ފިޔަވަތީގައި މެޑިކަލް ޔުނިޓެއް ގާއިމުކޮށްފި
20 ސެޕްޓެމްބަރު 2018 | ބުރާސްފަތި 16:33މެޑިކަލް ޔުނިޓުގައި ނަރުހުން ޑިއުޓީގެ އުސޫލުން ޚިދުމަތް ދެމުންދާނެ
ފިޔަވަތީގައި މެޑިކަލް ޔުނިޓް މިނިސްޓަރ ހުޅުއްވައިދެއްވަނީ
ހުޅުމާލޭގައި ހިންގާ ކުޑަކުދިން ބަލަހައްޓާ މަރުކަޒު ފިޔަވަތީގައި މިނިސްޓްރީ އޮފް ޖެންޑަރ އެންޑް ފެމިލީން މެޑިކަލް ޔުނިޓެއް ގާއިމުކޮށްފިއެވެ.
މެޑިކަލް ޔުނިޓު ރަސްމީކޮށް ހުޅުވައިދެއްވީ ފިޔަވަތީގައި ބުރާސްފަތި ދުވަހު ކުރިއަށް ދިޔަ ކުޑަ ރަސްމިއްޔާތެއްގައި މިނިސްޓަރ އޮފް ޖެންޑަރ އެންޑް ފެމިލީ ޒެނީޝާ ޝަހީދު ޒަކީއެވެ.
މި ރަސްމިއްޔާތުގައި ވާހަކަ ދައްކަވަމުން ޒެނީޝާ ވިދާޅުވީ ދައުލަތުގެ ބެލުމުގެ ދަށުގައި ހުންނަ މަރުކަޒުތަކުގައި ދިރިއުޅޭ ކުދިންނަށް ބޭނުންވާ އަސާސީ ބޭނުންތައް ފުއްދައިދީ، އެ ކުދިންގެ ސިއްހަތާއި ދުޅަހެޔޮ ކަމަށް ސަރުކާރުން ހާއްސަ ސަމާލުކަމެއް ދޭ ކަމަށެވެ. އަދި މި ފަދަ މެޑިކަލް ޔުނިޓެއް ފިޔަވަތީގައި ގާއިމުކުރެވިގެން ދިޔުމަކީ އެ ދާއިރާއިން ކުރަމުންދާ މަސައްކަތްތަކަށް ލިބިގެން ދިޔަ އިތުރު ކުރިއެރުމެއް ކަމަށެވެ.
މެޑިކަލް ޔުނިޓުގައި ނަރުހުން ޑިއުޓީގެ އުސޫލުން ޚިދުމަތް ދެމުންދާނެއެވެ. އަދި އާންމު ބަލިތަކާއި، އެނދުމަތި ކޮށްގެން ދެވޭ ފަރުވާ އާއި ހެލްތު ސްކްރީނިންގ ހެދުމަށް ބޭނުންވާ ވަސީލަތްތައް މި ޔުނިޓުގައި ވަނީ ގާއިމުކުރެވިފައެވެ. މީގެ އިތުރުން، އައި.ވީއާއި، ބޭސްއެޅުމާއި، ބައެއް ޑަކްޓަރީ ބޭހުގެ ހިދުމަތް ވެސް މި ޔުނިޓުން ލިބެން ހުންނާނެއެވެ.
މީގެ ކުރިން މިފަދަ ހިދުމަތްތައް ފޯރުކޮށްދެމުން ދިޔައީ ފިޔަވަތީގައި ގާއިމުކުރެވިފައިވާ މެޑިކަލް ރޫމަކުންނެވެ.
ފިޔަވަތީގައި މި ވަގުތު 12 އަހަރުން ދަށުގެ ޖުމުލަ 91 ކުދިން ދިރިއުޅެމުންދެއެވެ.
