ސަރުކާރުން ޕްރޮމޯޓްކުރާ ޕްރޮޖެކްޓްތައް ހިންގާ ކުންފުނިތަކުން އިސްލާމް ދީނަށް ފުރައްސާރަކުރަނީ!
ކޮރަލް ބުލެވަރޑް ކުންފުނީގައި މަސައްކަތްކުރި މުވައްޒަފުންތަކެއް ވަނީ އެމައްސަލަ ޓްރައިބިއުނަލަށް ހުށަހަޅާފައި
ކޮރަލް ބުލެވަރޑް މަޝްރޫޢުގެ މަސައްކަތް ރައީސް ޔާމީން ބައްލަވާލައްވަނީ
ސަރުކާރުން ޕްރޮމޯޓްކުރާ ބައެއް ޕްރޮޖެކްޓްތައް ހިންގާ ކުންފުނިތަކުން އިސްލާމް ދީނަށް ފުރައްސާރަކޮށް، ދިވެހި މުވައްޒަފުންނަށް ޖިސްމާނީ އަނިޔާވާ ގޮތަށް އަދަބު ދޭކަމުގެ މައުލޫމާތު ލިބިއްޖެއެވެ.
ރާއްޖެއެމްވީ އަށް އިތުބާރު ހުރި މަސްދަރަކުން މައުލޫމާތު ދިން ގޮތުގައި ރަސްފަންނު ސަރަހައްދުގައި ތަރައްޤީކުރާ ކޮރަލް ބުލެވަރޑް ތަރައްޤީކުރާ ސިންގަޕޫރުގެ ޝަންހުއާ ކުންފުނިން އެތަނުގައި މަސައްކަތްކުރި ދިވެހި މުވައްޒަފުންނާ މެދު ވަޒީފާގެ ޤާނޫނާ ޚިލާފަށް އަމަލުކުރި ކަމަށް ބުނާ މައްސަލަތަކެއް ވަޒީފާއާ ބެހޭ ޓްރައިބިއުނަލަށް ވަނީ ހުށަހަޅާފައެވެ.
ޝަންހުއާ ކުންފުނީގައި ކުރިން މަސައްކަތްކުރި ބައެއް މުވައްޒަފުންގެ ފަރާތުން މައުލޫމާތު ލިބިފައިވާ ގޮތުގައި އެތަނުގައި މަސައްކަތްކުރާ މުވައްޒަފުންނަށް މިދިޔަ ރޯދަ މަހު ޢިނާޔަތް ނުލިބިގެން ދާން ޖެހުނީ ލޭބަރ ރިލޭޝަންސް އޮތޯރިޓީއަށެވެ. އަދި އެ އޮތޯރިޓީ އިން ވެސް އެކުންފުންޏަށް ލުއިތަކެއްދީ، ވަޒީފާއާ ބެހޭ ޤާނޫނާ ޚިލާފަށް ކުންފުންޏަށް ފަސޭހަ ގޮތަކަށް ރޯދަ މަހުގެ އިނާޔަތް ދިނުމަށް ހަމަޖައްސައިދިން ކަމަށް މުވައްޒަފުން ބުނެއެވެ.
އެކުންފުނީގައި މަސައްކަތްކުރި މުވައްޒަފުން މައުލޫމާތު ދިން ގޮތުގައި މިދިޔަ ރޯދަ މަހު ކުންފުނީގެ މުވައްޒަފުން ނަމާދަށް ދިޔުމަށް ކުންފުނިން ހުރަސް އެޅިއެވެ. އަދި ޑިއުޓީ ގަޑީގައި ނަމާދު ނުކުރެވޭނެ ކަމަށް އަންގައި، އޮފީސް ތެރޭގައި ވެސް ނަމާދު ކުރުން މަނާކުރިއެވެ. އަދި މީގެ އިތުރުން އިރު އޮއްސޭ ވަގުތާ ދިމާކޮށް މުވައްޒަފުން ރޯދަ ވީއްލަން ގެޔަށް ދިޔަ ނުދީ، އެގަޑިއަށް ބައްދަލުވުންތަކާއި ޓްރެއިނިންގތައް ޝެޑިއުލް ކުރަމުން ދިޔަ ކަމަށް ވެއެވެ.
މީގެ އިތުރުން މުވައްޒަފުން ގަޑި ޖެހިއްޖެ ނަމަ މުސާރައިން ކެނޑުމުގެ ބަދަލުގައި، ޖެހިގެން އަންނަ ދުވަހު މުވައްޒަފުން އޮފީހަށް ލާރި ދައްކަން ޖެހޭ ކަމަށް މުވައްޒަފުންނަށް އެންގި ކަމަށް ވެއެވެ.
ރާއްޖެއެމްވީ އާއި ވާހަކަ ދެއްކި މުވައްޒަފުންގެ ފަރާތުން މައުލޫމާތު ލިބުނު ގޮތުގައި ތަނުގައި ތިބި ހުރިހާ ދިވެހި މުވައްޒަފުން ވަނީ މިހާރު ވަޒީފާ އިން ވަކިކޮށްފައެވެ. އަދި އޭގެ ކުރިން އެތަނުގައި މަސައްކަތްކުރި ބުރުގާ އެޅި މުވައްޒަފުން މަޤާމުން ވަކިކޮށް، އަލަށް ތަޢާރަފްކުރި ޔުނިފޯމުގައި ބުރުގާ އަޅާ ކުދިންނަށް އަޅާނެ ޔުނިފޯމެއް ނެތް ކަމަށް މައުލޫމާތު ލިބެއެވެ.
ކޮރަލް ބުލެވަރޑް އިން ކުރިން ބޭއްވި ނޫސްވެރިންގެ ބައްދަލުވުމެއް
ދިވެހި މުވައްޒަފުން ކޮރަލް ބުލެވަރޑްގެ ޝޯވ ރޫމްގައި މަސައްކަތްކުރާއިރު، އެތަނުގައި ހުންނަ ސޯފާތަކުގައި ދިވެހި މުވައްޒަފުން އިށީނުން މަނާކުރި ކަމަށް ވެސް ކުރިން އެތަނުގައި މަސައްކަތްކުރި މުވައްޒަފުން ބުނެއެވެ. އަދި ތަނުގެ ވެރިންގެ ގޮތުގައި ޗައިނާ މީހުން ތިބެ، އޮފީސް ތެރޭގައި ރަސްމީ ބަހެއްގެ ގޮތުގައި ޗައިނާ ބަހުން ވާހަކަ ދެއްކުމުގެ ސަބަބުން، އެތަނުގައި އޭރު ތިބި ދިވެހި މުވައްޒަފުންނަށް އެކަމުގެ ސަބަބުން ވެސް ބޮޑެތި ދަތިތަކެއް ކުރިމަތިވިއެވެ.
މީގެ އިތުރުން ސޭލްސް ޓީމުގެ މުވައްޒަފުންނަށް ސޭލްސް ޕިޗްކުރުމާ ބެހޭ ގޮތުން މައުލޫމާތު ދިނުމަށް ފަހު، ދަސްވި އެއްޗެއް ބެލުމަށް މުވައްޒަފުންނާ ސުވާލުކުރުމުން، އެސުވާލުތަކަށް ޖަވާބު ނުދެވޭ މުވައްޒަފުން ލައްވައި އަސްކަރީ ތަމްރީންތަކުގައި ހައްދާ ފަދައިން ޕުޝްއަޕްސް ހަދަން ޖެއްސި ކަމަށް މުވައްޒަފުން ބުނެއެވެ. އަދި އެކަމުގެ ސަބަބުން މުވައްޒަފުންނަށް ނަފްސާނީ ގޮތުން އަސަރުކޮށްފައިވާ ކަމަށް ރާއްޖެއެމްވީ އަށް މައުލޫމާތު ދިން ކުރީގެ މުވައްޒަފަކު ބުންޏެވެ.
ޝަންހުއާ ކުންފުނިން ވިއްކާ އެޕާޓްމަންޓްތަކުގެ އިޝްތިހާރުތައް މާލޭގެ ގްރީން ޒޯނާއި އެހެނިހެން ސަރަހައްދުތަކުގައި ޖަހާފައި ވަނީ ވެސް ޤަވާޢިދާ ޚިލާފަށެވެ. އަދި އެކުންފުންޏަށް އެއަރޕޯޓް އެރައިވަލް ހޯލްގައި ރިސޯޓްތަކާއި ޓުއަރ އޮޕަރޭޓަރުންނަށް ޑެސްކް ދީފައި ހުންނަ ތަނުން ޑެސްކް ދީފައި ވާތީ ވެސް އެއަރޕޯޓްގައި މަސައްކަތްކުރާ ބައެއް ފަރާތްތަކުން ކަންބޮޑުވުން ފާޅުކޮށްފައި ވެއެވެ.
ރަސްފަންނުގައި ތަރައްޤީކުރާ ކޮރަލް ބުލެވަރޑްގެ މަސައްކަތްކުރާ ޝަންހުއާ ކުންފުންޏަކީ އައިޖީއެމްއެޗްގެ 25 ބުރީގެ އިމާރާތުގެ މަސައްކަތް ވެސް ކުރާ ކުންފުންޏެވެ. އެކުންފުނީގައި ކުރިން މަސައްކަތްކުރި މުވައްޒަފުންތަކެއް މައުލޫމާތު ދިން ގޮތުގައި އެކުންފުންޏަކީ ބްރިޖްގެ މަސައްކަތް ކުރި ޗައިނާގެ ސީސީސީސީ ކުންފުނީގެ މަސްލަހަތު އޮންނަ، ސިންގަޕޫރުގައި ރަޖިސްޓްރީކޮށްގެން ހިންގާ ކުންފުންޏެކެވެ.
ޝަންހުއާގައި މަސައްކަތްކުރާ ހުރިހާ ދިވެހި މުވައްޒަފުން ވަޒީފާ އިން ވަކިކޮށްފައިވާއިރު، އެކުންފުނިން އެމުވައްޒަފުންނާ މެދު އަމަލުކުރި ގޮތާ ގުޅިގެން ބައެއް މުވައްޒަފުން ވަޒީފާއާ ބެހޭ ޓްރައިބިއުނަލަށް ގޮސްފައިވާ ކަމަށް މައުލޫމާތު ލިބެއެވެ.
ކުންފުނީގައި ކުރިން މަސައްކަތްކުރި މުވައްޒަފުން ކުރި ތުހުމަތުތަކާ ގުޅޭ ގޮތުން ޝަންހުއާގެ ބަހެއް ހޯދާލުމަށް ގުޅައިގެން ކުރި މަސައްކަތް ކާމިޔާބު ވެފައި ނުވާތީ އެކުންފުނީގެ މުވައްޒަފުންގެ އިރުޝާދާ އެކު ކުންފުނީގެ މޮބައިލް ނަމްބަރަކަށް ކުރި މެސެޖަށް އަދި ޖަވާބު ދީފައެއް ނުވެއެވެ.
