މުލީއާގެއަށް ބޮޑު ޕިކަޕެއްގައި ގިނަ ފޮށިތަކެއް ދަންވަރު ވައްދައިފި
20 ސެޕްޓެމްބަރު 2018 | ބުރާސްފަތި 17:59ޕިކަޕް ވަދެއްފައިވަނީ މީގެ ތިން ރޭ ކުރިން ދަންވަރު 12:40 ހާއިރު
މީގެ ތިން ރޭ ކުރިން ބޮޑު ޕިކަޕެއްގައި މުލީއާގެއަށް ބޮޑެތި ފޮށިގަނޑުތަކެއް ވައްދަނީ
އަންނަ އާދިއްތަ ދުވަހު ރިޔާސީ އިންތިހާބު ބާއްވާއިރު، ސަރުކާރު ހިންގާ ޕީޕީއެމްގެ ކެމްޕެއިންގެ ރަސްމީ މަސައްކަތްތައް ހިންގަމުންދާ މުލީއާގެއަށް ރޭގަނޑު ދަންވަރު ބޮޑު ޕިކަޕެއް ފުރާ ފޮށިތަކެއް ވައްދައިފި އެވެ.
ރައީސް ޔާމީންގެ އަނބިކަނބަލުން ފާތުމަތު އިބްރާހީމް ހިންގަވާ ޞަދަގާތު ފައުންޑޭޝަން ވެސް ހިންގާ ރިޔާސީ ގަނޑުވަރުކޮޅެއް ކަމަށްވާ މުލީއާގެއަށް ބޮޑު ޕިކަޕެއްގައި ގިނަ އަދަދެއްގެ ފޮށިގަނޑުތަކެއް ވައްދާފައިވަނީ މީގެ ތިން ރެއެއްވަރު ކުރިން ނެވެ. ރާއްޖެ.އެމްވީއަށް މައުލޫމާތު ދިން ފަރާތަކުން ބުނިގޮތުގައި އެއީ ހޯމަ ދުވަހުގެ ރެ އެވެ.
ރާއްޖެ.އެމްވީ އަށް މައުލޫމާތު ދިން މީހާ ބުނިގޮތުގައި އެ ޕިކަޕް މުލީއާގެއަށް ވަނީ އެ ރޭ ދަންވަރު 12:40 ހާއިރު ކަމަށެވެ. އެ ޕިކަޕް މުލީއާގެއަށް ވަދެފައިވަނީ މުލީއާގެ ރަސްމީ މައި ގޭޓުން ކަމަށްވެސް އޭނާ ބުންޏެވެ. އެ ޕިކަޕް މުލީއާގެއަށް ވެއްދުމުގެ ކުރިން މުލީއާގެ ސެކިއުރިޓީ ބަލަހައްޓާ ދެމީހަކު ގޭޓް ކުރިމަތި މަގުތީގައި ހަރަކާތްތެރިވެފައިވާ ކަމަށާއި ޕިކަޕް ވައްދާފައިވަނީ މަގުމަތީގައި މީހަކު ފެންނަން ހުރިތޯ ބެލުމަށް ފަހުގައި ކަމަށްވެސް އޭނާ ބުންނެވެ.
އޭނާ ބުނީ މުލީއާގެއަށް ވެއްދީ ކޯއްޗެއް ކަމެއް ނޭނގޭ ކަމަށާއި ނަމަވެސް ސެކިއުރިޓީ މީހުންގެ ހަރަކާތުން އެއީ ސިއްރުން މުލީއާގެއަށް ވައްދާ ފޮށިތަކެއްކަން ފާހަގަކުރެވުނު ކަމަށެވެ.
މުލީއާގެއަށް އެސްޓީއޯގެ ކާޑު ގުދަނުން ބޮޑެތި ލޮރީތަކުގައި ކާޑު ވެއްދި މަންޒަރު މީގެކުރިން ރާއްޖެ.އެމްވީއަށް ވަނީ ފެނިފަ އެވެ. ކާޑު މުލީއާގެއަށް ވައްދައި، ޕެކެޓްކޮށް، ޞަދަގާތު ފައުންޑޭޝަންގެ ނަމުގައި ބަހާފައިވާކަން ވަނީ ފާހަގަ ކުރެވިފަ އެވެ.
