ރައީސް ޔާމީނަށް އިތުރު 5 އަހަރު ދީފި ނަމަ ކަތީބުގެ ސިސްޓަމަށް މި ރާއްޖެ ބަދަލުކުރާނެ: ޝާހިދު
18 ސެޕްޓެމްބަރު 2018 | އަންގާރަ 05:42އެމްޑީޕީގެ ވެރިކަމުގައި ލާމަރުކަޒީ ގާނޫނެއް ހަދާ ރާއްޖޭގެ ރައްޔިތުންނަށް ބާރުތައް ދޫކޮށްލި
މަޖިލީހުގެ ހެންވޭރު އުތުރު ދާއިރާގެ މެމްބަރު އަބުދުﷲ ޝާހިދު
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމަށް އިތުރު ފަސް އަހަރު ދީފި ނަމަ ކުރިން އޮތް ކަތީބު ސިސްޓަމަށް މި ރާއްޖެ ބަދަކުރާނެ ކަމަށް ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެމްބަރު އަބުދުﷲ ޝާހިދު ވިދާޅުވެއްޖެއެވެ.
ކޯލިޝަނުން ފ. ބިލެއްދޫގައި ބޭއްވި ޖަލްސާގައި ޝާހިދު ވިދާޅުވީ އެމްޑީޕީގެ ވެރިކަމުގައި ލާމަރުކަޒީ ގާނޫނެއް ހަދާ ރާއްޖޭގެ ރައްޔިތުންނަށް ބާރުތައް ދޫކޮށްލި ކަމަށާއި، ނަމަވެސް މިސަރުކާރުން ރައްޔިތުން ބާރުތައް އަތުލަމުން އަންނަ ކަމަށެވެ.
އެގޮތުން ރައީސް ޔާމީން ވެރިކަމަށް ހޮވުމާ އެކު ރައްޔިތުންގެ މަޖިލީހަށް ހުށަހެޅި ބިލަކުން އަތޮޅުތަކުގެ ކައުންސިލަރުންގެ މުސާރަ ކުޑަކޮށް، ބާރުތައް އަތުލާފައިވާ ކަމަށް ޝާހިދު ވިދާޅުވިއެވެ. ޝާހިދު ވިދާޅުވީ މިއަދު ކައުންސިލަރުންނަކީ އެއްވެސް ބާރެއް، އެއްވެސް އިހުތިޔާރެއް ނެތް ބައެއްގެ ގޮތުގައި ހަދާފައިވާ ކަމަށެވެ.
"މިހާރު އެމަނިކުފާނު އެވިދާޅުވަނީ އެވަރު ވެސް ތިމަންނައަކަށް ނުފުދޭ. ތިމަން މަނިކުފާނު ބޭނުންފުޅު ވަނީ ހަމަ އިހު އޮތް ގޮތަށް ކަތީބު ސިސްޓަމަށް ބަދަލުކޮށްލާށޭ. މާލޭން އަންގަވާލާނޯ. ބަލަ މިތަނުގައި މިވެނި ކަމެއް ކުރޭ. އެތަނުގައި އެވެނި ކަމެއް ކުރޭ. މިތަން ކޮނޭ، މިތަނަށް ފަސް އަޅާ. މިވެނި މީހަކު ބަދެލާގެން ގެނޭ. ހިމަރޯނުން ބަދެލާ،" ޝާހިދު ވިދާޅުވިއެވެ.
ރައްޔިތުންގެ ހާލަތު އެންމެ ރަނގަޅަށް އެނގޭނީ އެރަށުގައި ދިރިއުޅެމުން އަންނަ ކައުންސިލަރުންނަށް ކަން ފާހަގަކުރައްވައި ޝާހިދު ވިދާޅުވީ މާލެ ފިނިކޮޓަރީގައި އިންނަވާ ވަޒީރަކަށް ރައްޔިތުންގެ ހާލު އިހްސާސް ނުކުރެއްވޭނެ ކަމަށެވެ. ޝާހިދު ވިދާޅުވީ ރައްޔިތުންނަށް ހެޔޮގޮތް ހޯދައިދިނުމަށް އެންމެ ބުރަކޮށް މަސައްކަތް ކުރާނީ ކައުންސިލަރުން ކަމަށެވެ.
"މާލޭގައި ފިނިކޮޓަރީގައި އިންނަ މީހަކަށް މައިމީހާ ތުއްތު ކުއްޖާ ގައިގައި ހެސްކިޔާފަ މަދިރިހަފައި މަދިރިކައި އުޅޭއިރު ރޯއަނދިރީގައި ކަރަންޓުގެ އަލިކަމެއް ނެތިގެން ތުއްތު ދަރިފުޅު ރޯއިރު އެކުރާ އިހުސާސް މާލޭގެ ފިނިކޮޓަރީގައި އިންނަ ވެރިއަކަށް ނޭނގޭނެ. މަދަރުސާއަށް ކުދިންގެންދާއިރުގައި ކަކުލާ ހަމައަށް ޗަކަސް ހެދިފައި، ފެން ބޮޑުވެފައި އޮންނައިރު ތުއްތު ކުދިން އެތުއްތު ކުދިން އެތަނުން ގެންދާއިރު އެކުރެވޭ އިހުސާސް މާލޭގެ ފިނި ކޮޓަރީގައި ބޮޑު މުސާރަ ނަގާގެން ކާރުގައި އިންނަ ވަޒީރަކަށް އިހުސާސަކަށް ނޭނގޭނެ،" ޝާހިދު ވިދާޅުވިއެވެ.
ޝާހިދު ވިދާޅުވީ މިފަދަ ސިސްޓަމެއް ދިވެހިން ބޭނުންނުވާ ކަމަށާއި، އަޅުވެތިކަމުގައި ދިވެހިން ނުތިބޭނެ ކަމަށެވެ. މި ރިޔާސީ އިންތިޚާބުގައި ރައްޔިތުން ނުކުމެ ވޯޓުލައިގެން ރައީސް ޔާމިން ބަލިކުރާނެ ކަމަށާއި، ދިވެހިންގެ މިނިވަންކަމާއި، ދިވެހިންގެ ބާރުތައް ހޯދާނެ ކަމަށެވެ.
