ފޯމު ހުށަހަޅާ އެންމެންނަށް ފްލެޓް ލިބޭނެ ކަމަށް މުއިއްޒު ވިދާޅުވެއްޖެ
20 ސެޕްޓެމްބަރު 2018 | ބުރާސްފަތި 17:42މިހާތަނަށް ފޯމު ހުށަހަޅާފައި ވަނީ 18،000 މީހުން
ހައުސިން މިނިސްޓަރު މުހައްމަދު މުއިއްޒު
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން އިއުލާންކޮށްފައިވާ، "ހިޔާ" މަޝްރޫއަށް ފޯމު ހުށަހަޅާ އެންމެންނަށް ފްލެޓް ލިބޭނެ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެއެވެ.
ވިލިމާލެ ދެ ވަނަ ފިޔަވަހީގެ ޕްލޭން ލޯންޗު ކުރުމަށް ދަރުބާރުގޭގައި ބުރާސްފަތި ދުވަހުގެ ރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން މުއިއްޒު ވިދާޅުވީ ހިޔާ މަޝްރޫއަށް މިހާތަނަށް ފޯމު ހުށަހެޅި މީހުންނާއި މި މަހުގެ 30 ގެ ނިޔަލަށް ފޯމު ހުށަހަޅާ އެންމެންނަށް ފްލެޓް ލިބޭނެ ކަމުގެ ޔަގީންކަން ދިނުމަށް ރައީސް ޔާމީން އެދިވަޑައިގެންފައިވާ ކަމަށެވެ.
ހިޔާ މަޝްރޫއުގެ ދަށުން 7،000 ފްލެޓް ދޫކުރުމަށް ސަރުކާރުން ވަނީ ނިންމާފައެވެ. އެ ފްލެޓްތަކަށް އެދި 18،000 މީހުން ހުށަހަޅާފައިވާ ކަމަށް މުއިއްޒު ވިދާޅުވިއެވެ. ނަމަވެސް ފްލެޓަށް ފޯމުލާ އެންމެނަށް ފްލެޓް ދޭނެ ގޮތެއް މުއިއްޒު ވިދާޅެއް ނުވެއެވެ.
ރިޔާސީ އިންތިހާބަށް ދެ ދުވަހަށް ވެފައި ވަނިކޮށް، ސަރުކާރުން އިފްތިތާހު ކުރި ވިލިމާލެ ދެ ވަނަ ފިޔަވަހީގެ އަމާޒަކީ 315،000 މީހުންނަށް ކޭޓާ ހުރެވޭނެ ސަރަހައްދެއް ތަރައްގީ ކުރުމެވެ.
