އިލެކްޝަންސް ކޮމިޝަނާ ގުޅޭ ގިނަ ކަންބޮޑުވުންތަކެއް ހުރިނަމަވެސް ކޮމިޝަން ހިމޭނުން: މާރިއާ
19 ސެޕްޓެމްބަރު 2018 | ބުދަ 13:27ވޯޓު ކަރުދާސްކޮޅު ދެއްކުމުގެ ކުރިން 50 ވޯޓު ކަރުދާހުން ބަންޑެލި ކުރުން
ރިޔާސީ ކެންޑިޑޭޓް އިބްރާހީމް މުހައްމަދު ސޯލިހުގެ ތަރުޖަމާނު މާރިއާ އަހުމަދުދީދީ
އަންނަ އާދިއްތަ ދުވަހު ބާއްވާ ރިޔާސީ އިންތިހާބުގެ ވޯޓުލުން ކުޑަތަންވަމުންދާއިރު، އެ ކަންބޮޑުވުންތަކަށް ހައްލެއް ގެންނަން އިލެކްޝަންސް ކޮމިޝަން މަސައްކަތް ނުކުރައްވާ ކަމަށް ގުޅިފައިވާ ސިޔާސީ ޕާޓީތަކުން ބުނެފިއެވެ.
ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހު (އިބޫ)ގެ ތަރުޖަމާނު މާރިއާ އަހުމަދުދީދީ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވީ ކުރިން ފާހަގަކުރަމުން އައި ކަންބޮޑުވުންތަކުގެ އިތުރުން ރައްޔިތުންގެ މެދުގައި އިލެކްޝަންސް ކޮމިޝަނާ މެދު އިތުރު ވާހަކަތަކެއް ފެތުރެމުންދާ ކަމަށެވެ.
މާރިޔާ ވަނީ މީގެ ކުރިން ދެ ކެންޑިޑޭޓުންގެ މަންދޫބުން ސޮއި ކުރައްވާފައިވާ ވޯޓާސް ލިސްޓް ކެންޑިޑޭޓުންގެ މަންދޫބުންނަށް ދޫކޮށްފައި ނުވާތީ އާއި ޓެބްލެޓް ބޭނުންކޮށްގެން އިންތިހާބުގެ ނަތީޖާ އިއުލާންކުރާ ވާހަކައާ މެދު ތަކުރާރުކޮށް ކަންބޮޑުވުން ފާޅުކުރައްވާފައެވެ. އަދި ވޯޓު ކަރުދާސްކޮޅުގެ ސައްހަކަން ވޯޓު ލުމަށް ފަހު، އަދި ވޯޓު ގުނުމުގެ ކުރިން އިލެކްޝަންސް ކޮމިޝަނުން ބަލާނެ ކަމަށް ބުނެފައިވާތީ އެ ކަމާ މެދު ވެސް ގުޅިފައިވާ ސިޔާސީ ޕާޓީތަކުން ވަނީ ކަންބޮޑުވުން ފާޅުކޮށްފައެވެ.
މާރިއާ ވިދާޅުވީ އެ ކަންބޮޑުވުންތަކަށް އިލެކްޝަންސް ކޮމިޝަނުން ރަސްމީ ބަހެއް ބުނެފައިނުވާތީ އާއި އަދި ނޫސްވެރިންގެ ބައްދަލުވުމެއް ބާއްވައި އެ ވާހަކަތަކުގެ ހަގީގަތް ރައްޔިތުންނަށް ހާމަކޮށްދީފައި ނުވާތީ ވަރަށް ބޮޑަށް ކަންބޮޑުވެވަޑައިގަންނަވާ ކަމަށެވެ.
މާރިއާ ވިދާޅުވީ އެ ކަންބޮޑުވުންތަކަށް ހައްލެއް ނުލިބި އުޅެނިކޮށް، އިލެކްޝަންސް ކޮމިޝަނާ ގުޅޭ އިތުރު ވާހަކަތެއް ފެތުރެމުންދާ ކަމަށެވެ. އެ ގޮތުން ވޯޓު ގުނުމުގައި ކޮމިޝަނުން އަމަލު ކުރުމަށް ރާވާފައިވާ ގޮތާ މެދު ވާހަކަތަކެއް ލިބެމުންދާ ކަމަށެވެ. އެ ގޮތުން ވޯޓު ގުނާއިރު، ވޯޓު ކަރުދާސްކޮޅު މޮނީޓަރުންނާއި އޮބްޒާވަރުންނަށް ދެއްކުމުގެ ކުރިން 50 ވޯޓު ކަރުދާސް ކޮޅުން، ވޯޓު ކަރުދާސް ކޮޅުތައް ބަންޑެލި ކުރުމަށް އިލެކްޝަންސް ކޮމިޝަނުން ރާވަމުންދާ ކަމުގެ މައުލޫމާތު ލިބިފައިވާ ކަމަށް މާރިއާ ވިދާޅުވިއެވެ. މާރިޔާ ވިދާޅުވީ ވޯޓު ކޮންމެ 50 ކަރުދާސްކޮޅުން ބަންޑެލި ކުރަން ވާނީ، ކޮންމެ ކަރުދާސްކޮޅެއް ވަކި ވަކިން އޭގައިވާ ފާހަގަ މޮނީޓަރުންނާއި އޮބްޒާވަރުންނަށް ދެއްކުމަށް ފަހުގައި ކަމަށެވެ. އަދި އެއީ މީގެ ކުރިން ވެސް އެކަން ކުރަމުން އައި ގޮތް ކަމަށެވެ.
މީގެ އިތުރުން މާރިއާ ވިދާުޅުވީ ދައުލަތުގެ މީޑިއާ އާއި އިލެކްޝަންސް ކޮމިޝަނުން ގުޅިގެން އިންތިހާބުގެ ވަކި ނަތީޖާއެއް އިއުލާން ކުރުމަށް ރާވަމުންދާ ކަމުގެ މައުލޫމާތު ވެސް ލިބިފައިވާ ކަމަށެވެ. އަދި މީގެ އިތުރުން ވޯޓާ ގުޅޭ ގޮތުން ރައްޔިތުންގެ ވަރަށް ގިނަ ކަންބޮޑުވުންތަކެއް އެބަހުރި ކަމަށް ވެސް މާރިއާ ވިދާޅުވިއެވެ.
