ހައްޖަށް ދިއުމަށް ޕެންޝަން ފައިސާ ބޭނުން ކުރެވޭނެ ގޮތް ހަދާނަން: ގުޅިފައިވާ ޕާޓީތައް
އިސްލާމީ ރިސާޗް ސެންޓަރެއް ވެސް އުފައްދަނީ
ކައުބާ: ޕެންޝަން ފައިސާއިން ހައްޖަށް ދެވޭނެ ގޮތް ހަދާނެ
ހައްޖަށް ދިއުމަށް ފެންޝަން ފައިސާ ބޭނުން ކުރެވޭނެ ގޮތް ހަމަޖައްސާނެ ކަމަށް ގުޅިފައިވާ ޕާޓީތަކުން ވައުދުވެއްޖެއެވެ.
ގުޅިފައިވާ ޕާޓީތަކުގެ މެނިފެސްޓޯގައި ބުނެފައި ވަނީ ޙައްޖު ވުމަށް ޕެންޝަން ފައިސާ ބޭނުންކުރެވޭނެ ގޮތް ހަމަޖެއްސާނެ ކަމަށާއި ޙައްޖާއި ޢުމްރާގެ އަޅުކަމާ ގުޅޭ މަސައްކަތްތައް މީހުންގެ އިތުބާރު ލިބޭ ފަދަ ގޮތަކަށް ރާވާ ހިންގޭނެ އުސޫލުތަކާއި އިންތިޒާމްތައް ހަމަޖައްސައި އެކަން ކަށަވަރު ކުރާނެ ކަމަށެވެ.
ޙައްޖާޖީންނާއި ޢުމްރާވެރިންނަށް އިހާނެތި ގޮތްތައް ހަދާ ފަރާތްތަކަށް ފިޔަވަޅު އެޅޭނެ އުސޫލުތަކެއް ކަނޑައަޅައި ޙައްޖާއި ޢުމްރާއަށް މީހުން ގެންދިއުމުގެ ފުރުޞަތު ކުންފުނިތަކަށް ދިނުމުގައި، ދެ ފުށް ފެންނަ އުސޫލެއް ކަނޑައަޅާނެ ކަމަށް ވެސް ގުޅިފައިވާ ޕާޓީތަކުގެ މެނިފެސްޓޯގައި ވައުދުވެފައި ވެއެވެ.
"ޙައްޖަށް ގެންދިއުމުގައި ކުންފުނިތަކުން އެއްބަސްވާ އަގަށްވުރެ އިތުރަށް ފައިސާ ނަގާކަމަށް ކުރެވޭ ޝަކުވާތަކަށް ޙައްލު ހޯދޭނެއެވެ. އަދި ޙައްޖު ކޯޕަރޭޝަން ހަރުދަނާކޮށް ތަރައްޤީކުރެވޭނެއެވެ،" ގުޅިފައިވާ ޕާޓީތަކުގެ މެނިފެސްޓޯގައި ވެއެވެ.
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ވެރިކަމާ ހަވާލުވެވަޑައިގަތުމަށް ފަހު، އިސްލާމީ ރިސާރޗް ސެންޓަރެއް ޤާއިމް ކުރާނެ ކަމަށާއި އެ މުއައްސަސާގެ ބޭނުމަކީ ބައިނަލް އަގްވާމީ އެފަދަ ސެންޓްރުތަކާއި ޔުނިވާސިޓީތަކާ ގުޅިގެން ދީނާ ގުޅުން ހުރި ދިރާސާތައްކުރުމާއި، ދީނީ ފޮތް ލިޔެ ތައްޔާރު ކުރުމާއި، ދީނީ ޖާރނަލްތައް ޝާއިޢު ކުރުމުގެ މަސައްކަތް ކުރުން ކަމަށް މެނިފެސްޓޯގައި ވެއެވެ. އަދި މަޖިލީހުން ހަދާ ގާނޫނުތަކަށާއި ސަރުކާރުގެ އޮފީސްތަކަށާއި މިނިވަން މުއައްސަސާތަކުން ހިންގާ ކަންކަމުގައި ދީނާ ފުށުއަރާ ކަންތައްތައް ބަލައި، ދީނީ ލަފާ ދިނުމަށްޓަކައި ފިގުހު އެކަޑަމީއަކީ މިނިވަން މުއައްސަސާއަކަށް ހަދާނެ ކަމަށް މެނިފެސްޓޯގައި ވެއެވެ.
ހަތަރު ޕާޓީގެ ލީޑަރުން ހުށަހަޅާފައިވާ ކަންތައްތަކަށް ރިޔާއަތްކޮށް، ގުޅިފައިވާ ޕާޓީތަކުގެ މެނިފެސްޓޯގައި ބުނެފައި ވަނީ ރާއްޖެއަކީ ސައްތައިން ސައްތަ އިސްލާމީ ގައުމެއްގެ ގޮތުގައި ދަމަހައްޓައި، އިސްލާމްދީން ނޫން އެހެން ދީނަކަށް މި ފަސްގަނޑުން ޖާގަ ނުލިބޭނެކަން ގުޅިފައިވާ ޕާޓީތަކުގެ ސަރުކާރުން ކަށަވަރު ކުރާނެ ކަމަށެވެ.
