިޔަ ނުދެއްވަނޭކަމަށެވެ. އަދި ރަޖިސްޓްރީވެފައިވާ ޕާޓީގެ ސަބަބުން އާސަންދަ ނުލިބިގެން އެކަކު އަނެކަކުގެ ގާތަށް ސަލާން ޖަހަން ދާންވެސް ނުޖެހޭނޭކަމަށް ވިދާޅުވިއެވެ.

އިބޫ ވިދާޅުވީ، މިއަދު ގައުމު އޮތީ މަޖިލިސް ހިސޯރުކޮށް ސުޕްރީމް ކޯޓްގެ ފުރާޅުން ޓިނުނަގައި ފަނޑިޔާރުން ހިފާ ހައްޔަރުކޮށްފައިކަމަށެވެ. އަދި އެމްއެމްއޭއަށް އެނގި ތިބެ ކަޅު ފައިސާ ދޮވެ، ތަންތަނުން ހަތިޔާރު ފެނިއްޖެކަމަށާއި، ވިޔާނުދާ ސަރުކާރެއްގެ ސަބަބުން ސަލާމަތީ ބާރުތަކުގެ ނަމަށް ވެސް ހުތުރު ވެއްޖެކަމަށް އިބޫ ވިދާޅުވިއެވެ.

އިބޫ ވިދާޅުވީ ރާއްޖޭގެ ހުރިހާ ރަށަކުންވެސް ފެނިގެންދަނީ އުފާވެރި މަންޒަރުކަމަށާއި، މިހާތަނަށް 170,000 ރައްޔިތުން ވޯޓު ދޭނެ ކަމަށް ބުނެފައިވާ ކަމަށެވެ.

އަދި 23 ސެޕްޓެމްބަރު ވާ އާދީއްތަ ދުވަހަކީ، ގުޅިފައިވާ ސިޔާސީ ޕާޓީތަކުން ކުރާ މަސައްކަތުގައި ކުލަޖެހުމުގެ ފެށުންކަމަށް އިބޫ ވިދާޅުވިއެވެ. އަދި އެދުވަހު ޖަލުތަކުގައި ތިއްބެވި ސިޔާސީ ބޭފުޅުންނާއި ރާއްޖެއިން ބޭރުގައި ތިއްބެވި ބޭފުޅުން ވެސް މިނިވަން ވެގެން އެނބުރި އެބޭފުޅުންގެ އާއިލާތަކާއި ބައްދަލުކުރައްވާނެކަމަށް ވިދާޅުވިއެވެ.

އިބޫ ވިދާޅުވީ 14 ވިލޭރޭގެ ހަނދު ރައްޔިތުންނާއި ދެން ބައްދަލު ކުރާނީ އުފާވެރިކަމުގެ ކަމިޔާބީގެ ކުލަތަކާއި އެކު ގައިކަމަށެވެ.